Read Ebaibuli 1961 Yeremia 4 Bible Online

Yeremia 4 - Ebaibuli 1961 bible

Yeremia 4

¹ Ebala EJAKAIT ebe, “Arai ikoto aboŋun mama ajai eoŋ, ijo Isirael, Iboŋuni mama ajai: Arai kilema italesiakon kakonyeneka, Ŋes konyet mam iriaŋiriaŋar;

² Ido iyapoi ebe, ‘Kwape ejaria EJAKAIT,’ Kabeit, kotube, kadolit da; Ilipakinos atekerin arereŋ kotomakeŋ, Tomakeŋ da ŋes itubusikinotor.”

³ Naarai ebala EJAKAIT ituŋa luka Yuda ka Yerusalem da kwanata ebe: “Kokorioto alupokus nuiukarito, Sirikiyeata neejaas ikukwa.

⁴ Kokepas bonik kama ejai EJAKAIT, Kolemas amunyin nuka itauonokus, Yes ituŋa luka Yuda, ka luiboiete koYerusalem: Kinyek akanyunyura alomun kwape kakim, Kicwe komamei yenepedori aitudeŋ, Kanuka aronis naka aswamisiokus.”

⁵Kolimosi koYuda, kisiarakis akiro koYerusalem, kineras atiar, “Kokutata yesi arupepe kakwap: Kiworoto kobalas ebe, ‘Kotukonokinos, kaloto oreria luebwaitai.’

⁶ Kikeasi aanyunet naesesenas ka Sion: Kokerata kolakunos, sirikipaikis: Naarai ayauni aronis naebuni kagolitomei, Ka amudiar naepol.

⁷ Adakun eŋatuny kamonike, ekamudiaran loka atekerin; Ejai orot, alom kaiboisike; Aitisilior akwapukon, tetere iswapete ireriakon, Komamei yeniboie kotoma.

⁸ Kanuka ŋun konapa ipukoi, Kokuudianata kibwololoto: Naarai anyunyura naededeŋ naka EJAKAIT Mam ibelokino kamawok.

⁹“Kosodi kanen kapaaran kaŋin ebala EJAKAIT ebe, Ipirisiar etau loka ekabaka, ka itauon luka ikapolok; isirieŋunio isasedotin, eumokinete da inabin.”

¹⁰ Kasodi eoŋ atemar atiar, “Wu okwe, EJAKAIT Edeke! Abeit iŋalat noi ituŋa lu, ka Yerusalem da, kobala ebe, ‘Ijaunos kainapakin’; kwabo adoloki ekileŋ aijarakec.”

¹¹ Kapak kaŋin elimokinio ituŋa lu, ka Yerusalem da ebe, “Ekwam loemwana loebuni kaiboisio nuiceleleete kotoma amodiŋ mama ejai akoku naka ikatuŋa, mere aipiet, karaida aitalaun;

¹²Ŋes ekwam Loegogoŋ adepar ŋun loebuni kanukaŋ: kwana eoŋ da enerakini kes itubesia.”

¹³ Koany, ebuni ŋesi kwape idouon, Agalinike da kwape etapipirio: Etiroko ibalasinike adepar imorukaalen. Itukwi oni! naarai kiŋatario.

¹⁴ Wu Yerusalem, kilot ekonitau alemar nukaronok, tetere kitajario. Itodoli ai eperete akoniwomisio nueroko kotomakon?

¹⁵ Naarai elimori eporoto loebuni koDan, Elimonokini aronis naebuni koukon luka Epuraim:

¹⁶ Kitwekenya atekerin; Koany, kolimonokis Yerusalem ebe, “Epote ikerereok anyoun kakwap naelwana, Edolokinete ireria luka Yuda.

¹⁷ Kwape ikedarak emanikor esurokinete ŋes airimor; Naarai ebala EJAKAIT ebe, Kepaliiki eoŋ.

¹⁸ Ekonirot ka aswamisiokon kes ayaunete akiro ŋun mamakon; Ŋin ŋes aronisikon, Naarai edwar, naarai adoloki otaukon.”

¹⁹ Wu akaijar! Wu akaijar! Kaditarit teni kiton otauka; Ebala etauka ditidit; Mam apedori aililiŋ; Naarai apupi eporoto loka arupepe, Elala loka ejie.

²⁰ Iworot amudiar atupakin amudiar; Naarai eŋataritai akwap kere: Kitiut ikaweman eŋatario, Aigalisioka da katipet.

²¹Itodoli ai aanyun aanyunet, Kapupi eporoto loka arupepe?

²² “Naarai ebaŋaka ikatuŋa, mam kajenete; Eraas idwe lujikit, emamei kes aijen: Ecoak kesi aswam nueroko, Konye emamei aijen aswam nuejok.”

²³ Abu kaany akwap, ido koany, ajai atai komam etiakak; Akuj da amamei aica.

²⁴ Abu kaany iroŋan, ido koany, komaranata, Kilokilokos iukon epuai kepuai.

²⁵ Abu kaany, ido koany, komamei ituŋanan, Kekerata akweny kere nuka apak.

²⁶Abu kaany, ido koany, emanikor lopusuk araun ais, Ketiyanakinos ireriake kere kakonyen nuka EJAKAIT, Kakonyen nuka anyunyurake naededeŋ.

²⁷ Naarai ebala EJAKAIT kwanata ebe, “Esilior akwap kere; konye mam etanaŋi cut.

²⁸ Kanuka ŋun ibworo akwap, Irioniar akuj kokuju: Naarai abu kalim, abu kanerok, Ido mam abu keitu, ido mam ejulakini.”

²⁹ Ekerete lukore kere kanuka ecelet loka ikebwanenok ka ikeketak akabwai; Elomarete amonieik, edokarete atiiban, Asilior ŋolire, Emamei da ituŋanan yeniboie kotoma.

³⁰ Ka jo da, nakiŋatarere, iswamai anyoika? Karaida kinap inapen lukareŋak, Karaida kiyogog kiboro luka esabu Karaida italali akonyekon kekia, Itubusikina taai; Kimenete ipailonokon, emootos akoniijar

³¹ Naarai apup eporoto kwape loka aberu naeriebi aidoun, Kwape loka aditar naka ŋin naidouni ekiyaike, Eporoto loka akoku naka Sion, nainyikonokini iyeŋa, Korionori akekanin, kobala ebe, “Itukwi eoŋ! Eilori akaijar kakonyen nuka ikaarak.”