Read Ebaibuli 1961 Yeremia 43 Bible Online

Yeremia 43 - Ebaibuli 1961 bible

Yeremia 43

¹ Kosodi kanen nakedaunia Yeremia einer kituŋa kere akiro kere nuka EJAKAIT Ekecedeke, nuejukunitor EJAKAIT Ekecedeke, kes akiro ŋun kere,

²kosodi Asaria okoku loka Kosaia, ka Yokanan okoku loka Karea, ka ituŋa kere luisoŋoloko, kinerata ka Yeremia kobalas ebe, “Iŋalai. Mam kijukunit EJAKAIT Ewokodeke einer ebe, ‘Sirikiloto Misiri aiboi ŋina.’

³Konye Baruk okoku loka Neria ŋes kisidiki jo aijaikin sio akan naka Ikaludean, tetere kiarete kesi sio, ka aijoreor da Babulon.”

⁴Aso Yokanan okoku loka Karea, ka ikapolok kere luka irioŋeta, ka ituŋa kere, mam apotu korimasi eporoto loka EJAKAIT, aiboikin akwap naka Yuda.

⁵ Konye koyaŋa Yokanan okoku loka Karea ka ikapolok kere luka irioŋeta, aatoŋot naka Yuda luaboŋunito anyoun katekerin kere nuereŋearitai aiboikin akwap naka Yuda,

⁶ ikiliok, ka aŋor, ka idwe ludidik, ka adwe nuka ekabaka, ka ŋinituŋanan yenenyekinia Nebusaradan ekapolon loka ikedarak Gedalia okoku loka Akikam, okoku loka Sapan, ka enabi Yeremia, ka Baruk okoku loka Neria.

⁷ Kolomasi akwap nako Misiri; naarai mam apotu korimasi eporoto loka EJAKAIT, Kodoloto Ta-panes.

⁸Kosodi kobu akirot naka EJAKAIT mama ejai Yeremia koTa-panes, kobala ebe:

⁹“Kolem amor nuepolok akanikon, kibwa kotoma alup nuka amatapalin, nuejaas neelomarere togo loka Parao koTa-panes, kosesenete da ituŋa luka Yuda;

¹⁰ kolimok kes ebe: ‘Inera kwanata EJAKAIT loka ajoresio, Edeke loka Isirael ebe: Koany, ejukuni alemuni Nebukadanesar ekabaka loko Babulon, ekakejaanakinan, ebwaikini ekeicoloŋ loka ajakanut amor nu nuebwa; ido eterakini ewemake loka ekabaka mamakec.

¹¹ Ido ebuni, edanyi akwap nako Misiri; einakini lukatular, atular, lukijoreo aijoreorio, lukekileŋ okileŋ.

¹² Enokokini akim otogoi luka idekesio luko Misiri, ido icweikini kes, ijoreori kes: enapi akwap nako Misiri, kwape enapia ekecokon anapitoke; enyouni kaŋina inapakina.

¹³Ido ebilibilei ipirin luka Bet-semes, loejai akwap nako Misiri; icweikini da kakim itogoi luka idekesio luko Misiri.’ ”