Read Ebaibuli 1961 Yeremia 8 Bible Online

Yeremia 8 - Ebaibuli 1961 bible

Yeremia 8

¹Ebala EJAKAIT ebe: “Kapak kaŋin itolomunete akojo nuka ikabakan luka Yuda, ka akojo nuka ikapolokoke, ka akojo nuka isasedotin, ka akojo nuka inabin, ka akojo da nuka luiboiete ko Yerusalem, kailinakec:

² eloikinete kes kakonyen nuka akoloŋ, ka elap, ka ajore kere naka akuj, nuaminas kesi, nukijaanakinete, nuatupenenete, nuamootos, nuamaete da: mam etukonokinio, karaida aidaio; eraunos kesi kwape aoret kalup.

³ Ebala EJAKAIT loka ajoresio ebe, Eseunio atwanare itia aijar kotoma aatoŋot kere naedeun naka ekek kalo lokaronon, luedeunos kaiboisio kere nukereŋearit kes.

⁴“Bobo da ilimokini kes ebe, Ebala EJAKAIT kwanata ebe, Ibiroros kereka ituŋa, komam enyounete bobo? Eboŋori tope ituŋanan komam eboŋuni?

⁵ Aso kanukinyo aboŋoriata ituŋa lu luka Yerusalem kau kaicebokinit aboŋonor kau? Iketakinito aiŋal, aŋeroto aboŋun.

⁶ Abu kapupok, keira da, konye mam eneras nuibecokino: Emamei yenitoronikin akeronis kinera ebe, ‘Ekwaik ai?’ Ibelokini ŋinituŋanan aboloboloke, Kwape ebalasit loitokaar ojie.

⁷ Eebo ejeni atolut kotoma akuj apakioke nuseuna; Eŋicete eluke ka iporoidoliat ka ewalu da apak naka aponarekec; Konye ikatuŋa mam ejenete ekisil loka EJAKAIT.

⁸ “Ikwaikinete ai ineras ebe, ‘Kirai lukacoa, Ejai du ekisil loka EJAKAIT kaoni’? Konye koany, akwara nakaiŋal naka ikewadikak etarau lokaiŋal.

⁹Erumata lukacoa ileic, eburunito, ikamunitai: Koany, aŋeroto akirot naka EJAKAIT; Acoa anyoin ejai mamakec?

¹⁰ Kanuka ŋun ainakini aŋorokec mama ejaas ice, Imanikoriakec mama ejaas ŋul lukirumetc kes: Naarai ageun ka loedit kakesi kiton lokapolon kakesi, Eraŋani ŋinituŋanan aimedaun, Ido ageun konabi kiton osasedoti Emodi ŋinituŋanan.

¹¹ Etaŋaleut amusuŋut naka akoku naka ikatuŋa kaitapapanit, Kobalas ebe, ‘Ainapakin, Ainapakin,’ Kereka emamei ainapakin.

¹² Eruma kereka kes ileic naadauniata aswam naketal? Be! Mam cut erumito ileic, Ido mam apedorete aitirir: Kanuka ŋun ebiroros nepepe kaŋul luebiroros: Ebala EJAKAIT ebe, Kapak naeticania kes, elataros.

¹³ Ebala EJAKAIT ebe, Naakotor aideŋ kes: Emameete imusabibun komusabibu, Karaida itinin kotini, Erinyorito da akui; Ido nuainakinit kes atuboros kamakec.”

¹⁴ Kanukinyo kiboio oni kapalarito? Kotukonokinos, kalomasi oreria luebwaitai, Keliliŋata kaŋina: Naarai kisililiŋ EJAKAIT Edekewok oni, Koinak oni akipi nuka epiu aimat, Naarai kipou kadiakasi kama ejai EJAKAIT.

¹⁵ Kipou kamunos ainapakin, konye mam ajokis naebunit; Kamunos apak naka aŋaleun, konye koany aburun!

¹⁶“Epupunio aiŋoror naka ibalasinike koDan; Eporoto loka aruo naka ikagogoŋokoke Einakini akwap kere amaran; Naarai apotu konyamata akwap ka luejaas tomake kere; Ere, ka ŋul da luiboiete kotoma.

¹⁷Naarai koany, ebala EJAKAIT ebe, Ejukuni imunwo, asigirikoloŋa kotomakus, Lumam elemelemeo, kitodotodoete yes.”

¹⁸Wu okwe karai kapedor aitalakar bon kenyek aiturur! Epirisiar etauka kotomaka.

¹⁹Koany, eporoto loka aimony naka akoku naka ikatuŋa, Kakwap naelwana noi: “Emamei kereka EJAKAIT koSion? Emamei ekabakake kotomake?” “Kanukinyo ketunyunyurikiniata kaputosiakec nuegerer, Ka aamameak da numo?”

²⁰“Atubor aidweny, adaun ejet, Mam oni kitajaruna.”

²¹ Kemusun eoŋ kamusuŋut naka akoku naka ikatuŋa: Eoŋ da ebworo; Kekam aitirir.

²² Emamei kereka emina koGilead? Emamei emurwon kaŋina? Aso kanukinyo mam eŋaleunio aijar naka akoku naka ikatuŋa?