Read Ebaibuli 1961 Yeremia 30 Bible Online

Yeremia 30 - Ebaibuli 1961 bible

Yeremia 30

¹Akirot naka EJAKAIT naabu kobu mama ejai Yeremia ebe:

² “Inera kwanata EJAKAIT, Edeke loka Isirael ebe: Kiwadik akiro kere nuka pukokini toma oitabo.

³ Naarai koany, ebala EJAKAIT ebe, Epote apaarasia, nuenyakunia aijoreorio naka ikatuŋa Isirael ka Yuda. Ebala EJAKAIT ebe, Etoboŋuni kes akwap nakolo ainakini lukapapaakec, ido irumete.”

⁴Nu kes akiro nuabu EJAKAIT kiner nuka Isirael ka nuka Yuda da:

⁵“Inera EJAKAIT kwanata ebe: Kiira oni eporoto loka amaran, Loka aiyoŋ, kwabo mere loka ainapakin.

⁶Kiŋitata cani, koanyut, Epedori kereka ekiliokit aidoun? Kanukinyo do aanyunia ŋollikiliokit itiŋit aŋabet, Bala aberu nairieba aidoun? Kanukinyo elocokinor ejese loka akonyen kere?

⁷ Wu okwe! Naarai epol apaaran ŋin, mam naeputotor: Ŋes apak naanyunia Yakob ican; Konye itajario kamakec.

⁸“Kosodi kanen ebala EJAKAIT loka ajoresio ebe, Kapaaran kaŋin, abili akeiookot komurisiŋikon, ido aŋedeŋedei lukiyenitere; mam bobo imo itubusianete.

⁹ Konye ijaanakinete kesi EJAKAIT Ekecedeke, ka Daudi ekabakakec, loetonyoikini.

¹⁰ “Ebala EJAKAIT ebe, Aso sirikiyoŋ, ijo Yakob ekejaanakinanika; Ido sirikiyaloŋoŋ, ijo Isirael; Naarai koany, ketajari jo kama elwana, Ka akoniwur da kakwap naka aijoreoriokec; Eboŋuni Yakob, iyamakin do inapakin, Emameun da yenitukuriani.

¹¹Naarai ebala EJAKAIT ebe, Ajai eoŋ nepepe kajo, aitajar jo: Naarai adauni cut atekerin kere nukesiarakinit, Konye jo mam kadauni cut; Konye kaleconori jo motimot, Kwabo mam kenyeini cut komam keticanenenei.

¹² “Naarai inera EJAKAIT kwanata ebe: Mam ariebokon eŋaleuni, Eiliili amusuŋutukon.

¹³Emamei yenikipurokini, tetere kimadio; Emamei jo ekia loitaŋaleuni.

¹⁴ Kimurwokis ipaelonokon kere; mam kimoete; Naarai kecum jo amusuŋut naka lokasurup, Kaiticanet naka loibworit; Kanuka aipues naka numam adolitekon, Naarai eyatakina aronisiokon.

¹⁵Imonyi inyo kanuka ariebokon? Mam icanikon edaunos; Kanuka aipues naka numam adolitekon, Naarai eyatakina aronisiokon, Ŋes kainakin keswamakini ŋun.

¹⁶ Kanuka ŋun ejwenyario ŋul kere lukijwenyarete jo: Ijoreorio da lukasurupokon kere, ŋinidiopet kakesi; Ŋul da lukiŋasete, eraunete iŋatuna, Ŋul da kere lukimejaete akorakini araut imejasit.

¹⁷ Ebala EJAKAIT ebe, Naarai kenyakakini jo aijar, Ido etaŋaleuni akonimusuŋun; Naarai kinyarito yenereŋearitai, ebe: ‘Ŋes Sion, yenimam epodoi.’

¹⁸ “Inera EJAKAIT kwanata ebe, Koany, enyakuni bobo aijoreorio naka iweman luka Yakob, Etimi itogoike; Edukio bobo ere amejeke, Esali ere loka ekabaka kwape ejaar ekepone.

¹⁹ Kanen elomuni aimal ka eporoto loka ŋul kaluikekemosi; Esupui kes, kwabo mam ikidiokoros; Ido etopoloori kes, Kwabo mam itidisiario.

²⁰ Ejaunete ikecedwe kwape kolo sek, Iticasio ekecekodet kamaka, Eticani kere luereito kes.

²¹ Eseunete lokapolonikec katekerikec, Elomuni ekayaitonikec kotomakec; Ebala EJAKAIT ebe, Esukunyikini ŋes, ŋes da kekunyakini: Naarai iŋai tope etitiŋikini eketau aikunyakin eoŋ?

²²Iraunos ikatuŋa, Eoŋ da araun Ekusideke.”

²³ Koany, alomu etapipirio loka EJAKAIT, Ŋes adedeŋuke, etapipirio loipiripiritoi: Edoikini akou naka ikaronon.

²⁴Mam eboŋuni anyunyura naka EJAKAIT, Aitodol naedaunia akeswam, Kiton aitodolikin nuelosikinit etauke. Apaarasia nukawasia ijenunete jokan.