Read Ebaibuli 1961 Yeremia 49 Bible Online

Yeremia 49 - Ebaibuli 1961 bible

Yeremia 49

¹ Nuka idwe luka Amon. Inera EJAKAIT kwanata ebe: “Emameete teni Isirael idwe lusap? Emamei kereka ekeruman? Aso kanukinyo irumia Malakam Gad, Iboioto da ituŋake koreriake?

² Ebala EJAKAIT ebe, Aso koany, epote apaarasia Nuetupupunio elala loka ejie Asurokin Raba loka idwe luka Amon; Eraun ameje naesilior, Icwei akim akepesur. Ebala EJAKAIT ebe, Kosodi Isirael airum lulem irumito ŋes.

³ “Kibwolol, ijo Kesibon, naarai anasi Ai! Kikalalata, yes apesur nuka Raba! Konapata ipukoi, Kokuudianata, kokerata ŋiniibois kere kabwasin! Naarai ijoreorio Malakam, Ka isasedotinike ka ikapolokoke da nepepe.

⁴ Kanukinyo iwolobobotor kaditon, Aditotokon naelelei, Ijo apese naeboŋonori kau? Naemunokina abarake, kobala ebe, ‘Iŋai bo kabunokini?’

⁵Ebala EJAKAIT Edeke loka ajoresio ebe, Koany, kainuni akurian, Kotoma kere lukirimorito; Kireŋeario yes ŋinituŋanan neelwana noi, Ido emamei yenetukonokini luiposiaros.

⁶ “Konye ebala EJAKAIT ebe, Kokau enyakuni bobo aijoreorio naka idwe luka Amon.”

⁷ Nuka Edom. Inera kwanata EJAKAIT loka ajoresio ebe: “Emamei kereka bobo acoa koTeman? Aolio ca ainerun kotoma omisioitin? Elicar cut acoakec?

⁸ Kokerata, koboŋutu, koŋopa, Yes luiboiete koDedan; Naarai ainuni Esau ican, Kapak naeticania ŋes.

⁹ Arai kiponikinitos ikadeŋok luka emusabibu Mam ti kedepanasi ace? Arai kiponikinitos ikokolak kuare, Mam tikemudiasi aitodol neeupiata?

¹⁰ Konye edokidokoorit eoŋ Esau, Apukorit akeiboisio nukaiyeiyea, Mam epedori aiŋop. Amudiar aurike, ka ikeinacan, ka ikeidunyeta da; Ŋes da arumor.

¹¹Kinyek ikonidwe eraas ikokiok, Edari eoŋ koraut luejarete; Ka akonipuserun da kamunokinos eoŋ.”

¹² Naarai inera EJAKAIT kwanata ebe: “Koany, ŋul lumam ebusakinit aimat kadere abeit emasete; ijo da ŋol loikui cut komam kiticanio? Mam cut ikui aiticanio, konye abeit imasi.

¹³ Naarai ebala EJAKAIT ebe, Eyapoikin elopet ebe eraun Bosura aumokinet, ka amorosit, ka ameje, ka ekenit da; eraunete ikereria kere amejei nutir.”

¹⁴ Eira akiro nuepote kama ejai EJAKAIT, Iyakuunitai ekiyakia katekerin ebala ebe: “Kotukonokinos nepepe, kosurokis, Konyout kojioto!

¹⁵Naarai koany, ketidisiari jo kotoma atekerin, Ainakin da ituŋa aimwaŋ jo.

¹⁶ Ebala EJAKAIT ebe, Kimodata jo aitukurianetakon nusogim, Ka aisoŋolonut nakotaukon, Ijo loiboie kabuai nuka atiida, Loirumit aidi naka eukot. Karaida kiduki akonikai kuju kwape kemorukaalet, Ketodokuni kaŋina.

¹⁷ “Eraun Edom aumokinet: eumokini ŋinituŋanan yenitori, isuari kanuka aiticanetake kere.

¹⁸ Ebala EJAKAIT ebe, Kwape amudiarere Sodom ka Gomora ka ireria kere luidunyatar, emameun ituŋanan yenejaun ŋina, kwabo emameun ikoku yenika ituŋanan yeniboikin nen.

