Read Ebaibuli 1961 Yeremia 51 Bible Online

Yeremia 51 - Ebaibuli 1961 bible

Yeremia 51

¹Inera EJAKAIT kwanata ebe: “Koany, etonyouni ekwam loemudiari Asurokinia Babulon, Ka ŋul da kere luiboiete ko Kaludea.

² Ejukakini luepiesete Babulon, Ikekeete ŋes, Epiarete akwap: Naarai esurokinete kowaitin kere Kapaaran naka ican.

³Lokakabwa sirikiket akabwake, Ido sirikebwo konapite anapitoke naka asua, Sirikitimo ikatumunakake; Komudiasi cut ajoreke kere.

⁴ Ibirokinos lueario akwap naka Ikaludean, Luimusuŋitai da orotinike.

⁵ Naarai Edeke, EJAKAIT loka ajoresio Mam ejalit Isirael ka Yuda; Karaida kileleba akwapukec adiakanareta Kama ejai Ekalaunan loka Isirael.

⁶ “Kokerata anyoun koBabulon, Kitajar ŋinituŋanan akeijar! Kinyeis amudiario kanumam adoliteke: Naarai erai apak naka enyaŋit loka EJAKAIT, Etacakini ŋes eropitike.

⁷ Kerai Babulon aikopo naka esabu kakan naka EJAKAIT, Naitemerikinia akwap kere; Amata atekerin ebinoke; Kanuka ŋun ikerepikinito atekerin.

⁸ Ebiror Babulon katipet ido amudiar; Kibwololoto kanukeŋ! Kolemikisi ekia kanuka arieboke, Diat itaŋaleunio.

⁹ Tikiitaŋaleu Babulon, Konye mam itaŋaleun, Kojala do ŋes, Kaloto ŋinituŋanan obukec: Naarai adol aketubokinio toma akuj, Ikiariokiton odouon

¹⁰ Etolom EJAKAIT adolitewok; Kopotu, kalimosi koSion Aswamisio nuka EJAKAIT Edekewok.

¹¹ “Kipena imalia! Kokapa ibukui! Esidik EJAKAIT itauon luka ikabakan luka Imedin; naarai elosikinit amudiar Babulon; naarai erai enyaŋit loka EJAKAIT, ainyaŋ eyekaluke.

¹² Kikeut emedera asurokinia arwatatin nuka Babulon; Kitogogoŋoto eidare; Kibwaikis ikedarak; Kitemokis ikaperunok; Naarai elosikinit EJAKAIT, ido eswama Nuenerakinit luiboiete koBabulon.

¹³ Yes luiboiete kakipi nuipu, Luidila abar, Adol awasiakus, Etiai loka eraŋakus.

¹⁴ Eyapo EJAKAIT loka ajoresio elimit elopet ebe, Abeit kesilelebikini ituŋa, kwape enyede; Ikalalaete eibwoŋ kamakon.

¹⁵ “Kanuka apedorike abu kosub alup, Kanuka acoake abu kiticat akwap, Kanuka aijeneke da abu kopesik akuj.

¹⁶ Naikeseunia eporotoke, ejai airurum naka akipi toma akuj, Ido itodokaari elisina anyoun kosaŋeta luka akwap. Iswamakini akiru eimilia, Itolomuni da ekwam kaiŋadisiake.

¹⁷ Araun ŋinituŋanan bala etiaŋ, emamei aijen; Aputoke naegerer isurumi ŋolikatatan-esabu ileic: Naarai erai aputoke naecalara aiŋal, Emamei eiyeŋane kotomake.

¹⁸ Eraas aamameak, aswam naka aiŋal: Kapak naka aiticaniokec eoliorete.

¹⁹ Mam akorakinet naka Yakob eputosi kaŋun; Naarai erai ŋesi lokasuban iboro kere, Isirael da ŋes ateker naka airumuke; EJAKAIT loka ajoresio ŋes ekekiror.

²⁰ “Irai ijo aepeka ka lujiisika; Kabilibilia jo atekerin, Kamudiaria ajakanuto.

²¹Kabilibilia jo ebalasi ka ekebwanenonike;

²² Kabilibilia jo agali ka ekereŋeanike; Kabilibilia jo ekiliokit ka aberu; Kabilibilia jo emojoŋ ka esapat; Kabilibilia jo ekatumunan ka apese;

²³Kabilibilia jo ekecokon ka ekesipan; Kabilibilia jo ekakorion ka imoŋin luka ajookotoke; Kabilibilia jo ikayaitok ka ikapolokitok.

