Read Ebaibuli 1961 Yeremia 36 Bible Online

Yeremia 36 - Ebaibuli 1961 bible

Yeremia 36

¹Kosodi kanen kokaru lokiwoŋonet loka Yekoiakim okoku loka Yosia, ekabaka loka Yuda, kobu akirot naka EJAKAIT mama ejai Yeremia atiar:

² “Koyaŋa anunuket naka eitabo, kiwadika toma akiro kere nuabu kalimok jo aluikin Isirael, ka Yuda, ka atekerin kere, ameun apaaran nakenerar kajo, ameun kapaarasia nuka Yosia, kiton lolo.

³ Motoko iirari ekek loka Yuda aronis kere naalosikinit aiswamakin kes; kibelokinos ŋinituŋanan ainyein ekerot loerono, kesioni numam adolitekec ka aronisikec.”

⁴ Kosodi konyarau Yeremia Baruk okoku loka Neria, Kiwadik Baruk toma anunuket naka eitabo akiro kere nuka EJAKAIT, nuekopuni kaituk naka Yeremia nukelimonokinitai.

⁵Kicorak Yeremia Baruk atiar, “Kaenitai; mam apedori alosit togo loka EJAKAIT.

⁶ Aso kolot ijo, kosiom nuka anunuket, nuiwadikat kaitukuka, akiro nuka EJAKAIT kaki nuka ituŋa kotogo loka EJAKAIT apaaran naka ailuŋ: isiomi da kaki nuka ituŋa kere luka Yuda, luelomunete koreriakec.

⁷ Motoko edolokini ailipikec EJAKAIT, ibelokini ŋinituŋanan ainyein ekerot loerono: naarai epol anyunyura ka adedeŋ naka EJAKAIT, naenerit ŋesi mama ejaas ituŋa lu.”

⁸Kiswama Baruk okoku loka Neria kere nuecorakinit enabi Yeremia, kosiom kotoma oitabo akiro nuka EJAKAIT kotogo loka EJAKAIT.

⁹ Kosodi kanen kokaru kalokikanyet loka Yekoiakim okoku loka Yosia, ekabaka loka Yuda, kolap kalokikanyetekaonon, apotu ituŋa kere luko Yerusalem, ka ituŋa da kere luapote Yerusalem anyoun koreria luka Yuda kolimosi ailuŋ kakonyen nuka EJAKAIT.

¹⁰Kosodi kosiom Baruk kotoma oitabo akiro nuka Yeremia kotogo loka EJAKAIT kagola naka Gemaria okoku loka Sapan ekewadikan, kalaro nakokuju, kariri kerute lokitetet loka etogo loka EJAKAIT, kaki nuka ituŋa kere.

¹¹Kepupu Mikaia okoku loka Gemaria, okoku loka Sapan, akiro kere nuka EJAKAIT kotoma oitabo,

¹²kijesar togo loka ekabaka, toma agola naka ekewadikan; ido koany, kiboiete kanen ikapolok kere: Elisama ekewadikan, ka Delaia okoku loka Semaia, ka El-natan okoku loka Akubor, ka Gemaria okoku loka Sapan, ka Sedekia okoku loka Kanania, ka ikapolok da kere.

¹³Kitejen Mikaia akiro kere nukiirari, naasiomia Baruk eitabo kaki nuka ituŋa.

¹⁴ Kosodete ikapolok kere kiyakias Yekudi okoku loka Netania, okoku loka Selemia, okoku loka Kusi, mama ejai Baruk ebalas ebe, “Kolem anunuket na nan isiomi kaki nuka ituŋa, kobu.” Kosodi Baruk okoku loka Neria kolem anunuket, kolot neajaas.

¹⁵Kolimokis ŋes ebe, “Aso kiboikin, kosiom kakiikosi.” Kosiom Baruk kakiikec.

