Read Ebaibuli 1961 Esekiel 10 Bible Online

Esekiel 10 - Ebaibuli 1961 bible

Esekiel 10

¹ Kasodi kete, ido koany, kapak nakejai kuju kakwes nuka ikerubin, kotakan kokujukec, naasubit bala amoru naka asapiro, bala atakan naka aput naka eicoloŋ.

² Kolimok etuŋanan loanapit ebaputa ebe, “Koloma kidiŋ kakokoron nuidiridirete, kokwap kikerubin, kileleb akonikanin kere atotol nuka akim nuejaas kidiŋ kikerubin, kiwelanaa ore.” Koloma ŋesi kaseseni eoŋ.

³Kobwaata do ikerubin kakan nakoteten naka etogo, nakelomaria etuŋanan; kilelebun edou alaro nakotoma.

⁴ Kodok aibuses naka EJAKAIT kotoma okerubin, kobwo kariri naka ekek loka etogo; kilelebun edou togo, kileleba da alaro amwekimwek naka aibuses naka EJAKAIT.

⁵ Kopupos iporotoi luka abebenoka nuka ikerubin kiton alaro nakokiŋa, kwape eporoto loka Edeke Lokapedor kere nainerar.

⁶Kosodi kanen, nakicorakinia etuŋanan je loanapit ebaputa, kobala ebe, “Kolem akim kokidiŋ kakokoron nuidiridirete, kokidiŋ kikerubin,” koloma ŋesi, kobwo kosiep loka akokoro.

⁷Korio ekerubi akekan kokidiŋ kikerubin kiton akim nakejai kidiŋ kikerubin, kolem, koinak akanin nuka ŋol kaloanapit ebaputa; kitiŋ ŋesi koloma.

⁸ Kotakanu kokerubin naasubit bala akan naka etuŋanan kokwap kabebenokakec.

⁹ Kete, ido koany, ajaas akokoron aoŋon kosiep loka ikerubin, akokoro adiopet kosiep loka ŋolikerubi: atakan naka akokoron kosubite bala ejese loka amoru naka aberulo.

¹⁰Atakanukec, aputosi kesi kere aoŋon, bala kejai akokoro kotoma akokoro.

¹¹Naalosenenoto, kolosenenete kosiepionokec iwoŋon: mam ebelonokinos naalosenenoto, konye aibois nakesesenenei akou kotupanarete: mam ebelonokinos naalosenenoto.

¹² Eleleba akonyen awatekec owaitin kere, ipuranakec, ka akaninikec, abebenokakec, ka akokoron, kes akokoron nuajaas kesi iwoŋon.

¹³Kapup eoŋ akokoron enyaritai akokoron nuidiridirete.

¹⁴ Ido ajai ŋinidiopet ireeta iwoŋon: ereet losodit kerai ereet loka ekerubi, ereet lokiareit kerai ereet loka etuŋanan, ereet lokiwuniet kerai ereet loka eŋatuny, ka ereet da lokiwoŋonet kerai ereet loka emorukaalet.

¹⁵ Kodokasi ikerubin akuj. Ŋul kes isuban lukajarak luabu kaany kariri kecor Kebar.

¹⁶ Naalosenenoto ikerubin, kolosenenete akokoron kosiepionokec: nakitonyoununoto ikerubin abebenokakec adokar anyoun kokwap, akokoron da mam ebelonokinos anyoun kosiepionokec.

¹⁷ Naabwoenenata ŋul, kobwoete nu da; nakedokanariata ŋul kuju, kodokasi nu da kakes: naarai kejai emoyo loka isuban lukajarak kotomakec.

¹⁸ Koloma aibuses naka EJAKAIT anyoun kariri naka ekek loka etogo, kobwo kokuju kikerubin.

¹⁹ Kitonyout ikerubin abebenokakec, kodokasi anyoun kokwap, ketei eoŋ kwape alomuniata, akokoron da kosiepionokec: kobwaata kokirigi loka erute lokokide loka etogo loka EJAKAIT; kojai da aibuses naka Edeke loka Isirael kokujukec.

²⁰ Ŋul kes isuban lukajarak luabu kaany kokwap ka Edeke loka Isirael kariri naka ecor Kebar; kajenu ebe keraas ikerubin.

²¹ Kejai ŋolidiopet ireeta iwoŋon, ido ŋolidiopet abebenoka aoŋon; aput naka akanin nuka etuŋanan kejai kwap kabebenokakec.

²² Aput da naka ireetakec, keraas ireeta ŋupeŋul luabu kaany kariri naka ecor Kebar, atakanukec ka kes da ikulepek. Kolot ŋolidiopet ederit.