Read Ebaibuli 1961 Yeremia 24 Bible Online

Yeremia 24 - Ebaibuli 1961 bible

Yeremia 24

¹ Akaulo naka Nebukadaresar ekabaka loko Babulon aijoreor Yekonia okoku loka Yekoiakim, ekabaka loka Yuda, ka ikapolok luka Yuda, nepepe ka ikeswamak ka ikatatak, anyoun koYerusalem, ayaŋaar Babulon; abu EJAKAIT ketodik, ido koany, ibwaikinitai iditai iarei luka etini koiŋaren keyekalu loka EJAKAIT.

²Edita ediopet ajai etini loajok noi, kwape etini loegei akonore: edita lokiareit ajai etini loarono, lomam epedori anyamio, naarai arono noi.

³Kalimok EJAKAIT eoŋ ebe, “Yeremia, iany inyo?” Katema atiar, “Etini; etini loejok, loejok jokan; ka ŋol da loerono, loerono jokan, lomam epedori anyamio, naarai erono noi.”

⁴Kobu akirot naka EJAKAIT mama ajai ebe,

⁵ “Inera kwanata EJAKAIT, Edeke loka Isirael ebe: Kwape eraar etini lo loejok, kwaŋin asesenia kanuka ajokis ijoreoriton luka Yuda, luabu kejuka kaibois kana alosit toma akwap naka Ikaludean.

⁶ Naarai ebwaikini akakonye mamakec kanuka ajokis, enyakuni bobo kiton akwap na. Eoŋ da aduki kes, kwabo mere aibiror; erai kes, kwabo mere arutor.

⁷ Ainakini kes etau lokajenun eoŋ, ebe Eoŋ EJAKAIT: kes da eraunos ikatuŋa, eoŋ da araun Ekecedeke: naarai eboŋunete mamakaŋ kikecetauon kere.

⁸ “Ido kwape etini loerono, lomam epedori anyamio, naarai erono noi, abeit ebala EJAKAIT ebe, Ekonakini kwaŋin Sedekia ekabaka loka Yuda, ka ikapolokoke, ka luapiaŋunos koYerusalem, luasalakinete akwap na, ka ŋul da luiboiete kakwap nako Misiri.

⁹ Ejaikini kes aisiarisiario kanuka aronis toma ajakanuto kere nuka akwapin; araun amorosit, agaracio, ainyanakinio ka ekenit, kaiboisio kere nuereŋeari kes.

¹⁰Ejukari da ekileŋ, ka eteŋei, ka atular, mamakec, aitodol naemudiarotor kakwap naainakinit kes ka lukapapaakec.”