Read Ebaibuli 1961 Akuudian 3 Bible Online

Akuudian 3 - Ebaibuli 1961 bible

Akuudian 3

¹Arai eoŋ ituŋanan yenaanyunit aiticanio Kobela loka anyunyurake.

²Abu keŋarenik, ketolot da, Kotoma amuton kwabo mere aica.

³Abeit icebokinit aibelonokin akekan Asurokinia eoŋ apaaran kere.

⁴Esirinyo ŋesi akakiriŋ ka akamuny; Abilibil akakojo.

⁵Aduk mama ajai, Kerigau kepiu ka apason.

⁶ Kesiboiki aiboisio nukamuton, Kwape luketwaka kolosek.

⁷Kabwau, mam apedori alomar; Esilaŋirir ekarikot.

⁸ Eebo, kamony, kelala da ayuunio, Egoluni ailipika kiŋa.

⁹Abwa irotinika kamor nuikec, Etukud ŋesi ikasokono.

¹⁰ Esubit kamakaŋ bala adubu naeperuni, Kwape eŋatuny loeŋopi kaiboisio nukaiyeiyea.

¹¹ Ketapaa korotinika, kapoopo; Ketisilio.

¹² Eket akabwake, Kasipoki araut idesiara yenika emaleke.

¹³Etolomik imalia luka akuraruke Oŋeretenyaka.

¹⁴ Arau lokimuaritono kotoma otuŋaka kere; Ekosiokec apaaran kere.

¹⁵ Kesimono adwaris, Ketuup aliasit naeta ria.

¹⁶ Abil da ikakel kiŋaroi, Karapak ekurwon.

¹⁷Itwalan ekatau kama ejai ainapakin; Kemurwoki aiyalama kwape ejaar.

¹⁸ Kabala ebe, “Aolio akagogoŋ, Ka akamuno da mama ejai EJAKAIT.”

¹⁹Kiitu aiticanioka, ka aitururuka, Aliasit naeta ria ka epiu da.

²⁰Iitununei ekatau, Ipirisiar kotomakaŋ.

²¹Keitu ŋun, Ŋes ejaunor amun.

²² Mam enaŋi aitim naka EJAKAIT, Naarai mam iŋorari aisionike.

²³ Itet ŋinitupuruc, Epol akonimunonut.

²⁴ Ebala ekatau ebe, “EJAKAIT ŋes akorakineteka; Tape amuno ŋes.”

²⁵ Ejok EJAKAIT kama ejaas luidarito ŋes, Kama ejai aijar naemoot ŋes.

²⁶ Ejok ituŋanan amunoneno ka aidarenen kaiyaparit Aitajar naka EJAKAIT.

²⁷ Ejok ituŋanan aidak ajookot Kotoma atumunike.

²⁸ Kogitar aiboi bon kililiŋ, Naarai edokoki ŋesi ŋin.

²⁹ Kibwaik akeituk apua; Elemuni kojai amun.

³⁰ Kojalak ekeitinyo neejai yenibapi; Kimonikin amoromoroo.

³¹ Naarai mam EJAKAIT ejali Ikar kere.

³²Naarai karaida keyauni ican, Konye isionie ŋesi kwape ejaar apolou naka aitimike.

³³ Naarai mam imiela aitican idwe luka ituŋa, Karaida aitakadikin kes.

³⁴Aipudapuda Ienan kere luka akwap.

³⁵Aitirii etube loka ituŋanan Kakonyen nuka ŋol loejai kuju kakuj.

³⁶ Aitapaar ituŋanan kakiroke, Mam EJAKAIT itojokit ŋun.

³⁷ Iŋai bo ŋol loinera kitodolikinoi, Arai mam EJAKAIT icorakinit?

³⁸ Mam kereka elomunete aronis ka ajokis Kaituk naka ŋol loejai kuju kakuj?

³⁹ Kanukinyo irurumaa ituŋanan yenikajaran, Ituŋanan yeniticanio kanuka aronisioke?

⁴⁰ Kerereoto, ketemo iponesiowok, Kaboŋosi bobo mama ejai EJAKAIT.

⁴¹ Ketonyoutu itauonowok ka akaniniwok da Mama ejai Edeke toma akuj.

⁴² “Kidiaka ido kipaliiki; Mam jo isionit.

⁴³“Irapar kanyunyura korukitor sio; Iar komam itimit.

⁴⁴Irapar kedou Kinyek ailip apedor.

⁴⁵ Ibu kituluo sio aiswageta ka asusujo Kokidiŋ katekerin.

⁴⁶“Lukasurupokosi kere Kiwooŋanakis aituke.

⁴⁷Kidolokis sio akurian ka aipany, Aŋasio ka amudiario.

⁴⁸Elele akakoŋu icorin luka akipi, Kanuka amudiario naka akoku naka ikatuŋa.

⁴⁹“Ebuki akakoŋu akiyo, komam itanaŋi, Komam ejoŋoi.

⁵⁰ Aitodol naesesenia EJAKAIT kwap, Koany ejai toma akuj.

⁵¹Itakadikinit akakoŋu akaijar, Kanuka apesur kere nuka ereka.

⁵² “Kamejata noi lukasurupoka kwape kakweny, Komam akirot.

⁵³ Kaeakakis toma aipany ajari, Kebiribiroto kamor.

⁵⁴ Arapasi akip akouka; Kabala ebe, ‘Aolio.’

⁵⁵ “Abu kewone ekonikiror, wu EJAKAIT, Kajai aidules naka aipany.

⁵⁶ Ibu kiira ekaporoto ebe: ‘Sirikimiŋa akonikii, Kaimonyoka aiŋarakinio.’

⁵⁷ Ibu kikuny kapaaran nakewoneo jo: Kobala ebe, ‘Sirikikurianar.’

⁵⁸ “Wu EJAKAIT, kipurok akiro nuka etauka; Ilaku akaijar.

⁵⁹Wu EJAKAIT, iany akamwaŋio; Kotub ijo akakiro.

⁶⁰ Iany ekecenyaŋit kere, Ka akeceinerun da kere mamakaŋ.

⁶¹“Ibu kiira, wu EJAKAIT, amorositikec, Ka ainerunikec da kere mamakaŋ;

⁶²Aŋajepa nuka ŋul kalukanyoikinete, Ka nukalosikinito apaaran kere.

⁶³ Koany aiboikec ka anyounikec; Arai eoŋ ekecekosio.

⁶⁴ “Wu EJAKAIT, itacakini kes Kwape ejaar aswam naka akaninikec.

⁶⁵ Iinakini kes aninik naka itauon, Ekonikenit mamakec.

⁶⁶Ireŋet kes kanyunyura, Imudiari kes kokwap kakuj naka EJAKAIT.”