Read Ebaibuli 1961 Yeremia 26 Bible Online

Yeremia 26 - Ebaibuli 1961 bible

Yeremia 26

¹ Kageunet naka airum naka Yekoiakim okoku loka Yosia, ekabaka loka Yuda, kobu akirot na kama ejai EJAKAIT, kinera atiar,

² “Inera kwanata EJAKAIT atiar: Kobwo kalaro naka etogo loka EJAKAIT, kolimok ireria kere luka Yuda, luepote aima togo loka EJAKAIT, akiro kere nukecorakini jo alimokin kes; sirikimunon adiokirot.

³ Diat iirarete, kibelokin ŋinituŋanan ainyein ekerot loerono; kasodi keitu ainyein aronis, naalosikinit aiswamakin kes kanuka aronis naka aswamisiokec.

⁴ Ido kolimonokini kes atiar, ‘Inera kwanata EJAKAIT atiar: Arai mam kipupete eoŋ, alosenen kokisilaka, luebwaikinit kakonyenekus,

⁵ apuponokini akiro nuka ikabulesin inabin, lukejukanakini yes, kadilonokini tupuruc sek aijukunun, konye mam yes ipupununete;

⁶ aso etuluori rwaru etogo lo aiput kwape Silo, ido etuluori ere lo araun ekenit kotoma atekerin kere nuka akwap.’ ”

⁷Apotu isasedotin ka inabin ka ituŋa kere da kiirasi Yeremia inera akiro ŋun kotogo loka EJAKAIT.

⁸ Kosodi kanen, kedau cut Yeremia einer akiro kere nukicorakinit EJAKAIT alimonokin ituŋa kere, kikamut ŋes isasedotin ka inabin ka ituŋa kere, kobalas ebe, “Abeit itwani ijo!

⁹Kanukinyo idwaria kokiror loka EJAKAIT, kinera atiar, ‘Eraun etogo lo kwape Silo, ka ere lo da eraun ameje, komamei ituŋanan yeniboie kotoma’?” Kotukonokinos ituŋa kere mama ejai Yeremia togo loka EJAKAIT.

¹⁰ Nakiirariata ikapolok luka Yuda ŋun, kodokasi enyounete kotogo loka ekabaka, kopotu togo loka EJAKAIT; kiboikinos neelomarere kokek lokitetet loka etogo loka EJAKAIT.

¹¹ Kosodete isasedotin ka inabin kobalasi ikapolok ka ituŋa kere ebe, “Ibusakinit ekesa lo atwanare; naarai adwaraki ere lo kwape iirariata yesi da ikulepek kakusiki.”

¹²Kosodi kobala Yeremia ikapolok kere ka ituŋa kere ebe, “EJAKAIT ŋes kejukuni aidwar nuka etogo kalo ka ere lo akiro kere nuiirasi yesi.

¹³ Aso do kitemonokis ikusirotin ka akusiswamisio, korimasi eporoto loka EJAKAIT Ekusideke; aso iitokini EJAKAIT ainyein aronis nakinerakinit yes.

¹⁴ Konye eoŋ, koany ajai akanikus. Kiswamakinai nuejok ka nuebeito kakonyekus.

¹⁵Kojenutu kereka yes, arai kiiara eoŋ, kibeikinete yes aokot nuemameete aronis kore kalo, ka ŋul luiboiete kotoma; naarai abeit EJAKAIT kejukunit mama ijaas einer akiro nu kere kakiikus.”

¹⁶Kosodete ikapolok ka ituŋa kere kobalas isasedotin ka inabin ebe: “Mam ibusakinit etuŋanan lo atwanare: naarai inerit kaoni kokiror loka EJAKAIT Ewokodeke.”

¹⁷ Kosodete konyout imakio ice luka akwap, kobalas atukot kere naka ituŋa ebe,

¹⁸ “Abu Mikaia Emorasit kodwar kapaarasia nuka Kesekia ekabaka loka Yuda; kinera kituŋa kere luka Yuda, kobala ebe: ‘Inera kwanata EJAKAIT loka ajoresio atiar, Iloboo rwaru Sion kwape kamana; Yerusalem da eluori aapoŋor, Emoru da loka etogo eraun kwape aiboisio nuiukekeete nuka amoni.’

¹⁹ Kebu kereka Kesekia ekabaka loka Yuda, ka Yuda kere, kotamakis aiar? Mam abu koyoŋ EJAKAIT, kiŋaiŋa asianut naka EJAKAIT, kiitu EJAKAIT ainyein aronis nakinerakinit? Kwaŋin tikiidiaka oni ikulepek kotauonowok.”

²⁰Ido da kojai etuŋanan loadwarit kokiror loka EJAKAIT, Uria okoku loka Semaia loka Kiriat-yearim. Abu ŋol da kodwarak ere lo ka akwap na kwape ejaatar akiro ŋun kere nuka Yeremia.

²¹ Nakiiraria ekabaka Yekoiakim ka iketuŋa lukirigin kere ka ikapolok kere akekiro, kokoto ekabaka aiar ŋes: konye kiira Uria, kokurianar, koker, kolot Misiri.

²² Kijuka ekabaka Yekoiakim ituŋa Misiri, Elunasan okoku loka Akubor, ka icetuŋa nepepe kaŋes,

²³ koomai Uria koMisiri, koyaunai mama ejai ekabaka Yekoiakim koara ŋes kekileŋ, kocakak akekuan ailin nuka ituŋa kere.

²⁴ Konye akan naka Akikam okoku loka Sapan kojai nepepe ka Yeremia, kinyeis ainakin akan naka ituŋa aiar ŋes.