Read Ebaibuli 1961 Yeremia 46 Bible Online

Yeremia 46 - Ebaibuli 1961 bible

Yeremia 46

¹ Akirot, naka EJAKAIT naabu kobu mama ejai enabi Yeremia kanuka atekerin.

² Kanuka Misiri, Nuka ajore naka Parao-neko ekabaka loko Misiri, naajai ariri naka ecor Eupurate koKarukemis naadanyi Nebukadaresar ekabaka loko Babulon kokaru lokiwoŋonet loka Yekoiakim okoku loka Yosia, ekabaka loka Yuda.

³ “Kokapata ebuku ka eupal, Kikunyakis ejie!

⁴Kopesikis nupetan abalasin; Kibwanenoto, yes ikebwanenok! Kiderakinos, konapitos abokoikus nuka aisinin; Kopwata akwaras, konapitos ikootin luka asua!

⁵ Kanukinyo aanyunia? Aburut, aboŋosi kau. Ebironor ikiriginikec, Ido anemesiaros, mam eŋoliarete kau. Ebala EJAKAIT ebe, Ejai etasuro owaitin kere!

⁶ Kinyeis luetiroko akerit, Karaida ekirigi aiku; Kari naka agolitomei kariri naka ecor Eupurate, Eguikis, ebiroros.

⁷ Iŋai bo ŋin yenenyouni kwape Nile, Kwape icorin lukibukas akipikec?

⁸Anyou Misiri kwape Nile, Ibukas akekipi kwape icorin. Kobala ebe, Anyouni, karapak akwap kere; Amudiari ere ka ŋul da luiboiete kotoma.

⁹Kodokasi yesi, ibalasin; Kikerepikis yesi, agalin! Kolomasi ikirigin; Ituŋa luka Etiopia ka Put luekapitos iupalin; Ituŋa da luka Lud, luekapitos luikesito da akabwai.

¹⁰ Naarai apaaran ŋin erai naka EJAKAIT, Edeke loka ajoresio, Apaaran naka enyaŋit, inyaŋakini lukasurupoke. Enyami ekileŋ, imonikini da, Ido emasi aokotokec itekori cut. Naarai ejai EJAKAIT, Edeke loka ajoresio, asubanit Akwap naka ari naka agolitomei, Kariri naka ecor Eupurate.

¹¹ Kodoka Gilead, kolem emina, Ijo akoku nabekot nako Misiri! Itwasamai taai ikee luipu: Komamei aŋaleun kamakon.

¹²Eirasi atekerin ikonileic, Elelebun akoniimony akwap; Naarai eriama ekirigi ka ekirigi, Ebiroros kere nepepe.”

¹³ Akirot naalimokini EJAKAIT enabi Yeremia, kwape ebunio Nebukadaresar ekabaka loko Babulon amudiar akwap nako Misiri.

¹⁴“Kolimosi koMisiri, kitisiarikis ko Migidol, Kitisiarikis koNop, ka Ta-panes; Kineras atiar, ‘Kobwou, kokapakin; Naarai anyam ekileŋ iwaitinikon.’

¹⁵Kanukinyo amearere ikonikirigin? Mam ebwouna, naarai EJAKAIT ereŋet.

¹⁶ Esiguik luipu, eebo, ebironoros, Kobalas ebe, ‘Kanyoutu, Kaboŋosi otuŋawok, akwap nakobuwok, Akerit ekileŋ lokireit.’

¹⁷Konyarata Parao, ekabaka loko Misiri ekekiror, ‘Ekepopolan loitumori apak titai.’

¹⁸ “Ebala Ekabaka, ekekiror EJAKAIT loka ajoresio, ebe, Kwape ajaria, abeit kwape Tabor oroŋan, Ido kwape Karamel ariri kaŋolol, Ebuni ŋesi.

¹⁹ Wu jo apese naiboie koMisiri, Kitemok iboro lukiŋatarere; Naarai eraun Nop ameje, Icweio, komamei yeniboikin.

²⁰ “Erai Misiri ataok naejok noi; Konye enyouni ekamonit kagolitomei, kobunok ŋes.

²¹Ido ituŋake lukeropit kotomake esubito bala itak luetumito; Naarai aboŋosi kesi da, akerata nepepe, Mam ebwouna: Naarai adolok kes apaaran naka icanikec, Apak naka aiticaniokec.

²² “Iŋororaar eporotokec kwape emun loeliat; Naarai eracete lukasurupokec alosit ajore, Elosete kokapito aepei, Kwape ikajepak ikito.

²³Ebala EJAKAIT ebe, Ejepete amagoroke, Karaida mam epedori aitorio; Naarai itelekarito kesi emaase kaipues; Ido mam imarunos.

²⁴Irumete apese nako Misiri ileic; Ijaikinio akan naka ituŋa luka agolitomei.”

²⁵ Ebala EJAKAIT loka ajoresio, Edeke loka Isirael ebe: “Koany, eticani Amon loka No, ka Parao, ka Misiti, ka ikedekesio ka ikabakanake da; Parao ka ŋul da luemunosi ŋes.

²⁶ Akorakini kes akan naka ŋul kaluemoete akeceijar, kakan naka Nebukadanesar ekabaka loko Babulon, ka akan da naka ikekejaanakinak. Ebala EJAKAIT ebe, Kokau iboikinos ituŋa, kwape apaarasia nukolosek.

²⁷ “Konye sirikiyoŋ, ijo Yakob, ekakejaanakinan, Kwabo sirikiibur, ijo Isirael: Naarai koany, ketajari jo kama elwana, Ka akoniwur da kakwap naka aijoreoriokec. Eboŋuni Yakob, iyamakin ijamamai, Emameuni do yenitukuriani.

²⁸Ebala EJAKAIT ebe, Sirikiyoŋ, ijo Yakob ekakejaanakinan, Naarai ajaenena kajo, Naarai apiari atekerin kere nukereŋearit, Konye jo, mam kapiari cut. Naarai kaleconori jo motimot, Kwabo mam kenyeini cut komam keticanenenei.”