¹⁶ Kosodi kanen, kiirasi akiro kere, koŋolianakinos kanuka akurian, kotemasi Baruk atiar, “Kibusakinit aitejenun ekabaka akiro ŋun kere.”

¹⁷Kiŋita Baruk kobalas ebe, “Aso cani kolimokinai, kiwadikai biai akiro nu kere? Ikopuni kereka ijo kaitukuke?”

¹⁸ Kosodi Koboŋok Baruk ebe, “Kalimonokini ŋesi eoŋ akiro ŋun kere kaitukuke, kewadikai eoŋ toma oitabo kebwino.”

¹⁹Kosodete ikapolok alimokin Baruk ebe, “Kolot, koŋopa diidi, ijo ka Yeremia; sirikejenu ituŋanan neijaas.”

²⁰Kolomasi alaro mama ejai ekabaka; konye kiŋadakinito anunuket togo loka Elisama ekewadikan; kitejenut ekabaka akiro kere.

²¹Kosodi ekabaka kijuka Yekudi aomare anunuket: kolem kotoma agola naka Elisama ekewadikan, Kosiom Yekudi kaki nuka ekabaka, kaki da nuka ikapolok kere luabwoete aapu kekabaka.

²² Kiboie ekabaka kotogo loka aiporo olap lokikanyetekaoŋon, kojai da ekiala kinokokitete akim kakonyeneke.

²³ Kosodi kanen, naesiomia Yekudi apapulai auni arai aoŋon, kotubutubei ekabaka kekileŋ, kocakanakini akim nakokiala, kiton needoporia anunuket kere kotoma okiala.

²⁴ Konye mam apotu koyoŋa, karaida acilicil ikecenapen, ekabaka, karaida ikekejaanakinak kere lueiraritos akiro ŋun kere.

²⁵ Karaida apotu El-natan ka Delaia ka Gemaria kiŋaiŋaata ekabaka ainyein aicwe anunuket; konye koŋer apupun kes.

²⁶ Kicorak ekabaka Yerameel okoku loka ekabaka, ka Seraia okoku loka Asuriel, ka Selemaia okoku loka Abudeel, aikamun Baruk ekewadikan ka enabi Yeremia; konye kibwa EJAKAIT kes di.

²⁷ Kosodi kobu akirot naka EJAKAIT mama ejai Yeremia, kedau ekabaka aicwe anunuket, ka akiro nuewadikat Baruk kaituk naka Yeremia atiar:

²⁸“Koyaŋa bobo acenunuket, kiwadika tomake akiro kwa kere nusek nuajaas toma anunuket nasodit, naecwei Yekoiakim ekabaka loka Yuda.

²⁹ Inera nuka Yekoiakim ekabaka loka Yuda ebe, ‘Inera EJAKAIT kwanata ebe, Icweik anunuket ŋin, kobala ebe, “Kanukinyo kiwadikaa kotomake ebe, abeit ebuni ekabaka loko Babulon, amunaar akwap na, ido itanaŋi kanen etuŋanan ka etiaŋ?”

³⁰ Kanuka ŋun inera kwanata EJAKAIT nuka Yekoiakim ekabaka loka Yuda ebe, Emameun ituŋanan yeniboikini oicoloŋ loka Daudi. Ecakario akuanake nakatwan kiŋa neejai amwanis paaran, ka aterot da kuare.

³¹Eticani eoŋ ŋes ka akeur ka ikekejaanakinak kanuka numam adolitekec; ayaun mamakec, ka neejaas luiboiete koYerusalem, ka neejaas ituŋa luka Yuda, aronis kere naabu kenerak kes, konye mam apotu kopuput.’ ”

³² Kosodi kolem Yeremia anunuket ace, koinak Baruk ekewadikan, okoku loka Neria; kiwadika ŋesi tomake kaituk naka Yeremia akiro kere nukoitabo loecwei Yekoiakim ekabaka loka Yuda: kiyatakinai tomakec akiro nuipu kwape kakwa.