Read Ebaibuli 1961 Yeremia 38 Bible Online

Yeremia 38 - Ebaibuli 1961 bible

Yeremia 38

¹ Kiirasi Sepatia okoku loka Matan, ka Gedalia okoku loka Pasur, ka Yukal okoku loka Selemia, ka Pasur okoku loka Malikiya, akiro nualimonokini Yeremia ituŋa kere ebe,

² “Inera EJAKAIT kwanata ebe, Yeniboikini ore lo eari ekileŋ, ka eteŋei, ka atular: konye yenelomari mama ejaas Ikaludean ejari, einakinio da akeijar araun ŋnatuna, ido ejari.

³ Inera EJAKAIT kwanata atiar, Abeit einakinio ere lo akan naka ajore naka ekabaka loko Babulon, irumi ŋes.”

⁴ Kosodete ikapolok atemar ekabaka atiar, “Kiŋaiŋait koarai ekesa lo; naarai esijalijala akanin nuka ikajiok luesalito ore lo, akanin da nuka ituŋa kere, kanuka alimonokin akiro nuikote kwaka ŋun; naarai ekesa ŋol mam emoikinit ituŋa lu ajokis, dimarai aronis.”

⁵ Abu Sedekia ekabaka kotema atiar, “Koany, ejai akaninikus, naarai mam epedori ekabaka aisimik yes adiokirot.”

⁶ Kosodete koyaŋaasi Yeremia, kocakakis aipany naka Malikiya okoku loka ekabaka, naajai alaro naka ikedarak: kijoliliosi Yeremia kaunoi, Amameete akip kotoma aipany, dimarai erit: kiliko erit Yeremia.

⁷ Nakepupunio Ebed-melek, Etiopiat, ebwacit, loajai togo loka ekabaka, ebe, Ebwaikis Yeremia aipany; eboie ekabaka korute loka Benyamin;

⁸ kolom Ebed-melek kotogo loka ekabaka, kotema ekabaka atiar.

⁹“Ekajakait ekabaka, eswamata ituŋa lu nueroko kakere nueswamakis Yeremia enabi, loacakakis aipany; ido ekot atwanikin aibois neejai kanuka eteŋei; naarai emameete inyamat kore.”

¹⁰Kosodi ekabaka aicorakin Ebed-melek Etiopiat, kobala ebe, “Koyaŋa kane ituŋa akaisauni, kouparos kakes, kolemutu Yeremia enabi kaipany, eroko ketwana.”

¹¹Kosodi Ebed-melek koyaŋa ituŋa, kouparos kakes, koloma togo loka ekabaka kwap kaiŋadis, kolem inyakinyakia lumojoŋ luacakaritai, ka idapaica, kisijolilio kaunoi aipany mama ejai Yeremia.

¹² Kosodi kotema Ebed-melek Etiopiat Yeremia atiar, “Kibwaik inyakinyakia lu lumojoŋ luacakaritai ka idapaica lu akirididinikon kanuka aunoi.” Kiswama Yeremia kwaŋin.

¹³ Kosodete airiun Yeremia kaunoi kaŋun, kolemut kaipany. Kosalak Yeremia alaro naka ikedarak.

¹⁴Kosodi kijuka Sedekia ekabaka, koyaunai Yeremia enabi mamake alomaret nakiwuniet naejai togo loka EJAKAIT. Kotema ekabaka Yeremia atiar, “Keeŋit akirot; sirikimunonik adiokirot kere.”

¹⁵Kosodi Yeremia kotema Sedekia atiar, “Arai kaalimok, mam kereka kipedor aiar eoŋ? Ido arai keecor, mam kiirari.”

¹⁶ Kosodi Sedekia ekabaka kiyapoik Yeremia kaiyeiyea, kiner ebe, “Kwape ejaria EJAKAIT, lokiisubakini oni aijar na, mam kaari, kwabo mam kainakini akan naka ituŋa ŋul luemoete akoniijar.”

¹⁷ Kosodi Yeremia atemar Sedekia atiar, “Inera kwanata EJAKAIT, Edeke loka ajoresio, Edeke loka Isirael ebe, Arai kiloma mama ejaas ikapolok luka ekabaka loko Babulon, aso ekui akoniijar, ere lo da mam icweikinio kakim: ijari ijo da ka ekonikek.

¹⁸ Konye arai kiner alomar alosit mama ejaas ikapolok luka ekabaka loko Babulon, aso einakinio ere lo akan naka Ikaludean, ido icweikinete kakim, ijo da mam ikui kakanikec.”

¹⁹ Kosodi Sedekia ekabaka atemar Yeremia atiar, “Ayoŋit Iyudayan luasiata oKaludean, kenyeis ainakin akanikec, kesekeloto.”

²⁰ Konye kotema Yeremia atiar, “Mam kiinakinete. Keŋaiŋait, korima eporoto loka EJAKAIT, kaŋun nukalimok jo: aso ijaun ejok, ejari da ekonitau.

²¹Konye arai kiŋer alomar, na ŋes akirot naabu EJAKAIT ketodik eoŋ:

²²Koany, aŋor kere nukinyeinio kotogo loka ekabaka loka Yuda itolomunio mama ejaas ikapolok luka ekabaka loko Baulon, iŋerete aŋor kwa ebe, ‘Kimodete ipapero lukodicikon, Kipikosi jo. Epokata akonikejen kotoma orit, Aboŋosi kesi kau.’

²³ “Ido itolomarete Ikaludean aŋorokon kere ka ikonidwe: ka jo da mam ikui kakaninikec, konye kikamario kakan naka ekabaka loko Babulon: idupori ere lo aicweikinio kakim.”

²⁴Kosodi kolimok Sedekia Yeremia ebe, “Sirikejenu ituŋanan akiro nu, aso mam itwani.

²⁵Konye arai kiirasi lukapolok ebe kinere kajo, epote kesi neijai atemar ebe, ‘Aso cani kolimokinai nuibu kolimok ekabaka; bobo da nukilimok ekabaka jo; sirikiimunonik sio, mam sio kiari jo’;

²⁶ Kosodi ilimokini kes ebe, ‘Abu keŋaiŋa ekabaka, kenyek ainyakar togo loka Yonatan, kenyek atwanikin ŋina.’ ”

²⁷Kosodete kopotu ikapolok kere mama ejai Yeremia, kiŋita; kolimok akiro ŋun kere nuecorakini ekabaka, Kinyeis einer kaŋes, naarai mam apotu kopupos akiro.

²⁸ Kosodi kosalak Yeremia alaro naka ikedarak, kiton apaaran naerumiarere Yerusalem.