Read Ebaibuli 1961 Yeremia 50 Bible Online

Yeremia 50 - Ebaibuli 1961 bible

Yeremia 50

¹ Akirot naabu EJAKAIT kiner kama ka Yeremia enabi kanuka Babulon, kanuka akwap naka Ikaludean, ebe:

² “Kolimosi kotoma atekerin, kitejenut da, Kikiasi emedera, Kitejenut, Sirikimunonikis: kineras atiar, ‘Aŋatar Babulon, Erumata Bel ileic, Eyalonoŋ Merodak, Erumata aputosiake ileic, Iyaloŋoŋoete akeputosia nuegerer.’

³ “Naarai enyouni ateker kagolitomei asurokin ŋes, itisili akekwap, komameun yeniboie kotoma; akerata, aloto, ituŋa ka itiaŋ da.

⁴ “Ebala EJAKAIT ebe, Kapaarasia kakwa, kapak kaŋin da, epote idwe luka Isirael, kes nepepe ka idwe luka Yuda; emonyete elosete, komootos EJAKAIT Ekecedeke.

⁵ Iŋisete nuka Sion, kotereitos ereetakec ŋina, kobalas ebe, ‘Kopotu, kemorikikinos ka EJAKAIT kaitutuket namam edaun namam imurwokinio.’

⁶“Araur ikatuŋa amerekekin nukeoliorete; etooliosi ikecokokokec, etapaasi oroŋan: anyout koroŋat kiton oukot, imurwokinito nekeuriakenenata.

⁷ Anyamata kere lukeanyunete: kobalas lukasurupokec ebe, ‘Mam kigwaunit akiro, naarai adiakasi kama ejai EJAKAIT, aiboisikec nakabeit, ŋes EJAKAIT, amun naka lukapapaakec.’

⁸ “Kokerata kokidiŋ naka Babulon, konyoutu kakwap naka Ikaludean, kosubata bala ikorwa kakonyen nuka isipanin.

⁹Naarai koany, etwekenyuni etodokari da atukot naka atekerin nukapolok asurokin Babulon, nuepote kagolitomei: iderakinos asurokin ŋes: ameun kanen eŋatario. Eraunos ikecekojoi bala luka ikirigin luenaikinito, lumam eboŋunete epalapalato.

¹⁰ Ebala EJAKAIT ebe, Eŋatario Kaludea: imonikinos kere lueŋatarete ŋes.

¹¹ “Naarai iyalamas, naarai ibwoŋas, Yes luiŋatasi akairumet, Naarai icuros kwape ataok naicakacakai akima, Icieinas kwape abalasin nuegogoŋ;

¹²Irumete totokus ileic noi; Itirirai ŋin nakiwuruuni, Koany, eraun ŋesi awasia naka atekerin, Amodiŋ, akwap nalarioŋ, elet.

¹³Kanuka anyunyura naka EJAKAIT mam iboikinoi, Konye eraun asilio: Eumokin ŋin yenitori Babulon, Isuari icanike kere.

¹⁴Kiderakinos asurokin Babulon kowaitin kere, Yes kere luikesito akabwai; Kogumata ŋes, sirikitasalata imalia; Naarai adiaka kama ejai EJAKAIT.

¹⁵ Kikeseut elala kowaitin kere, Alo akanin; Ebiroros apetetake, Atiyanar akerwatatin. Naarai lo ŋes enyaŋit loka EJAKAIT; Kinyaŋakis; Kwape kolo eswamaa, Kiswamakis ŋes kwaŋin.

¹⁶ Komudiasi yeneyei koBabulon, Ka yenekapit ekurupeta kapak naka aisak: Kanuka aiyoŋ ekileŋ loereit, Eboŋori ŋinituŋanan mama ejaas iketuŋa, Ekeri ŋinituŋanan akwap nakobukec.

¹⁷ “Isirael ŋes amerekek namejat; ereŋeata iŋatunyo, Kisiau ekabaka loka Asuria ainyam, ka Nebukadaresar lo ekabaka loko Babulon, ŋes lokawasia ekoe akekojo.

¹⁸Ŋes inerar kwanata EJAKAIT loka ajoresio Edeke loka Isirael ebe: Koany, eticani ekabaka loko Babulon ka akekwap, kwape abu keticania ekabaka loka Asuria.

¹⁹ Ido enyakuni Isirael bobo toma oronyiake, ido edakenena ŋesi Karamel ka Basan, imonikini eketau koukon luka Epuraim ka Gilead da.

²⁰ Ebala EJAKAIT ebe, Kapaarasia kaŋun, kapak kaŋin, emootai numam adolit nuka Isirael, kwabo emameete; aronisio da nuka Yuda, kwabo mam etakanunete: naarai esioniei ŋul lualeleŋi araun aatoŋot.

²¹ “Kodokasi asurokin akwap naka Merataim, Kosurokis da luiboiete koPekod, Ebala EJAKAIT ebe, Koara, komudiasi cut atupakin kes, Kiswamata kere nuabu kecorak.

²²Ejai ecelet loka ejie toma akwap, Ka amudiar naepol!

²³ Ajepar cama anyuli naka akwap kere, abila ca! Aluor cama Babulon ameje kokidiŋ atekerin!

