Read Ebaibuli 1961 Yeremia 32 Bible Online

Yeremia 32 - Ebaibuli 1961 bible

Yeremia 32

¹ Akirot naka EJAKAIT naabu kobu mama ejai Yeremia kokaru lokitomonet loka Sedekia ekabaka loka Yuda, ŋes ekaru lokitomonet kakanykauni loka Nebukadanesar.

² Kapak kaŋin abu ajore naka ekabaka loko Babulon kirigau Yerusalem: koenitete enabi Yeremia kalaro naka ikedarak, naajai togo loka ekabaka loka Yuda.

³ Naarai Sedekia ekabaka loka Yuda, ŋes aenit, kobala ebe, “Kanukinyo kidwaria, kinera ebe: ‘Inera EJAKAIT kwanata ebe: Koany, ainakini ere lo akan naka ekabaka loko Babulon, ŋes da irumi:

⁴ mam ekui Sedekia ekabaka loka Yuda kakan naka Ikaludean, konye abeit einakinio akan naka ekabaka loko Babulon, ineras kaŋes kaituke, eanyunete akekonyen akonyen nuka ŋol.

⁵ Ido eyaŋaari Sedekia Babulon. Ebala EJAKAIT ebe, Iboie kaŋina aitodol naaanyanaria: karaida kijioto ka Ikaludean mam kisirereŋio’?”

⁶Kotema Yeremia atiar, “Abu kobu akirot naka EJAKAIT mama ajai ebe.

⁷ Koany, ebuni Kanamel okoku loka Salum mamaikon mama ijai ebala ebe, ‘Kogwel emanikorika loejai Anatot: naarai kibeit ijo apedor naka alakun.’

⁸ Kosodi do Kanamel okoku loka mamaika kobu mama ajai alaro naka ikedarak, kwape kejaar akirot naka EJAKAIT, kobala ebe, ‘Keŋaiŋait, kogwel emanikorika loejai Anatot, loejai akwap naka Benyamin; naarai airum nakon, ka alakun da nakon; kogwel ijo bon.’ Kasodi eoŋ ajenun ebe ŋin ŋes akirot naka EJAKAIT.

⁹ “Kagwel emanikor lokejai Anatot kama ejai Kanamel okoku loka mamaika, ketemok apesan, isekelin itomon kakanykaarei luka epuesa.

¹⁰ Kewadika akiro, kepucak, keworou ikajenak, ketemok ŋes epuesa kaitemis.

¹¹Kalema aiwadikaet naepucakinitai naka egwelet, ya nakibwaikinitai aipucet, kwape kejaar ekisil ka epone, ka ace da naepukoro:

¹² kejaik aiwadikaet naka egwelet Baruk okoku loka Neria, okoku loka Maseia, koseseni Kanamel okoku loka mamaika, kosesenete da ikajenak luewadikaete aiwadikaet naka egwelet, kakonyen nuka Iyudayan kere luiboiete kalaro naka ikedarak.

¹³Kecorak Baruk kakonyenekec, kabala ebe,

¹⁴‘Inera kwanata EJAKAIT loka ajoresio, Edeke loka Isirael ebe: Kolema aiwadikaeta nu, aiwadikaet na naka egwelet naepucakinitai, ka aiwadikaet na naepukoro, kibwaik amot nakelupe; tetere edaunete apak naepol.

¹⁵Naarai inera kwanata EJAKAIT loka ajoresio, Edeke loka Isirael ebe: Egwelio bobo itogoi ka imanikoria luka emusabibu kakwap kana.’

¹⁶ “Ido kadau aijaikin Baruk okoku loka Neria aiwadikaet naka egwelet, abu kelip EJAKAIT ebe:

¹⁷ ‘Wu okwe EJAKAIT Edeke! Koany, ijo kisubi akuj ka akwap kapedorikon naepol, ka akanikon naerioro, emamei adiokirot nakikaruni jo:

¹⁸ loitimenenei ilukumin luka ituŋa, itacakini atorobusio nuka idwekec luetupakinete numam adolito nuka lukapapakec: Edeke lokapolon, lokapedor, EJAKAIT loka ajoresio ŋes ekekiror;

¹⁹ Ekapetan lokapolon, lokapedor aswam: esesenete akekonyen irotin kere luka ituŋa; ainakin ŋinituŋanan kwape ejaatar irotinike, ido kwape ejaatar araito nuka aswamisioke;

²⁰ loibu kibwaik aanyuneta ka nukaumokin toma akwap nako Misiri, kiton lolo, kotoma Isirael ka ituŋa da; kodumunia ekiror kwape lolo.

²¹ Kitolom ikonituŋa Isirael kotoma akwap nako Misiri, kaanyuneta ka nukaumokin, kakan nakagogoŋ, kakan da naerioro, ketasuro loepol;

²² koinak akwap na, nakiyapoikinit lukapapaakec ainakin, akwap naeleleete akile ka esik.

