Read Ebaibuli 1961 Akuudian 1 Bible Online

Akuudian 1 - Ebaibuli 1961 bible

Akuudian 1

¹ Asilior ca ma ere, loeleleba kole ituŋa! Aluor ca ma bala apuserut! Ŋol lokerai loepol kotoma atekerin, Ekapolon kotoma obukui, Aluor ca do loitelemio esolo!

² Emonyi noi noi kuare, Akekiyo da eleleete koitinyo; Kopailonoke kere emamei idiopet yenitalakarit ŋes: Eŋalaŋalata ŋes ipaperoke kere, Aluoros da lukasurupoke.

³ Aŋatar Yuda kanuka aiticanio, Ido kanuka ebulesene loepol: Iboie kotoma okapirin, Mam edumuni nekiyeŋunet: Ikekarcitok kere ekamakis ŋes aridat.

⁴Ibworos irotin luka Sion, Naarai emamei yenebuni neejai atukonokin nakalaunan; Emejeikis iruteike kere, Idinyas isasedotinike: Iticanitos apesuruke, Ewoyaanar ŋesi da elopet.

⁵ Aluoros lukediŋeteke lukapolok, Akeriakaros lukasurupoke: Naarai etican EJAKAIT ŋes Kanuka epalike loepol: Aŋatar ikedwe ludidik kakonyen nuka lokediŋet.

⁶Ido atwania apese naka Sion akepolou kere: Aluoros ikapolokoke kwape amiamia numam edumunitos needakas, Aloto komameete agogoŋ Kakonyen nuka ŋol kaloerukitor.

⁷ Eitu Yerusalem kapaarasia nukaiticanitoike, Ka aburunike, iboroke kere luesiyalamikinitos Luajaas kapaarasia nukolosek. Napebirokinotor iketuŋa akan naka lokediŋet, Kwabo kemamei yenikeŋarakini, Keanyut lukediŋetake, kisekeloto asilioke.

⁸ Abu Yerusalem kodiaka noi noi; Ŋes aluoror bala ibore yenimam elai: Amenata kere luetubusikinito ŋes, Naarai aanyut amujalalake: Eebo, idinya, ibelokin da kau.

⁹ Imodokok esialeke; Mam abu kiitu awasiake; Ŋes edooror noi; Emamei yenitalakari. “Wu EJAKAIT, koany akaiticanio, Naarai etopoloor lokasurup.”

¹⁰ Etonyoiki lokediŋet akekan Oboroke kere luisiyalamikinitos; Naarai aanyu ŋesi ebe Alomasi ikapirin aiboisike nakalaunan, Luicorakinit kinyeis alomar toma atukotokon.

¹¹ Idinyas ituŋake kere, Emoete inyamat; Ainakis iborokec luisiyalamikinitos Agwel inyamat lukisikwarunete etau, “Wu EJAKAIT, kosesen, koany; Naarai araun eoŋ esilioit.”

¹² “Mam ca ma ipodosi, yes kere luitubonoros? Koanyutu, kosesenata, Arai ejaas ican kere lueriakas ka icanika, Lukeswamakin eoŋ, luketicania eoŋ EJAKAIT, Kotoma apaaran naka anyunyurake naededeŋ.

¹³ “Abu kijuk akim abunore kokuju toma akojoka, Kitonokok kes: Alok akakejen keboi, Kesiboŋo kau; Kenyeki kasilikinit, Ka aiiloro da apaaran kere.

¹⁴ “Aen adiakanaretaka ajookot; Akekan ŋes iridia; Idokokinitoi omurisiŋika; Eŋoŋa ŋesi akagogoŋ; Kejaik EJAKAIT akaninikec, Lumam apedori abwoikin.

¹⁵ Amwaŋ EJAKAIT ikiriginika kere kokidiŋika; Anyara atukot asurokinia eoŋ Aipiricaria ikatumunakaka: Epudapud EJAKAIT akoku nabekot naka Yuda Kwape toma acues.

¹⁶“Kanuka ŋun ŋes amonyia akiyo; Eleleete akiyo kakonyeneka; Naarai elwana eketalakaran lotikisikwaru akaijar: Asilikis ikadwe, Naarai epiko lokasurup.”

¹⁷Atera Sion akekanin, Emamei yenitalakari: Ecoraki EJAKAIT nuka Yakob Koraut luirimorito lukasurupoke; Erai Yerusalem kamakec Bala ibore yenimodokok.

¹⁸ “Edolit EJAKAIT; Naarai epaliik eoŋ aicorakinetake; Kopuputu keŋaiŋait, yes ituŋa kere, Koanyutu ikacan; Ejorcor abekonoka ka ikatumunakaka.

¹⁹“Abu keworo ipailonoka, Konye kamodata: Isasedotinika ka imakioka Atwakikis ore, Naemoiata inyamat Aisikwarunia aijarakec.

²⁰ “Koany, wu EJAKAIT; Naarai etururwei; Iyaloŋoŋi akaijar; Eeuio ekatau kotomaka; Naarai epaliik noi: Eari ekileŋ kokiŋa; Togo da esubit bala ejai atwanare.

²¹ “Apuputu eidinyika; Emamei yeniketalakari; Apuputu lukasurupoka kere nuka ikacan; Iyalamasi naarai iswama. Iyauni apaaran naibu kolimo, Eputokinos ŋul da keoŋ.

²²“Kodol aronisikec kere kakonyenekon; Kiswamak kes kwape kiswamakinia eoŋ Kanuka adiakanaretaka kere: Naarai epol eidinyika, Eilori da ekatau.”