²⁴ “Ebala EJAKAIT ebe, Atacakini Babulon ka luiboiete koKaludea kere kakonyenekus aronisikec kere naapotu kiswamakis Sion.

²⁵ Ebala EJAKAIT ebe, Koany, kasurokini jo, ijo eroŋat ekamudiaran, Loimudiari akwap kere; Ekiari eoŋ akakan asurokinia jo, Kekokori jo katiiban, Ketuluori jo eroŋat loidopi.

²⁶Ebala EJAKAIT ebe, Mam elemunio kamakon amoru araun naka agor, Karaida amoru araun apetetait, Konye isilior do ikar kere.

²⁷ “Kikeut emedera kakwap, Kokuta arupepe katekerin, Kitemokis atekerin ejie kaŋes, Konyaraut ajakanuto, Nuka Ararat, ka Mini ka Asukenas ejie kaŋes; Koyautu ibalasin kwape enyede loikirimigito ajul.

²⁸Kitemokis atekerin ejie kaŋes, Ikabakan luka Imedin, ka ikayaitokokec, ka ikegaŋitokoke kere, Ka akwap kere naka ayaiteke.

²⁹ Emarani akwap, erieba; Naarai itodolikinio nuelosikinit EJAKAIT asurokinia Babulon, Aitisilio akwap nako Babulon, Komameun yeniboie kotoma.

³⁰ Enyeis ikirigin luka Babulon ejie, Iboiete kaneerigatai; Enoŋarit akecegogoŋ, Araut kwape aŋor; Ecwei aiboisioke, Abilas atiketake.

³¹ Ekerete ikakerak inamunos, Ekerete da ikijukitono iriamunos, Alimokin ekabaka loko Babulon ebe Erumi ereke kowaitin kere.

³²Erumutu neesedeny, Icweitai esege, Akuriakaros ikajiok.

³³ Naarai inera kwanata EJAKAIT loka ajoresio, Edeke loka Isirael ebe: Esubit akoku naka Babulon bala epejal Kapak naipudapudaere; Esalit apak naedit Kodoli aidwenyeke.

³⁴ “Kajwenya Nebukadaresar ekabaka loko Babulon, Kacuiki, kenyeki aonit, Keliko kwape etiaŋ loeiliili, Esileleb akoikike kanukaiokakaka, Kacaka.”

³⁵Etemari yeniboie koSion atiar, “Kobeik Babulon akaje nakeswamakinio eoŋ ka akuanaka.” Etemari Yerusalem da atiar, “Kobeikis akaokot mama ejaas luiboiete koKaludea.”

³⁶ Ŋes enerar EJAKAIT kwanata ebe, “Koany, apuri akirokon, kenyaŋakini jo, Etoonikini akeŋolol, etoonikini da aketan.

³⁷ Eraun Babulon aapoŋor, Aibois naiboioto ikuwei, Aumokinet, aimuario, Komamei yeniboie kotoma.

³⁸“Kiunete nepepe kwape iŋatunyo ludidik; Irurumaete kwape idwe luka iŋatunyo.

³⁹ Ebala EJAKAIT ebe, Kemwakuut awatekec, Epoikini kes epucit, etemeri kes, Kolakaros, kojotooros ajo numam enaŋete, Komam akwenyun.

⁴⁰Esijesari kes kwape idwe luka amerekekin aario, Kwape imerekekin ka ikorwa.

⁴¹ “Erumi cama Sesak! [1] Esirieŋun eituritono loka akwap kere! Araun cama Babulon asilio kotoma atekerin!

⁴² Abunok aŋolol Babulon; Arapaa kanuka aipues naka akailanake.

⁴³Araut ireriake asilio, Akwap naeonit, amodiŋ da, Akwap namam iboio ituŋanan, Namam itorit okoku loka ituŋanan.

⁴⁴ Eticani Bel koBabulon, Esilekuni ŋes nuabu kilikono. Mam bobo eleleete atekerin mamake; Ibiror arwatat naka Babulon.

⁴⁵ “Yes ikatuŋa, konyoutu kamakeŋ! Kitajarunos ŋinituŋanan Kanyunyura naededeŋ naka EJAKAIT.

