Read Ebaibuli 1961 Yeremia 52 Bible Online

Yeremia 52 - Ebaibuli 1961 bible

Yeremia 52

¹ Kerai Sedekia loka ikar akaisaarei kalodiopet nakeraunor ekabaka; kirumak ikar itomon ka lodiopet ko Yerusalem. Ekiror loka totoke kerai Kamutal akoku naka Yeremia loka Libuna.

²Kiswama nueroko kakonyen nuka EJAKAIT, kwape ejaatar kere nueswamaenene Yekoiakim.

³ Kosodi kanen abeit kitodolikinoi anyunyura naka EJAKAIT koYerusalem ka Yuda, kireŋea kes kakonyeneke. Kipaliik Sedekia ekabaka loko Babulon.

⁴ Kosodi kanen kokaru lokikanyet kaoŋon loka airumuke, kolap lokitomonet, kapaaran nakitomonet naka elap, kobu Nebukadaresar ekabaka loko Babulon, ŋes ka akejore kere asurokin Yerusalem, kidukuroto airigaun ŋes; kitutuoto itutio lujiis.

⁵Kwaŋin kirigaut ere aitodol okaru lokitomonet ka lodiopet loka ekabaka Sedekia.

⁶ Olap lokiwoŋonet, kapaaran nakikanyet kaoŋon kodedeŋar eteŋei kore, komamikis cut ituŋa luka akwap inyamat.

⁷ Kosodete kotiyasi arorwa kore, kokera ikajiok kere, kolomut kore kuare korot loka erute loejai kidiŋ arwatatin aarei, loidunyas kemanikor loka ekabaka, (Kiriamarito Ikaludean ere kere.) Kobeata korot loka Araba.

⁸Konye korukio ajore naka Ikaludean ekabaka, kodolokis Sedekia kapuutona nuka Yeriko; kisiarakin ajoreke kere aijal ŋes.

⁹ Kosodete kikamas ekabaka, koyaŋaasi neejai ekabaka loko Babulon, Ribula, kakwap naka Kamat; kotubok ŋes akiroke.

¹⁰ Koarak ekabaka loko Babulon odwe luka Sedekia akonyeneke; koar da ikapolok kere luka Yuda Ribula.

¹¹ Kogorunun ŋesi Sedekia akonye; koen ekabaka loko Babulon ŋes kirikoi, koyaŋa Babulon, kibwaik toma aenis aitodol apaaran naketwania.

¹² Kosodi kolap kalokikanyet, kapaaran nakitomonet naka elap, ŋes ekaru lokitomonet kakanykaoŋon loka ekabaka Nebukadaresar, ekabaka loko Babulon, abu Nebusaradan, ekapolon loka ikedarak, lokebwoienenei kakonyen nuka ekabaka loko Babulon, kobu Yerusalem.

¹³ Kicwe etogo loka EJAKAIT, ka etogo loka ekabaka; ka itogoi kere lukotoma Yerusalem, ŋolitogo kere loepol kicweikin kakim.

¹⁴Abu ajore kere naka Ikaludean luajaas ka lokapolon loka ikedarak, kotiyatiya arwatatin kere nuka Yerusalem ainamar.

¹⁵Kosodi kijoreo Nebusaradan ekapolon loka ikedarak lukican noi kotuŋa, ka aatoŋot naka ituŋa lukideuna kore, kaŋul da lualuŋakina ekabaka loko Babulon, ka aatoŋot naka ikeswamak.

¹⁶Konye kitasal Nebusaradan ekapolon loka ikedarak lukican noi kakwap araut iketemonokinok emusabibu ka ikakoriok da.

¹⁷ Kobilibilata Ikaludean ipirin luka aisinin lukejaas togo loka EJAKAIT, ka aicegeria, ka aŋolol naka aisinit nukejaas togo loka EJAKAIT, koyaŋaasi aisininikec kere Babulon.

