Read Ebaibuli 1961 Yeremia 40 Bible Online

Yeremia 40 - Ebaibuli 1961 bible

Yeremia 40

¹ Akirot naka EJAKAIT naabu kobu mama ejai Yeremia, kedau Nebusaradan ekapolon loka ikedarak aosikin ŋes anyoun koRama, nakeyaŋaaria eenen kirikoi nepepe kienan kere luka Yerusalem ka Yuda, luejoreorio Babulon.

² Koya ekapolon loka ikedarak Yeremia, kotema atiar, “Enerak EJAKAIT Ekonideke aronis na kere aibois na:

³ Ido etodolik EJAKAIT, eswama kwape abu kinerar; naarai ipotu kodiakas kama ejai EJAKAIT, kwabo mam ipotu korimasi ekeporoto, kanuka ŋun kibunok akirot na.

⁴ Ido kwana koany, kalacakini lolo korikoi luejaas akaninikon. Arai itojokit ijo aupar keoŋ Babulon, aso kobia, kedarenenei jo ejok; konye arai eraas nueroko jo aupar keoŋ Babulon, kinye: koany, akwap kere ejai akonyenekon; kolot neitojokit ijo neiwomit edolit alosit.”

⁵ Kosodi eriŋa enyouno aboŋor, kotema atiar, “Koboŋo do neejai Gedalia okoku loka Akikam, okoku loka Sapan, loainaki ekabaka loko Babulon ayait ireria kere luka Yuda, kiboikin oreke otuŋa; arai bo ilosi kere neiwomit edolit alosit.” Kosodi ekapolon loka ikedarak ainakin ŋes inyamat, ka ainakinet, kolakak.

⁶ Kosodi Yeremia alosit mama ejai Gedalia okoku loka Akikam, Misipa, kiboikin oreke otuŋa luasalito kakwap.

⁷ Nakiirariata ikapolok kere lukorioŋeta luajaas okitui, kes ka ikecetuŋa, ebe, ainak ekabaka loko Babulon Gedalia okoku loka Akikam, ayait akwap, ido etitiŋ ikiliok ka aŋor ka idwe ludidik, kaŋul lukican luka akwap, lumam ejoreoritai Babulon;

⁸ kopotu mama ejai Gedalia Misipa, Isimael okoku loka Netania, ka Yokanan ka Yonatan odwe luka Karea, ka Seraia okoku loka Tanumet, ka odwe luka Epai Enetopatit, ka Yesania okoku loka Emaakatit, kes ka ikecetuŋa da.

⁹Kosodi Gedalia okoku loka Akikam, okoku loka Sapan, kiyapoik kes ka ikecetuŋa kinera atiar, “Sirikiyoŋa aijaanakin Ikaludean. Kiboikinos akwap, kijaanakis ekabaka loko Babulon, ido ijaununete ejok.

¹⁰ Koany, ajaenena eoŋ Misipa, abwoenen kakonyen nuka Ikaludean, luepote mama kija oni. Konye yes, korukonokinete ebino, ka araito nuka akamu ka akinyet, kibwaanakinete oborokus, kiboienenete koreriakus luiruma.”

¹¹ Idokwape kwaŋin Iyudayan kere luajaas toma Moab, ka lukotoma odwe luka Amon, kotoma Edom, ka luajaas toma akwapin kere, nakiirariata kwape esidoŋio ekabaka loko Babulon aatoŋot kotoma Yuda, ido adakaki Gedalia okoku loka Akikam, okoku loka Sapan ayait kes,

¹²kosodete koboŋut Iyudayan kere anyoun kaiboisio kere nuereŋearitai, kopotu toma akwap naka Yuda, mama ejai Gedalia, Misipa, kotukonokis ebino ka araito nuka akamu nuipu noi teni.

¹³Ido bobo kobu Yokanan okoku loka Karea, ka ikapolok kere lukorioŋeta luajaas okitui mama ejai Gedalia Misipa.

¹⁴ Kobalas ebe, “Ijeni kereka ijo ebe ejuku Baalis ekabaka loka idwe luka Amon Isimael okoku loka Netania aiar jo?” Konye kogirok Gedalia okoku loka Akikam kes.

¹⁵Kosodi Yokanan okoku loka Karea kinera ka Gedalia ko Misipa kaiyeiyea, kobala ebe, “Keŋaiŋait, mere kalot, kaar Isimael okoku loka Netania, komam ituŋanan yenejenuni. Tikiarak jo inyo, tape Iyudayan kere luatukokina mama ijai isiarisiarunos, koolio aatoŋot naka Yuda?”

¹⁶ Konye Gedalia okoku loka Akikam kotema Yokanan okoku loka Karea atiar, “Sirikiswama akirot ŋin; naarai isabanakini Isimael.”