Read Ebaibuli 1961 Yeremia 31 Bible Online

Yeremia 31 - Ebaibuli 1961 bible

Yeremia 31

¹“Inera EJAKAIT ebe, Kapaarasia kaŋun, araun Edeke loka ikekia kere luka Isirael, kes da eraunete ikatuŋa.”

² Inera kwanata EJAKAIT ebe: “Ituŋa luedeunos kokileŋ adumut asianut kamodiŋ; Naalosio aisiyeŋuun Isirael.

³ Abu EJAKAIT ketakanikin kolosek, ebe, Eebo, kekilakina jo kamin namam edaun; Ŋes keriunia jo kasianut-nakamin.

⁴Kaduki jo bobo, jo da kidukio, Ijo abekot naka Isirael: Kisirio bobo kaisinin, Ilomari da toma okosio loka ŋul kaluibwalito.

⁵ Iraikini bobo imanikoria luka emusabibu koroŋan luka Samaria; Iraete ikeraak, konyama araitoke.

⁶ Naarai edoluni apaaran, naiworooto ikedarak koukon luka Epuraim ebe, ‘Konyoutu, kadokasi Sion neejai EJAKAIT Edekewok.’ ”

⁷ Naarai inera kwanata EJAKAIT ebe: “Koyooto kaiyalama kanuka Yakob, Koboorianata kanuka nakapolon naka atekerin; Kolimosi, kituroto, kinerasi atiar, ‘Etajar EJAKAIT iketuŋa, aatoŋot naka Isirael.’

⁸ Koany, alemuni kes kotoma akwap nakari naka agolitomei, Atukokini kes anyoun kawaitin nuka akwap, Nepepe kaŋul da imuduki ka iŋwalas, Aberu naepotiei, Nepepe kaŋin da naerieb aidoun: Eboŋunete ne, erioŋet loepol.

⁹ Epote emonyete, ido eŋarenikini kes kemaimaite; Etolosi kes kariri nuka aguuruto nuka akipi, Korot Ioitenara lomam iguikinotor: Naarai arai eoŋ papa mama ejai Isirael, Epuraim da ŋes ekiyaika.

¹⁰ “Kiirasi akirot naka EJAKAIT, yes atekerin, Kolimokis apujana nuelwaka; Kineras atiar, ‘ŋol loesiarari Isirael, ŋes erukonokini, Kidari, kwape idaria ekecokon esipanike.’

¹¹ Naarai alaku EJAKAIT Yakob, Ayuu alemun kakan naka ŋol kaloetelekarit kagogoŋ.

¹² Aso epote koyooto kaidi naka Sion, Ido ikomaunos neejai ajokis naka EJAKAIT, Neejaas akima, ka ajon, ka akinyet, Ka ikaalei ka itak da lukosipan; Eraun etaukec da kwape emanikor loicocoo akipi; Kwabo mam bobo itururuete cut.

¹³Kosodete iyalamikinos abekon kotoma okosio, Itelepai ka imakio da nepepe: Naarai etuluori akuudianakec aiyalama, Ido etalakari kes, kesiyalamik da kinyeis aiturur.

¹⁴Ebala EJAKAIT ebe, Esititirikini da etau loka isasedotin kasiepai, Ikatuŋa da imonikinos ajokisika.”

¹⁵ Inera kwanata EJAKAIT ebe: “Eirar eporoto koRama, Akuudian, ka aibworo naepol, Emonyi Rakel ikedwe; Egirit aitalakario kanuka idweke, Naarai emameete.”

¹⁶ Inera kwanata EJAKAIT ebe: “Kisililiŋ ekoniporoto kinye aibworo, Akonikonyen da komameut akiyo. Naarai ebala EJAKAIT ebe, Idumuni ainakinet kanuka akoniswam; Ido eboŋunete bobo anyoun kakwap naka lokasurup.

¹⁷Ebala EJAKAIT ebe: Ejai amuno awasiakon, Eboŋunete da bobo ikonidwe bukec.

¹⁸ Abeit eira Epuraim emonyi ebe, ‘Kilecoo, kalecorio, Kwape itaok yenimam enaikinit ajookot: Kibelokinoi, eoŋ da ebelokin, Naarai irai ijo EJAKAIT Ekadeke.

¹⁹ Abeit naadaunia aisibelokinio, kesila; Ido kadau aisisianakinio, kebap akamurwo: Apotu keruma ileic, eebo, abu ketirir, Naarai abu kadaku amorosit naka eiditeuka.’

²⁰ Ebala EJAKAIT ebe: Erai kereka Epuraim ikakoku yeniminat? Erai ŋesi ikoku yenikesiyalamikinit? Naarai napenerakinia aronis, Ariŋa eitununei ŋes. Aso epod etauka ŋes; Abeit etimenenei.

