Read Ebaibuli 1961 Yeremia 44 Bible Online

Yeremia 44 - Ebaibuli 1961 bible

Yeremia 44

¹ Akirot naabu kobu mama ejai Yeremia nuka Iyudayan kere lueboiete kakwap nako Misiri, lueboiete koMigidol, ka Ta-panes, ka Nop, kakwap da naka Paturos, kobala ebe:

² “Inera kwanata EJAKAIT loka ajoresio, Edeke loka Isirael ebe: Ianyut aronis kere naabu kayau Yerusalem, koreria da kere luka Yuda. Ido koany, eraas lolo amejei, emamei ituŋanan yeniboie kanen,

³ kanuka nukaronokokec nueswamata aitunyunyurikin eoŋ, naarai apaasi aisupuronokin lukisupurununo, ka aijaanakin da icedekesio, lumam kolo ajenete, kes, karaida yes, karaida lukapapaakus.

⁴ Konye abu kejukanak yes ikakejaanakinak kere inabin, adilonokini tupuruc aijukunun kes, kabala ebe, ‘Wu okwe! Sirikiswamata akirot na naketal naalait.’

⁵Konye mam apotu kopuput, kwabo mam itoikino akeceki ainyein nukaronokokec, amamus aisupuronokin icedekesio lukisupurununo.

⁶ Ŋes abukokinia akanyunyura ka akadedeŋ, kinep koreria luka Yuda, korotin da luka Yerusalem; ido eswapa, emejeikis, kwape ejaatar lolo.

⁷ Aso do ŋes inerar kwanata EJAKAIT, Edeke loka ajoresio, Edeke loka Isirael, ebe: Kanukinyo iswamakiniata ikusitauon aronis naetia ne, yes amudiar ekiliokit ka aberu, ka ikoku ka imukeru da kotoma Yuda, ainyein yes komamei yenasalit?

⁸ Kanukinyo kitunyunyurikiniata eoŋ kanuka aswamisio nuka akaninikus, isupuronokinete icedekesio lukisupurununo kakwap nako Misiri naipotu kopotu aiboi; tape kimudiario, araun ekenit, ka amorosit kotoma atekerin kere nuka akwap?

⁹Kimurwok kereka yes aronis naka lukapapaakus, ka aronis naka ikabakan luka Yuda, ka aronis naka aŋorokec, ka aronisikus, ka aronis da naka aŋorokus, naapotu kiswamata kakwap naka Yuda, korotin da luka Yerusalem?

¹⁰ Mam itisilaara kiton lolo, kwabo mam eyoŋito, ido mam elosenenete kokisilaka, karaida kaicorakinetaka, nuabu kebwaik kakonyenekus, kakonyen da nuka lukapapaakus.

¹¹ “Ŋes inerar kwanata EJAKAIT loka ajoresio, Edeke loka Isirael, ebe: Koany, kaseseni yes kakoŋu naerono, amudiar Yuda kere.

¹² Ayaŋaari aatoŋot naka Yuda, luetogogoŋete akecekonyen alosit akwap nako Misiri aiboi kaŋina, epiario kes kere, Ebiroros kakwap nako Misiri; epiari ekileŋ, ka eteŋei; etwakete kekileŋ, ka eteŋei ageun kalodidi kiton lokapolon: eraunete aimuario, ka aumokinet, ka ekenit, ka amorosit.

¹³Naarai eticani ŋul luiboiete kakwap nako Misiri, kwape abu keticania Yerusalem, kekileŋ, ka eteŋei, ka atular da.

¹⁴Tetere mam ekui karaida aisal imodio kaatonot naka Yuda luaponito aiboi akwap nako Misiri, aboŋor akwap naka Yuda, naemielas kesi aboŋor aiboi. Naarai emamei yeneboŋori dimarai idis luekuete.”.

¹⁵Kosodete koboŋokis ituŋa kere Yeremia, luajenete kwape esupuronokiniata aŋorokec icedekesio lukisupurununo, ka aŋor kere nukebwoete kosiepikec, atukot naepol, ituŋa kere luiboiete kakwap nako Misiri, kotoma Paturos, kobalas ebe,

¹⁶ “Akirot naibu kolimok sio kokiror loka EJAKAIT, mam kiirari.

