Read Ebaibuli 1961 Yeremia 37 Bible Online

Yeremia 37 - Ebaibuli 1961 bible

Yeremia 37

¹ Kirum Sedekia okoku loka Yosia ekabaka, aibois naka Konia okoku loka Yekoiakim, loesurumi Nebukadaresar ekabaka loko Babulon akwap naka Yuda.

² Konye mam ŋes, ka ikekejaanakinak, ka ituŋa luka akwap, mam apotu kiirasi akiro nuka EJAKAIT nuenera kama ka Yeremia enabi.

³ Kijuka Sedekia ekabaka Yekukal okoku loka Selemia, ka Sepania esasedoti, okoku loka Maaseia, mama ejai enabi Yeremia, atiar, “Kilipakinai kama ejai EJAKAIT Edekewok.”

⁴Ido kolomanari Yeremia kolomununei da otuŋa: naarai aroko egolokino aenis.

⁵ Kelomunit ajore naka Parao anyoun ko Misiri: nakiirariata Ikaludean luerigaunito Yerusalem akirokec, konyout koYerusalem.

⁶Kosodi kobu akirot naka EJAKAIT mama ejai enabi Yeremia, kobala ebe:

⁷ “Inera kwanata EJAKAIT, Edeke loka Isirael ebe: Ilimokini kwanata ekabaka loka Yuda, lokiijukunit jo aiŋit eoŋ, ebe, ‘Koany, eboŋori ajore naka Parao Misiri, akwapukec, naanyounit aisigalikin yes.

⁸ Eboŋunete bobo Ikaludean da, itijiete ere lo; irumete, icweikinete kakim.

⁹Inera EJAKAIT kwanata ebe, Sirikimodomodas ebe, “Abeit enyounete Ikaludean kamawok”; naarai mam enyounete.

¹⁰ Naarai karaida kidanyata yesi ajore kere naka Ikaludean luejios kayes, kopianunos ituŋa luimusuŋitai bonik kakesi, tikenyout kesi, ŋinituŋanan kowemake, aicweikin ere lo kakim.’ ”

¹¹Kosodi kanen, nakenyou ajore naka Ikaludean kotoma Yerusalem kekuriakata ajore naka Parao,

¹²kosodi Yeremia kolom ko Yerusalem alosit akwap naka Benyamin, adumun ekewai kaŋina kotoma otuŋa.

¹³Nakejaar Ŋesi orute loka Benyamin kojai ekapolokiton loka ikedarak, ekekiror Iriya okoku loka Selemia, okoku loka Kanania; kikam enabi Yeremia, kobala ebe, “Isii ijo mama ejaas Ikaludean.”

¹⁴Kobala Yeremia ebe, “Isabi ijo; mam eoŋ asiit oKaludean.” Konye koŋer Iriya akiirar. Kosodi kikam Yeremia koyaŋa mama ejaas ikapolok.

¹⁵ Konyunyurikis ikapolok Yeremia, kibuŋata, kogolokis aenis togo loka Yonatan ekewadikan; naarai etuluoritai etogo ŋol aenis.

¹⁶ Kosodi keloma Yeremia togo loka aipany, kiton igolai, kiboi Yeremia kaŋina apaarasia nuipu;

¹⁷ kosodi kijuk ekabaka Sedekia aomare ŋes: kiŋit ekabaka ŋes kaiyeiyea kotogoke, atiar, “Ejai tope adiokirot naka EJAKAIT?” Kobala Yeremia ebe, “Ejai bo.” Kobala bobo ebe, “Kiinakinio jo akan naka ekabaka loko Babulon.”

¹⁸Kotema bobo Yeremia ekabaka Sedekia atiar, “Nunyoika adiakaa kamakon, arai kokejaanakinakakon, arai kotuŋa lu, tape kigolokinete aenis?

¹⁹Alu bo kwana inabinokus lukiidwarakinete ebe, ‘Mam ebuni ekabaka loko Babulon asurokin yes, karaida akusikwap’?

²⁰Aso kwana, kiirarai, wu ekajakait ekabaka, keŋaiŋait: kodolok akailip mamakon, keŋaiŋait; sirikiinyakak togo loka Yonatan ekewadikan, kenye atwanikin ŋina.”

²¹ Kosodi ekabaka Sedekia kicorak, kibwaikis Yeremia aidaris naka alaro naka ikedarak, koinanakinai ŋinipaaran emugati loeyaunio korot loka ikapeok, aitodol neadaunotor imugatin kere lukore. Kosalak Yeremia alaro naka ikedarak.