Read Ebaibuli 1961 Yeremia 41 Bible Online

Yeremia 41 - Ebaibuli 1961 bible

Yeremia 41

¹ Kosodi kanen kolap kalokikanyetekaarei kobu Isimael okoku loka Netania, okoku loka Elisama, lokaur naka ekabaka, ediopet ka lukapolok luka ekabaka, nepepe kituŋa itomon mama ejai Gedalia okoku loka Akikam Misipa: komorata ainyam koMisipa.

² Kosodi konyou Isimael okoku loka Netania, ka ituŋa itomon Iuajaas kaŋes, kicumata Gedalia okoku loka Akikam, okoku loka Sapan, kekileŋ, koarata, loabu ekabaka loko Babulon kodakak ayait akwap.

³ Koar bobo Isimael lyudayan kere luajaas ka Gedalia, Misipa, ka Ikaludean luadumunio kaŋina, kes ikajiok.

⁴Kosodi kanen apaaran nakiareit kedaun aiar Gedalia, komamei yenejeni,

⁵ kopotu ituŋa anyoun koSekem, ka Silo, ka Samaria, ituŋa akaisakanykauni luabarenito ipeneka, kocilicila anapitokec, kogerito awat, ekoditos ainakineta ka lukisupurununo, ayaŋaun togo loka EJAKAIT.

⁶Konyou Isimael okoku loka Netania ko Misipa aisiriam kes, kolot mama ejaas emonyi. Kosodi kanen, kiriamakinos kakes, kotema kes atiar, “Kopotu neejai Gedalia okoku loka Akikam.”

⁷Kosodete kedolut kidiŋ ore, koar Isimael okoku loka Netania kes, kocakak aipany, ŋes ka ituŋa luajaas kaŋes.

⁸Konye kotakanut ituŋa itomon kotomakec, luatemarete Isimael atiar, “Sirikiara sio: naarai ejaas bukosi imono luebwaitai omanikor, akima, ka esairi, ka akinyet, ka esik.” Kosodi kinye, mam abu koar kes kwape kiinacanakec.

⁹ Aipany ŋin naacakakini Isimael awat kere nukatwak nuka ituŋa luaari, kosiep loka Gedalia, ŋipeŋin aipany naaboki Asa ekabaka kanuka akurian Baasa ekabaka loka Isirael. Kileleb Isimael okoku loka Netania kituŋa luaari.

¹⁰ Kosodi kijoreo Isimael luedeunos kere luka ituŋa luajaas Misipa, kiton adwe nuka ekabaka, ka ituŋa da kere luasalito Misipa, luabu Nebusaradan ekapolon loka ikedarak kititiŋ Gedalia okoku loka Akikam. Kijoreo Isimael okoku loka Netania kes, konyou alosit mama ejaas idwe luka Amon.

¹¹ Konye nakiiraria Yokanan okoku loka Karea, ka ikapolok kere luka irioŋeta luajaas kaŋes, nukaronok kere nueswama Isimael okoku loka Netania,

¹² koyaŋaasi ituŋa kere, koloto aitiji Isimael okoku loka Netania, kodumakis atapar naepol naajai Gibeon.

¹³Kosodi kanen keanyutu ituŋa kere luajaas ka Isimael Yokanan okoku loka Karea, ka ikapolok kere luka irioŋeta luajaas kaŋes, kiyalamikinos.

¹⁴Apotu ituŋa kere luejoreorit Isimael anyoun ko Misipa kibelokinos koboŋosi, koloto mama ejai Yokanan okoku loka Karea.

¹⁵ Konye koku Isimael okoku loka Netania kama ejai Yokanan, ŋes nepepe kituŋa ikanykauni, kolot mama ejaas idwe luka Amon.

¹⁶Kosodi Yokanan okoku loka Karea, ka ikapolok kere luka irioŋeta luajaas kaŋes, koyaŋaasi aatoŋot kere naka ituŋa luabu Isimael kijoreo anyoun koMisipa, kedau aiar Gedalia okoku loka Akikam, kes ikajiok, ka aŋor, ka idwe, ka ibwacin, luenyakuni Yokanan koGibeon.

¹⁷ Koloto, kiboikinos Gerut Kimam, eiduny ka Bet-lekem, alosior Misiri,

¹⁸ kanuka Ikaludean; naarai kokuriakaros kes, naarai abu Isimael okoku loka Netania koar Gedalia okoku loka Akikam, loadakakinit ekabaka loko Babulon ayait akwap.