¹⁷ Konye abeit kiswamai ŋinikirot naelomuni kaitukekosi, aisupuronokin akabaka naka akuj lukisupurununo, abukonokin ŋes ainakineta numatan, kwape kiswamaa, isio ka lukapapaakosi, ikabakanakosi, ka ikapolokokosi, koreria luka Yuda, korotin da luka Yerusalem: naarai kapak kaŋin ŋes kimonianakinor inyamat, kajaut ejok, komam kianyunit nukaronok.

¹⁸Konye netikolo kinyeinia aisupuronokin akabaka naka akuj lukisupurununo, abukonokin ŋes ainakineta numatan, kitwakia kere, kipiari kekileŋ keteŋei.”

¹⁹ Kobalas aŋor da ebe, “Nakiisupuronokinia akabaka naka akuj lukisupurununo, abukonokin da ainakineta numatan, kepoonokis imugatin amaia, kabukonokis ainakineta numatan, mam kereka acamunito ikosikiliok?”

²⁰Kosodi kolimok Yeremia ituŋa kere, ikiliok ka aŋor da, kes ituŋa kere luaboŋokinete ŋes kwaŋin, kobala ebe:

²¹“Lukisupurununo luisupurununete koreria luka Yuda, korotin da luka Yerusalem, yes ka lukapapaakus, ikusikabakan ka ikapolokokus, ka ituŋa luka akwap, mam kereka abu EJAKAIT kiitu, ido mam apotu kojaut otauke?

²² Tape mam epedori EJAKAIT cut atitiŋikin bobo, kanuka aronis naka aswamisiokus, kanuka italesia luipotu kiswamata; ŋes ainakin akwapukus eraun ameje, ka aumokinet, ka ekenit da, komamei yeniboie kotoma, kwape ejaar lolo.

²³ Naarai ipotu kisupurununut lukisupurununo, ido naarai ipotu kodiakasi kama ejai EJAKAIT, kwabo mam erimara eporoto loka EJAKAIT, ido mam eloseneno kokisilake, karaida kaicorakinetake, karaida toma aitejenunetake; ŋes ainakin aronis na kidolokini yes, kwape ejaar lolo.”

²⁴ Ido bobo kobala Yeremia ituŋa kere ka aŋor da kere ebe, “Kiirasi akirot naka EJAKAIT, yes kere luka Yuda luijaas akwap nako Misiri.

²⁵Inera kwanata EJAKAIT loka ajoresio, Edeke loka Isirael ebe: Inerata yesi ka akusiŋor kaitukekus, itodolikis da kakusikanin ebe, ‘Abeit kitodolikin aiyaposiokos nukiyapot, aisupuronokin akabaka naka akui lukisupurununo, ka abukonokin ainakineta numatan.’ Aso kiticata aiyaposiokus, kitodolo da aiyaposiokus.

²⁶ Aso do kiirasi akirot naka EJAKAIT, yes kere luka Yuda luiboiete kakwap nako Misiri. Ebala EJAKAIT ebe, Koany, eyapo kalimit ekakiror lokos ebe mam bobo elimitoi ekakiror kaituk kere naka ituŋanan yenika Yuda kakwap kere nako Misiri, ebe, ‘Kwape ejaria EJAKAIT.’

²⁷ Koany, eteenenei kes kakoŋu naerono, konye mere kanaejok; epiari ekileŋ ka eteŋei ituŋa kere luka Yuda luejaas akwap nako Misiri, aitodol needaunotor.

²⁸ Ŋul da luekuete kokileŋ enyounete kakwap nako Misiri eboŋorete akwap naka Yuda idis taai: ejenunete ŋul aatoŋot kere naka Yuda lualomut aiboi akwap nako Misiri, nakaŋai akirot naebwoi, nakaŋ, arai nakec.

²⁹ Ebala EJAKAIT ebe, Na ŋes aanyunet kamakus, ebe, eticani yes kaibois kana, kojenutu cut kwape Icasitotor akakiro kamakus kanuka aronis.

³⁰ Inera EJAKAIT kwanata ebe, Koany, ainakini Parao Kopura ekabaka loko Misiri akan naka lukasurupoke, kakan da naka ŋul kaluemooto akeijar; kwape abu kainakinia Sedekia ekabaka loka Yuda akan naka Nebukadaresar ekabaka loko Babulon, lokasurupike, loamoot akeijar.”