¹⁹ Koany, edokari kwape eŋatuny loebuni kamoni naka Yorodan asurokin aibois naegogoŋ: konye etekeri ŋes katipet; ido adakakini ŋin yenaseuni ayait ŋes, Naarai iŋai bo eputosi keoŋ? Ido iŋai bo kebwaikini apak? Iŋai da ekecokon lokabwoikini eoŋ?

²⁰ Aso kiirasi ainerun naka EJAKAIT, naeneru kanuka Edom; kaŋun nuelosikinit mama ejaas luiboiete koTeman: abeit iriarete kesi ludidik luka esipan; abeit eburunete anukiakec kanukec.

²¹Emarani akwap kanuka epororo loka aibirorikec; ejai acalanari, epupunio eporotoke kAŋolol Nakareŋan.

²² Koany, edokari eporori kwape kemorukaalet, loeterari akebebenoka asurokin Bosura: eraunos itauon luka ikirigin luka Edom kapaaran kaŋin kwape etau loka aberu naerieba aidoun.”

²³ Nuka Damasiko. “Erumata Kamat ileic, ka Arapad da; Naarai eirasi akiro nueroko, Ajuruŋuŋata itauon; Iyaloŋoŋoete kwape aŋolol namam inapakina.

²⁴ Alejekar Damasiko, ebelokin akerit, Ekamu amaran; Adumu ariebo ka ican, Kwape aberu naerieba aidoun.

²⁵ Kanukinyo mam inyeinere ere loka aiturit, Ere loka akaiyalama?

²⁶Ebala EJAKAIT loka ajoresio ebe, Kanuka ŋun ŋes ibironokinotor ikekatumunak orotinike, Emudiario da ikajiokoke kere kapaaran kaŋin.

²⁷ Ido enokokini akim arwatatin nuka Damasiko, Icwei itogoi lukapolok luka Ben-kadad.”

²⁸ Nuka Kedar, ka ajakanuto nuka Kasor, nuamudiari Nebukadaresar ekabaka loko Babulon. Inera EJAKAIT kwanata ebe: “Konyoutu, kodokasi Kedar! Koŋata idwe lukokide!

²⁹ Elemunete iwemanakec ka isipaninikec; Aigalisiokec, ka iborokec kere, Edemarete da akaalaikec: Ilulukinere ebe, ‘Erum etasuro iwaitin kere!’

³⁰Ebala EJAKAIT ebe, Kokera, koriariata, koŋopata, Yes luiboiete koKasor: Naarai eneru Nebukadaresar ekabaka loka Babulon nukasurokin yes, Apet nuelosikinit aiswamakin yes.

³¹ “Ebala EJAKAIT ebe, Konyoutu, kodokasi mama ejai ateker naijamamai, Naiboie inapakina; Naemameete irutei karaida ariino, Naiboie egitara.

³² Eraunete akaalaikec iŋatan, Isipanin da lukibarenekec lukoran. Ebala EJAKAIT ebe, Esiarakini luekebito arokio mama ejaas ikwamin kere, Ido ainuni kes ican luepote kowaitin kere.

³³ Eraun Kasor aibois naka ikuwei naiboienenoto, Ameje namam edaun: Emamuun ituŋanan yenejaun ŋina, Kwabo emamuun ikoku yenika ituŋanan yeniboikin nen.”

³⁴ Akirot naka EJAKAIT naabu kobu mama ejai enabi Yeremia nuka Elam, napegeuni Sedekia ekabaka loka Yuda airum, kobala ebe:

³⁵ “Inera kwanata EJAKAIT loka ajoresio ebe: Koany, abili akabwa naka Elam, ŋes amun naka agogoŋokec.

³⁶Ainuni Elam ikwamin iwoŋon anyoun kariino aoŋon nuka akuj, ido eweliwelari mama ejaas ikwamin ŋul kere; emameun areker namam edolete luereŋearitai luka Elam.

³⁷ Ainakin Elam aburun kakonyen nuka lukasurupokec, kakonyen da nuka ŋul kaluemooto aijarakec. Ebala EJAKAIT ebe, Ainuni kes aronis, ŋes akanyunyura naededeŋ, ejukuni ekileŋ arukio kes, aitodol neamudiaria kes.

³⁸ Ebala EJAKAIT ebe, Ebwaikini ekaicoloŋ Elam, amudiari kanen ekabaka ka ikapolok da.

³⁹“Konye ebala EJAKAIT ebe, Kapaarasia nukawasia, enyakuni bobo aijoreorio naka Elam.”