²⁴ Abu kalok jo, ipok da, ijo Babulon, Mam ibu kojen: Itakanu, kikamun da, Naarai ipegata ka EJAKAIT.

²⁵ Aŋaa EJAKAIT akeiŋadis, Alemu lujiis luka anyunyurake, Naarai ejai EJAKAIT, EJAKAIT loka ajoresio, Aswam naelosi aswam kaŋina, Kakwap naka Ikaludean.

²⁶Kopotu kosurokis anyoun kaŋoliikoru, Kodakasi asotoi nuka idulake; Kotukonosi atukon, Kosodete amudiar cut: Sirikitasala imodiobore kere.

²⁷ Koarata imasenikoke kere; Kijesaros oarit. Itukwi kes! Naarai adolu akecepaaran, Apak naka aiticaniokec.

²⁸ “Iporotoi luka ŋul kaluekerete aiku anyoun kakwap nako Babulon, alimor koSion enyaŋit loka EJAKAIT Ewokodeke, ainyaŋ eyekaluke.

²⁹ “Konyarautu ikagumak imalia asurokin Babulon, ŋul kere luikesete akabwai. Kidukuro airigaun; sirikeku imodioke. Kotacakis kwape ajaar aswamuke; kere nuabu kiswama, kiswamakis ŋes da: naarai iwoŋono kama ejai EJAKAIT, kama ejai Ekalaunan loka Isirael.

³⁰ Ebala EJAKAIT ebe, Kanuka ŋun ŋes ibirokinotor ikekatumunak orotinike, emudiario da ikajiokoke kere kapaaran kaŋin.

³¹“Ebala EJAKAIT, EJAKAIT loka ajoresio ebe, Koany, kasurokin eoŋ jo, ijo ekewoŋot, Naarai adolo akonipaaran, Apak naketicania.

³² Iguikini ekewoŋot ibiror, Ido emameun yenitonyouni: Esinepikini akim oreriake, Enyami da ŋul kere luirimorito.

³³“Inera kwanata EJAKAIT loka ajoresio ebe: Ereitai idwe luka Isirael ka idwe luka Yuda; ŋul da kere luapotu kijoreosi kes eridakinito; eŋerito aosikin.

³⁴ Egogoŋ Ekalakunanikec, EJAKAIT loka ajoresio ŋes ekekiror. Abeit epuri kanukec, tetere isinapikini akwap, konye isiyalononoi luiboiete koBabulon.

³⁵ “Ebala EJAKAIT ebe, Esurokini ekileŋ Ikaludean, Ka luiboiete koBabulon, Ka ikapolokoke, ka lukacoake da.

³⁶Esurokini ekileŋ ikelabilabak, Koluoros ibaŋiok: Esurokini ekileŋ ikiriginike, Eburunete.

³⁷ Esurokini ekileŋ abalasinikec, ka agalinikec, Ka ituŋa kere luinyalinyaluna luejaas kokidiŋike, Eraunos ŋul bala aŋor. Esurokini ekileŋ abarake, Eŋatario.

³⁸ Eŋaikin akamu akipike, eokete! Naarai erai akwap naka aputosia nuegerer, Abaŋakaros kotoma aputosia.

³⁹ “Kanuka ŋun iboikinos itiaŋ luka ais nepepe kikuwei Babulon, iboikinos ikuului da ŋina: mam bobo ejaikinos ituŋa ikar kere; ido mam iboikinos ituŋa aturio katurio.

⁴⁰ Ebala EJAKAIT ebe, Kwape kolo ebiroria Edeke Sodom ka Gomora ka ireria kere luedunyatar, kwaŋin emameun ituŋanan yenejaun ŋina, karaida ikoku yenika ituŋanan yeniboiororoi nen.

⁴¹ “Koany, epote ituŋa kagolitomei; Ateker napeti, Isikwenyunio ikabakan luipu Anyoun kosaŋeta luka akwap.

⁴² Ekapetc akabwai ka akwaras; Ededeŋ, emamei da aitim; Irurumai eporotokec bala aŋolol, Ibwanenitos abalasin; Ederakinos mamakon kwape ikajiok, Ijo apese naka Babulon.

⁴³ “Eira ekabaka loka Babulon eemutokec, Alajakakata akaninike; Adita akirot etauke, Ka ariebo kwape naka aberu kanaerieba aidoun.

⁴⁴ “Koany, edokari kwape eŋatuny loebuni kamoni naka Yorodan asurokin aibois naegogoŋ; konye etekeri kes katipet; ido adakakini ayait ŋes ŋin yenaseuni. Naarai iŋai tope eputosi keoŋ? Ido iŋai kebwaikin apak? Iŋai da ekecokon lokabwoikin eoŋ?

⁴⁵ Aso kiirasi ainerun naka EJAKAIT, naeneru kanuka Babulon; kaŋun nuelosikinit mama ejai akwap naka Ikaludean: Abeit iriete kesi ludidik luka esipan; abeit ekuriakaros aiboisiokec kanukec.

⁴⁶ Emarani akwap kanuka ecelet loka aŋatar Babulon, epupunio adelonorike kotoma atekerin.”