²³ Kolomut kirumata; konye mam apotu korimasi ekoniporoto, karaida alosenen kokisilakon; mam eswamaete adiokirot kotoma kaŋun kanuicorakinit kes aswam; ŋes ainakini iyauni aronis na kere mamakec.

²⁴ Koany, adolut itutio ore airum; ainakin ere akan naka Ikaludean luitijiete, kanuka ekileŋ, ka eteŋei, ka atular da; adolo nuibu kiner; ido koany, iany.

²⁵Ido wu EJAKAIT Edeke, ibu kolimok eoŋ ebe, “Kogwelu amana kapesan, konyarau ikajenak”: kwabo ere da ainakin akan naka Ikaludean.’ ”

²⁶Kosodi kobu akirot naka EJAKAIT mama ejai Yeremia ebe:

²⁷ “Koany, arai eoŋ EJAKAIT, Edeke loka luejaas awat kere: ejai kereka adiokirot nakekaruni?

²⁸ Ŋes ainakin EJAKAIT inera kwanata ebe: Koany, ejaikini ere lo akan naka Ikaludean, akan da naka Nebukadaresar ekabaka loko Babulon, ido irumi ŋes.

²⁹ Ikaludean da, Iuitijiete ere lo, epote inokokinete ere lo, icweikinete, ka itogoi da lukisupurionokiniata Baal lukisupurununo kokujukec, kobukonokinete icedekesio ainakineta numatan, aitunyunyurikin eoŋ.

³⁰ Naarai apotu idwe luka Isirael, ka idwe luka Yuda kiswamata nueroko bon kakonyeneka, ameun keiditeukec. Ebala EJAKAIT ebe, Mam apotu idwe luka Isirael kiswamata idiobore kakaninikec cut dimarai yenikaitunyunyurikin eoŋ.

³¹ Naarai ketunyunyuranakini ere lo ka aisideden ameuni kapaaran naadukere kiton lolo; ŋes do acakaria kakonyeneka.

³² Kanuka aronis kere naeswamaete idwe luka Isirael ka idwe luka Yuda aitunyunyurikin eoŋ, kes ka ikabakanakec, ka ikapolokokec, ka isasedotinikec, ka inabinokec, ka ituŋa luka Yuda, ka luiboiete da kotoma Yerusalem.

³³ Kebelokis asebot kwabo mere akonyen; ido karaida kesisianakinit kes, adilonokin tupuruc aisisianakin, konye mam kiirara karaida acamun aisisianakinio.

³⁴ Konye ebwaikis italesiakec toma togo loenyaritai ekakiror, amunaasi da.

³⁵ Adukoto aiboisio nuiceleleete nuka Baal, nuejaas aditot naka okoku loka Kinom, aitotor ikecesap ka akecepesur akim mama ejai Molek; numam ecorakinit, mam da aomisioitike alomarit otauka aswam nuketale ŋun: aisidiakar Yuda.

³⁶“Aso do inera kwanata EJAKAIT, Edeke loka Isirael nuka ere lo loineras yesi ebe, ‘Einakinitai akan naka ekabaka loko Babulon kanuka ekileŋ, ka eteŋei, ka atular da,’ ebe:

³⁷ Koany, atukonokini kes aitonyoun kakwapin kere nukereŋearit kanuka anyunyuraka ka akadedeŋ, ka adwaris naeta ria; ido enyakuni kes bobo aibois na, kesiboik inapakina.

³⁸ Eraunos kesi ikatuŋa, eoŋ da araun Ekecedeke.

³⁹ Ainakini etau ediopet ka erot ediopet, kayonenenete eoŋ apaarasia kere; tetere ejaunete ejok, kes ka ikecedwe da luetupanakinete.

⁴⁰ Ido etutuki kakes aitutuket namam edaun, komam ebelokini ainyein aiswamanakin kes ajokis, ebwaikin ayoŋit eoŋ otauonokec, kenyeis aijal.

⁴¹ Eebo, esiyalamikini aiswamanakin nuejok, ido abeit, eraikini kes akwap na kekatau kere, ka akaijar kere.

⁴² “Naarai ebala EJAKAIT kwanata ebe, Kwape ayaunia aronis na kere naepol otuŋa lu, kwape kwaŋin ainunia kes ajokis kere naesumunit.

⁴³ Egwelio imanikoria kakwap kana, nainerasi yesi ebe, Esil, emamei etuŋanan karaida etiaŋ; einakinitai akan naka Ikaludean.

⁴⁴ Egwelete ituŋa imanikoria kanuka apesan, iwadikaete aiwadikaeta, ipucete kes aipuceta, enyaraunete ikajenak, kakwap naka Benyamin, kotoma aiboisio nuidunyas Yerusalem, ka oreria da luka Yuda, kotoma oreria luka akwap nakiukon, kotoma oreria luka apuutona, koreria da luka Eŋalakimak; naarai ebala EJAKAIT ebe, Etoboŋuni aijoreoriokec.”