Read Ebaibuli 1961 Esekiel 11 Bible Online

Esekiel 11 - Ebaibuli 1961 bible

Esekiel 11

¹ Bobo da kadaku Emoyo, kayau orute lokokide loka etogo loka Ejakait, loaseseni kide, Ido koany, okirigi loka erute ajaas ituŋa akaisaarei kalukany; kaany kokidiŋikec Yaasania okoku loka Asur, ka Pelatia okoku loka Benaia, ikapolok luka ituŋa.

²Katema eoŋ atiar, “Okoku loka etuŋanan, lu kes ituŋa luepwakete numam adolit, lueinakinete ainerun naerono kore kalo.

³ Luebalas ebe, ‘Eroko apak edolo aiduk itogoi: ere lo ŋes amot, oni da kirai akiriŋ.’

⁴Aso kodwarak kes, kodwar, ijo okoku loka etuŋanan.”

⁵ Kadoik emoyo loka EJAKAIT, katema eoŋ atiar, “Kiner ebe, Inera EJAKAIT kwanata ebe: Ibu kiner kwanata ijo ekek loka Isirael; naarai ajeni akiro nuelomarete otauonokus.

⁶Itupuata iaranakus kore kalo, ilelebata da irotinike iaran.

⁷ Aso do inera EJAKAIT EDEKE kwanata ebe: Iaranakus luiperionokinito kidiŋike, kes akiriŋ, ere lo da amot: konye kilemario yes anyoun kotomakeŋ.

⁸ Iyoŋito ekileŋ; konye ebala Ejakait EDEKE ebe, Kainunete ekileŋ.

⁹ Kalemari yes kokidiŋike, kejaikini yes akanin nuka imo, etodolikini da itubesia kamakus.

¹⁰ Kibirori ekileŋ; katubokini yes koikor loka Isirael; ijenunete da ebe arai eoŋ EJAKAIT.

¹¹ Mam ere lo eraun akusimot, ido mam iraunete akiriŋ kotomake; katubokini yes koikor loka Isirael;

¹² Ijenunete da ebe arai eoŋ EJAKAIT: naarai mam ipotu kolosenenoto kokisilaka, ido mam itodolito ikatubesia, konye iswamata kwape ejaatar itubesia luka atekerin nukirimorito.”

¹³ Kosodi kanen, napadwari, kotwana Pelatia okoku loka Benaia. Kasodi kebiror ebuburia, keworo keporoto loepol kabala ebe, “Wu okwe, Ejakait EDEKE! Itanaŋi teni ijo cut aatoŋot naka Isirael?”

¹⁴Kobu akirot naka EJAKAIT mama ajai ebe:

¹⁵“Okoku loka etuŋanan, iinacanakon, eeba, iinacanakon, ituŋa luka atekerikon, ka ekek kere loka Isirael, kes ŋul luapotu luiboiete koYerusalem kolimokis ebe, ‘Kikunyasi kaneejai EJAKAIT; kiinakinitai sio akwap na araun airumet.’

¹⁶ Aso do kiner ebe, ‘Inera kwanata Ejakait EDEKE ebe: Karaida kalema kes kama elwana kotoma atekerin, karaida keweliwel kes kotoma akwapin, konye araun aibois nakalaunan kamakec nediokasilon kotoma akwapin nuadoloto.’

¹⁷ Aso do kiner ebe, ‘Inera kwanata Ejakait EDEKE ebe: Kedepidepi yes katekerin, katukokini yes kakwapin nuisiarakina, kainakin akwap naka Isirael.’

¹⁸ Naeponiata kaŋina, elemarete kanen iboro kere luasacit ka Italesia kere.

¹⁹ Ainakini kes etau ediopet, ebwaikini emoyo lokitetet kotomakec; alemuni etau lokamoru kawatekec, ainakini da etau loka akiriŋ:

²⁰ tetere elosenenete kokisilaka, koricenenete itubesiaka aiswamaenen: eraunos ikatuŋa, eoŋ da araun Ekecedeke.

²¹ Ebala Ejakait EDEKE ebe, Konye ŋul luelosenenete ikecetauon atupit itauon luka iborokec luasacit, ka italesiakec, etebei akeceswamisio akwesikec kikulepek.”

²² Kosodete kitonyout ikerubin abebenokakec, kojaas akokoron kosiepionokec; kojai da aibuses naka Edeke loka Isirael kokujukec.

²³ Kodoka aibuses naka EJAKAIT anyoun kokidiŋ ore, kobwo koroŋat loejai ari nakokide naka ere.

²⁴ Kadaku Emoyo eoŋ, kayau Kaludea kaitapoet naka Emoyo loka Edeke, mama ejaas ŋul lukijoreoritono. Kosodi konyou aitapoet kamakaŋ.

²⁵ Kasodi kalimok ŋul lukijoreoritono akiro kere nuabu EJAKAIT ketodik.