Read Ebaibuli 1961 Yeremia 33 Bible Online

Yeremia 33 - Ebaibuli 1961 bible

Yeremia 33

¹ Kobu akirot naka EJAKAIT irwan nakiareit mama ejai Yeremia, eroko eenitai kalaro naka ikedarak ebe:

² “Inera kwanata EJAKAIT loiswamai, EJAKAIT lokesubi aiticat, EJAKAIT ŋes ekekiror, ebe:

³ Konyarai, eoŋ da kaboŋokini, kapukok nukapolok, ka nuetioko, numam ijeni.

⁴ Naarai inera kwanata EJAKAIT, Edeke loka Isirael, nuka itogoi lukore kalo, ido nuka itogoi luka ikabakan luka Yuda, luaponi kotiyanakinai adukio aigalioret aitikokinia itutio, ka ekileŋ, ebe:

⁵Elomunete Ikaludean ejie, ka aileleb kes kawat nukatwak nuka ituŋa, luadanyi kakanyunyura ka akadedeŋ, naarai ebwa akakonyen kore kalo kanuka aronisikec kere.

⁶ Koany, ainuni aijar ka aitaŋaleunio, eoŋ da etaŋaleuni kes; ido apukokini ainapakin ka abeit nuepolok noi teni.

⁷ Enyakuni aijoreorio naka Yuda, ka aijoreorio naka Isirael, aduki, kwape sek.

⁸ Ido elotari numam adolitekec kere, nukediakanariata kama ajai; esioniei numam adolitekec kere, nukediakanariata kama ajai, nukepaariata kama ajai.

⁹ Ere lo da eraun kama ajai ekiror loka ailel, loka aiturit, loka aibuses da, kakonyen nuka atekerin kere nuka akwap, nuiirarete ajokis kere naeswamak, koyoŋa, komaranata kanuka ajokis kere, ka ainapakin kere nuadumakini ŋes.

¹⁰“Inera EJAKAIT kwanata ebe: Toma aibois na nainerasi yesi ebe, ‘Eswap, emamei etuŋanan karaida etiaŋ,’ koreria luka Yuda, korotin da luka Yerusalem luesilok, emamei etuŋanan, emamei yeniboie kotoma, emamei da etiaŋ,

¹¹ iirario bobo eporoto loka ailel ka eporoto loka aiyalama, eporoto loka eteran, ka eporoto da loka ateran, eporoto loka ŋul luinerasi ebe, ‘Kimalata EJAKAIT loka ajoresio, Naarai ejok EJAKAIT, Naarai ejaenena akeitim ikar kere’; ido eporoto loka ŋul lueyaunete asuban nuka aimal toma togo loka EJAKAIT, Naarai ebala EJAKAIT ebe, enyakuni bobo aijoreorio naka akwap kwape sek.

¹² “Inera kwanata EJAKAIT loka ajoresio ebe: Toma aibois na, naeswap, naemamei etuŋanan, karaida etiaŋ, koreriakec kere, ejaun bobo aibois naka ikecokok luituwuriakete ikecesipanin.

¹³ Ebala EJAKAIT ebe, Itorete bobo isipanin akanin nuka ŋol loimari kes, koreria luka akwap nakiukon, koreria luka akwap naka apuutona, koreria luka Eŋalakimak, kakwap naka Benyamin ka aiboisio nuidunyasi kaYerusalem, koreria da luka Yuda.

¹⁴ “Ebala EJAKAIT ebe, Koany, epote apaarasia nuetodolikinio akirot ŋin naejok naabu kener nuka ekek loka Isirael, ido nuka ekek loka Yuda.

¹⁵ Kapaarasia kaŋun, kapak kaŋin, etilibikini Daudi Atenut naka adolit; ido itodoli ŋol nuketube ka nukadolit kakwap.

¹⁶ Kapaarasia kaŋun itajario Yuda, Yerusalem da iboie inapakina; lo da ŋes ekiror loemaikinio ebe, ‘EJAKAIT ŋes akosidolit.’

¹⁷ “Naarai inera EJAKAIT kwanata ebe: Mam emamikini Daudi ekiliokit loiboikin oicoloŋ loka ekek loka Isirael ikar kere.

¹⁸ Ido mam emamikini isasedotin Ilebin ekiliokit kakonyeneka loeinanakini ainakineta nuicweio, aicwe ainakineta nuka akiria, ka ainanakin asuban tir.”

¹⁹Kobu akirot naka EJAKAIT mama ejai Yeremia, kobala ebe:

²⁰ “Inera EJAKAIT kwanata ebe: Arai ipedorete aibil akaitutuket naka apaaran, ka akaitutuket naka akuare, kinye ajaun apaaran ka akuare kapakikec;

²¹aso epedori akaitutuket abilio nakolo kitutuki ka Daudi ekakejaanakinan, kinye ajaun kikoku yenirumi koicoloŋoke; ka akaitutuket da nakitutuki ka Ilebin isasedotin, ikakejaanakinak.

²² Kwape ajore naka akuj mam epedori aimario, asine da naka aŋolol aitemio; kwape kwaŋin etanyanyaa aur naka Daudi ekakejaanakinan, ka Ilebin lukejaanakinete.”

²³Kobu akirot naka EJAKAIT mama ejai Yeremia kobala ebe:

²⁴ “Mam kereka iwomoomoi nuenerata ituŋa lu ebe, ‘Acaka EJAKAIT ikekia iarei luaseunit’? Amenata kwaŋin ikatuŋa, kinyeis bobo araun ateker kakonyenekec.

²⁵Inera EJAKAIT kwanata ebe: Arai mam icasit kakaitutuker naka apaaran ka akuare, arai da mam ebwaikinit aicorakineta nuka akuj ka akwap,

²⁶ aso acakari aur naka Yakob, ka naka Daudi ekakejaanakinan, kenye ayaŋaar kaurike airum aur naka Aburaam ka Isaak, ka Yakob da; naarai enyakuni bobo aijoreoriokec, ido etimi kes.”