¹⁸ Ido koyaŋaasi amoti ka iŋitia, ka aitudeŋeta, ka atanyia, ka akaalei, ka iboro kere luka aisinit lukijaanakiniata.

¹⁹Ka akolin da, ka atiboka nuigaete ekurwon, ka atanyia, ka amotii ka ipirin luka atalai, ka akaalei, ka atiboi da; nukeraas nuka esabu, esabu, ka nukeraas nuka epuesa epuesa, kwaŋin ayaŋaaria ekapolon loka ikedarak.

²⁰Ipirin luarei, aŋolol adiopet, ka imoŋin itomon ka luarei luka aisinin lukejaas kwap kacegeria, lueswamakinit ekabaka Solomon etogo loka EJAKAIT: aisinin nuka iboro kaŋul kere mam kepedorete ainiŋio.

²¹ Ipirin da, aojau naka epir ediopet kerai ikubitin itomon ka lukanykauni; kolukunite aitemis naka ikubitin itomon ka luarei, aburesuke ibokor iwoŋon: eorori.

²²Kejai akou naka aisinit kokujuke; aojau naka akou adiopet ikubitin ikany, kolukunito iboyan ka akamamagan akou, kere luka aisinit, ekoni epir lokiareit nepenen ka akamamagan.

²³ Kosiepion kejaas akamamagan akaisakanykaoŋon ka nukanykape; akamamagan kere lukelukunito iboyan emwaasi akwatat.

²⁴ Kosodi ekapolon loka ikedarak kikama Seraia esasedoti lopeti, ka Sepania esasedoti lokiareit, ka ikagolok luuni;

²⁵Kikama kore ekapolokiton lokeyait ikajiok; ka ituŋa ikanykaarei kaŋul lukeanyununete akonyen nuka ekabaka, lukedumunio kore; ka ekewadikan loka ekapolon loka ajore, loaramununei ituŋa luka akwap; ka ituŋa akaisakanykape luka ituŋa luka akwap, lukedumunio kokidiŋ ore.

²⁶Kikama Nebusaradan ekapolon loka ikedarak kes, koyau mama ejai ekabaka loko Babulon, Ribula.

²⁷ Kodany ekabaka loka Babulon kes, koarak Ribula akwap naka Kamat. Kwaŋin kijoreoroi Yuda anyoun kakwapuke.

²⁸ Lu kes ituŋa lukijoreori Nebukadaresar: kokaru lokikanyet kaarei Iyudayan ilukumin iuni ka akaisaarei ka luuni.

²⁹ Kokaru lokitomonet kakanykauni loka Nebukadaresar, kijoreo ŋesi koYerusalem ituŋa akwat akanykauni ka akaisauni ka luaarei;

³⁰kokaru loka akaisaarei ka luuni loka Nebukadaresar kijoreo Nebusaradan ekapolon loka ikedarak Iyudayan akwat akanykaarei ka akaisaoŋon ka lukany: ituŋa kere emwaasi ilukumin iwoŋon ka akwat akanykape.

³¹ Kosodi kanen kokaru loka akaisauni ka lukanykaarei loka aenio naka Yekoiakin ekabaka loka Yuda olap lokitomonet kaarei, kapaaran nakakaisaarei kanukany naka elap, kokaru lokeraunor Ebil-merodak ekabaka loko Babulon, abu ŋesi kitopoloo akou naka Yekoiakin ekabaka loka Yuda, kolem kaidaris;

³²Kinera kaŋes nukasianut, kitopoloo eicoloŋoke aitelekarit iicoloŋo luka ikabakan lukejaas kaŋes Babulon.

³³ Kilocok inapeneke luka aidaris, konyamenenei inyamat kakonyeneke, apaarasia kere nuka aijarake.

³⁴Akorakineteke, abu ekabaka loko Babulon koinanak ŋes akorakinet ŋinipaaran, aitodol apaaran naka atwanareke, apaarasia kere nuka aijarake.