⁴⁶ Kinyeis ikusitauon akiilor, Kwabo sirikiyoŋa kanuka nukabe nuiirario kakwa; Naarai epote nukabe kokaru ediopet, Kosodi kokau kokaru ece epote nukabe, Ejai akaje da akwap, Ekayaiton ejiosi kecekayaiton.

⁴⁷ “Aso koany, epote apaarasia, Nuetepesenia aputosia nuegerer nuko Babulon; Irumete akwapuke kere ileic; Luke kere lueario ibirokinos kidiŋike.

⁴⁸ Ebala EJAKAIT ebe, Kosodete akuj ka akwap, Ka iboro kere luejaas toma, Ayoore kanuka aiyalama kanuka Babulon; Naarai epote ikaŋatak mamakeŋ kari naka agolitomei.

⁴⁹ Kwape kibiroria Babulon lukeario luka Isirael, Kwape kwaŋin ibirokinotor lukeario luka akwap kere Babulon.

⁵⁰ “Yes luikuata ekileŋ, Koloto, sirikibwaata kopalarito! Kiitutu EJAKAIT kama elwana, Ido koloma Yerusalem toma otauonokus.

⁵¹ Kitirira oni, naarai kipupu amoromoroo; Erumata akonyenewok ileic, Naarai alomasi imo aiboisio nukalaunak Nuka etogo loka EJAKAIT.”

⁵²“Ebala EJAKAIT ebe, Aso do koany, epote apaarasia, Nuetepesenia aputosiake nuegerer; Idinyasi luimusuŋito Anatar akwapuke kere.

⁵³ Ebala EJAKAIT ebe, Karaida kedokarit Babulon kiton akuj, Karaida kitieasit amukurur naka agogoŋuke, Konye epote ikaŋatak neejai kamakaŋ.

⁵⁴ “Eporoto loka aibworo loebuni koBabulon! Ka loka amudiar naepol Loebuni kakwap naka Ikaludean!

⁵⁵Naarai eŋasi EJAKAIT Babulon, Ido emudiar ecelet loepol kamakeŋ, Ido irurumaete akailanakec kwape akipi nuipu, Edakun ecelet loka iporotoikec.

⁵⁶ Naarai abunoki ŋes ekaŋatan, Eebo, abunoki Babulon; Aŋatar da ikiriginike, Abilibilunos akabwaikec; Naarai EJAKAIT ŋes Edeke loetaci, Abeit eropi.

⁵⁷ Ebala Ekabaka, ekekiror EJAKAIT loka ajoresio ebe, Eremeri ikapolokoke, ka lukacoake, Ikayaitokoke, ka ikegaŋitokoke, ka ikiriginike da; Ido ejotooros ajo numam enaŋete, Komam ekwenyunete.

⁵⁸ “Inera kwanata EJAKAIT loka ajoresio ebe, Etiyatiyao cut arwatat naelal naka Babulon, Icweio iruteike luiceleleete. Itaaritos atekerin aamameak, Itapasitos atekerin kanuka akim.”

⁵⁹Akiro nuecorakini Yeremia enabi Seraia okoku loka Neria, okoku loka Maseia, naalosio Babulon nepepe ka Sedekia ekabaka loka Yuda kokaru lokiwoŋonet loka airumuke. Kerai Seraia ekapolon loka inyamat.

⁶⁰Kosodi kiwadik Yeremia oitabo aronis kere naebunokin Babulon, kes akiro ŋun kere nuiwadikatai kanuka Babulon.

⁶¹Kotema Yeremia Seraia atiar, “Naidolio toma Babulon mam iswaki asoman akiro ŋun kere.

⁶² Kinera ebe, ‘Wu EJAKAIT, ibu kinera nuka aibois kana, amudiar, kinyek idiotuŋanan kere aiboi kanen, ituŋanan karaida itiaŋ, konye kitisiloi do ikar kere.’

⁶³ Kosodi kidau asoman eitabo lo, ienikini amoru kocakak kidiŋ naka Eupurate.

⁶⁴Ido kinera ebe, ‘Elumori Babulon kwaŋin, kwabo mam ikeuni bobo kanuka aronis naainuni ŋes, ido epasete.’ ” Anaŋata akiro nuka Yeremia ne.