Read Ebaibuli 1961 Yeremia 19 Bible Online

Yeremia 19 - Ebaibuli 1961 bible

Yeremia 19

¹ Ebala EJAKAIT kwanata ebe, “Kolot, kogwel amot naka elupe naka ekajean, koyaŋa ice komakio luka ituŋa, ice da komakio luka isasedotin;

² koloma neejai aditot naka okoku loka Kinom, naejai eiduny neelomarere orute loka Atiboloka, kitatam kaŋina akiro nukalimokini jo.

³Kinera ebe, ‘Kopuputu yesi akirot naka EJAKAIT, yes ikabakan luka Yuda, ka luiboiete koYerusalem. Ebala kwanata EJAKAIT loka ajoresio, Edeke loka Isirael ebe, Koany, ayauni aronis aibois na, naisideloori aki nuka ŋinituŋanan yeniirari.

⁴ Naarai kajalata eoŋ, amunaut aibois na, kisupurununut lukisupurununo kotomake mama ejaas idekesio ice, lumam lem ejenete, kes ka lukapapaakec, ka ikabakan luka Yuda; kilelebata aibois na kaokot nuka lumam akirot.

⁵ Apotu kodukoto aiboisio nuiceleleete nuka Baal, aicweia ikecedwe kakim araun ainakineta nuicweio nuka Baal: numam eoŋ kecorakinit, karaida einer, mam da aomisioitike alomarit otauka.

⁶ Kanuka ŋun koany, ebala EJAKAIT ebe, Epote apaarasia numam bobo aibois na enyaritere Topet, karaida Aditot naka okoku loka Kinom, konye Aditot naka Earit.

⁷ Etapaluni ainerun naka Yuda ka Yerusalem kaibois kana; ebirokin eoŋ da kes kekileŋ kakonyen nuka lukasurupokec, kakan da naka ŋul kaluemootos aijarakec. Ainakini atesinakec araun akiriŋ naka akweny nuka apak, ka itiaŋ da luka akwap.

⁸ Etarauni ere lo aumokinet, ka aijuar; eumokini ŋinituŋanan yenitori nen, isuari kanuka aiticanitoike kere.

⁹ Ainakini kes konyama awat nuka idwekec lusap ka lupesur, ŋinituŋanan konyam akuan naka opaperoke, kirigaunitete, kicikakinitete, kanekicikakinete lukasurupokec, ka ŋul da luemootos akeceijar.’

¹⁰ “Kosodi ijo aibwaŋ amot kakonyen nuka ituŋa kaluiuparos kajo,

¹¹ ilimokini kes ebe, ‘Ebala kwanata EJAKAIT loka ajoresio ebe: Abwaŋi kwape kwaŋin ituŋa lu ka ere lo, kwape ebwaŋia ituŋanan amot naka ekajean, namam bobo epedorio aipucakin. Ido idaikinete ituŋa Topet, naarai emamikini aibois kamace.

¹²Ebala EJAKAIT ebe, Eswamakini kwape kwaŋin aibois na, ka luiboiete kotoma, aituputoor ere lo kwape Topet.

¹³ Ido itogoi luka Yerusalem, ka itogoi luka ikabakan luka Yuda, luamunaaros, eraunos kwape aibois naka Topet, itogoi kere luesupurununere lukisupurununo oswionokec mama ejai ajore kere naka akuj, kobukokis icedekesio ainakineta numatan,’ ”

¹⁴ Kosodi do kobu Yeremia anyoun koTopet, kama kijukarit EJAKAIT aidwar; kobwo ŋesi kalaro naka etogo loka EJAKAIT kotema ituŋa kere atiar:

¹⁵ “Ebala kwanata EJAKAIT loka ajoresio, Edeke loka Isirael ebe, Koany, ayauni ore lo ka ireriake kere aronis kere naenerak ŋes; naarai apotu kitininikata imurisiŋakec, aŋeroto apupun akiroka.”