²¹ “Kosipok aanyuneta nuka erot, Kiswamau ipirin luitejenunete, Kibwaik ekonitau neejai erot lokapolon, Ŋes erot loilomaria: Koboŋu, wu abekot naka Isirael, Koboŋu bobo oreriakon lu.

²² Itodoli bo ai airim, Wu jo akoku naiboŋonori kau? Naarai esubit EJAKAIT akirot nakitetet kotoma akwap, Igalikinit aberu ekiliokit.”

²³ Inera kwanata EJAKAIT loka ajoresio, Edeke loka Isirael atiar: “Ejauni rwaru bobo einer lo kakwap naka Yuda koreriake da, naenyakunia kaijoreoriokec atiar: ‘Kisirereŋ EJAKAIT, ijo aibois naiboio abeit, Ijo eroŋat loka alaunit.’

²⁴Ido iboikin Yuda nen nepepe ka ikereria kere; ikakoriok, ka ŋul da luirimete kisipaninikec.

²⁵Naarai esimonik etau loepasit, esileleb da ŋolitau loitururwei.”

²⁶Kasodi konyet akwenyun, kaany; kajijimikis akajo.

²⁷ Ebala EJAKAIT ebe, “Koany, epote apaarasia, nuayeikinia ekek loka Isirael ka ekek loka Yuda ekinyomit loka etuŋanan ka ekinyomit loka etiaŋ.

²⁸ Ebala EJAKAIT ebe, Kosodi kanen ejaun kwape kolo keteononoo kes arutun ka abilibil ka aibiror ka amudiar ka aitican; kwape kwaŋin eteenenei kes aiduk ka aira.

²⁹ Kapaarasia kaŋun mam bobo ineras atiar, ‘Anyama lukapapa imusabibun luedwarak, Ido aliokos ikel luka idwe.’

³⁰ Konye etwani ŋinituŋanan kanuka akeronis ilopet; ŋinituŋanan yenenyami imusabibun luedwarak, eliokos ikekel.”

³¹ Ebala EJAKAIT ebe, “Koany, epote apaarasia, nuetutukio aitutuket nakitetet kekek loka Isirael ka ekek loka Yuda.

³² Ebala EJAKAIT ebe, Mere kwape ejaar aitutuket nakolo etutuki ka lukapapaakec kapaaran naketiŋia kakan aitonyoun kakwap nako Misiri: apotu kobilata aitutuket ŋin karaida abu karai lokowaikec.

³³ Konye ebala EJAKAIT ebe, Na ŋes aitutuket naetutuki rwaru kekek loka Isirael, akaulo kapaarasia kaŋun: epikakini rwaru ikakisila atutubetakec nukotoma, ewadikakini da otauonokec; eoŋ da araun Ekecedeke, kes da eraunos ikatuŋa.

³⁴ Kwabo mam bobo isisianakinos ŋinituŋanan ikeidunyet, ka ŋinituŋanan onaceke, kobalas ebe, ‘Kojen EJAKAIT:’ naarai ebala EJAKAIT ebe, Kajenunete rwaru kere, ameun ka yenididi aitodol yenikapolon kakesi, naarai etimi kes numam adolitekec, ido mam bobo eituni akecediakar.”

³⁵ Inera kwanata EJAKAIT, Loeinakini akoloŋ acaenen paaran, Ka aicorakineta nuka elap ka aacer acaenen kuare, Loigurokin aŋolol, kirurumata akekailan: EJAKAIT loka ajoresio ŋes ekekiror, ebe:

³⁶ “Ebala EJAKAIT ebe, Arai kenyout aicorakineta ŋun kakonyeneka, Aso esaŋi aur naka Isirael da, Komam erai ateker kakonyeneka ikar kere.”

³⁷ Inera kwanata EJAKAIT atiar: “Arai epedor akuj naejai kokuju aitemio, Ido arai epedorete apeteta nuka akwap amoio kokwap, Ebala EJAKAIT ebe, Aso acakari eoŋ da aur kere naka Isirael Kanuka ŋun kere nukiswamaete.”

³⁸ Ebala EJAKAIT ebe, “Koany, epote apaarasia, nuedukokinere EJAKAIT ere lo ageun kotogo loeoja loka Kananel aitodol orute loka Agor.

³⁹ Iriario auno nakitemis idererei kiton moru Gareb, iriamari da kiton Goa.

⁴⁰ Aditot kere da naka awat nuka lukatwak, ka ekurwon, ka imanikoria kere kiton aguurut Kiduron, kiton agor naka erute loka Ibalasin kokide, eraun nakalaunan kama ejai EJAKAIT. Mam erutorio, karaida amunaar bobo ikar kere.”