Read Ebaibuli 1961 Esekiel 16 Bible Online

Esekiel 16 - Ebaibuli 1961 bible

Esekiel 16

¹Kobu bobo akirot naka Ejakait mama ajai ebe:

² “Okoku loka etuŋanan, kitejenik Yerusalem italesiake.

³Kiner atiar, Inera kwanata Ejakait EDEKE kaYerusalem ebe: Ageunetekon, ka auruniokon ajai akwap naka Ekanaanit; Emorait ŋes papakon, totokon da Akitit.

⁴ Nakiwuruunere, kapaaran nakiwuruunere mam aponi kotuboi aliligetekon, kwabo mam aponi kiloŋi kakipi aitalaunia; mam aponi kibwaikin adiobalaŋ, karaida adiokimukorio.

⁵Amamei akoŋu nakitimit, aiswamakin jo ŋun kere, aisioni jo; konye aponi kocakar kiŋa ais, naarai kilaitai, kapaaran nakiwuruunere.

⁶“Kosodi naetorio, kaany ibelibelo kaokotokon, katema atiar, ‘Karaida kijai aokotokon, kojar’; eebo, katema atiar, ‘Karaida kijai aokotokon, kojar.’

⁷Ketupuu kwape aibutunet naka ais, kiyatanakin korau nakapolon, kodolok toma atumun naibus; eburut ikisinakon, apolooros itimakon; konye ijai titai imujalal.

⁸ “Kosodi naetorio, kasesen jo, koany, apakikon kerai apak naka amin; kemuko kanapitoka, karap amujalalakon, Ebala Ejakait EDEKE ebe, Eebo, keyapoik jo, ketutuk aitutuket kajo, korau nakaŋ.

⁹Kasodi keloŋ kakipi; eebo, kelota cut aokotokon, kenyonyoanak akinyet.

¹⁰Ketanap da anapito naesonyitai, ketanap amuk nuka emukule, kemuko kebaputa kaloejok, karapak aliiri.

¹¹ Kesiri da kiisiro, kebwaik aikomon akaninikon, erikot da omurisiŋukon.

¹²Kebwaik itetio okumesikon, kakiikon da, aboko da naetemelel akoukon.

¹³ Kwaŋin ŋes kiisirere kesabu ka epuesa; kerai anapitokon naka ebaputa kaloejok, ka aliiri, ka anapito naesonyitai; konyamenenei atap naidicic, ka esik, ka akinyet. Kitemelel noi noi, kisirereŋi aitodol apolou naka ekabakane.

¹⁴ Ebala Ejakait EDEKE ebe, Kilosikin eemutokon atekerin kanuka atemelelekon; naarai etodolikinitoi, kanuka apolouka naabu kebwaikinite jo.

¹⁵ “Konye ibu komuno atemelelekon, koluor adote kanuka eemutokon, kiporoenenei neejai ŋolidiopet loetori; koraenena nakeŋ.

¹⁶ Ibu kolem inapenekon, kiswamau aiboisio nuiceleleete nuesiritoi kijesesia luegelegela, kodotear kamakec; mam lem ejaenenas nuikote nen, karaida ajaun.

¹⁷Ibu kolem da ikoniboro luejok luka akais nuipu luka esabuka ka luka epuesaka lukainakinit jo, kiswamaa aputosia nuka ituŋa, kodotear kakes.

¹⁸Ibu kolem inapenekon luesonyitai, korapak kes, kibwaik akakinyet ka lukisupurununoka kakonyenekec.

¹⁹ Ebala Ejakait EDEKE ebe, Ikanyamat da lukainakinit jo, atap naidicic, ka akinyet, ka esik, luketanyamenenei jo, ibu kibwaik kakonyenekec araut asakat naeuru saa.

²⁰ Bobo da, ibu kolem ikonidwe lusap ka lupesur, lukiwurikinit eoŋ, koinak ŋul araut asuban mama ejaas kwi ainyam. Kerai kereka akonidoteu ibore yenedit,

²¹ tape iari ikadwe, kijaik kes araut ainakinet naicweio mama ejaas?

²² Ido kotoma otalesiakon kere ka adoteukon, mam ibu kiitu apaarasia nuka eiditeukon, naijaenenar titai imujalal, kibelibelo kaokotokon.

²³“Ebala Ejakait EDEKE ebe, Itukwi, itukwi jo! Kosodi kanen akaulo kanukaronokokon kere,

²⁴ iduku aibois naikumemei, iswamau aibois naiidiara kaŋolirot.

²⁵ Iduku aiboisikon naiidiara asisiarin kere, ituluo atemelelekon araut naketal, ipukok akonikejen mama ejai ŋol kere loitori, iyatanak adoteukon.

²⁶ Ielokinos kimisirian da, ikoniidunyeta lueburok awat; iyatanak adoteukon, aitunyunyurikin eoŋ.

²⁷Aso do koany, kariik akakan, eŋoŋa akorakinetekon, kejaik jo mama ejai akot naka ŋun nukilaito, adwe nuka Ipilisitian, nuirumito ileic kanuka eponekon lokadoteu.

²⁸ Idotear da mama ejaas Iyasurian, naarai mam kipedori atitirikin, eebo, idotear mama ejaas, kwabo mam kiupi.

²⁹Ido bobo iyatanak adoteukon akwap naka Kanaan, kiton Kaludea; kwabo mam ŋun da kiupete.

³⁰ “Ebala Ejakait EDEKE ebe, Ekalanyana ca ma ekonitau! Naarai iswamai nu kere, aswam naka aberu naadote naidelana.

³¹Naarai iduki akoniibois naikumemei kaŋiŋisisiar, kiswamau akoniibois naiidiara kaŋolirot; kwabo mam ibu korai kwape adote, naarai imen eropit.

³²Aberu naadote ba! Naisukunyuni ca ma imo aibois naka okilenike!

³³ Einakinete ituŋa adotea ainakineta; konye jo iinakini ainakinetakon mama ejaas ipailonokon kere, aijodounio, tetere epote neijai ijo kaŋoliwai kanuka adoteukon.

³⁴Igelara ijo kaŋor ace kadoteukon, naarai emamei yenikitupuni jo aelokinor: ido naarai ibu korop, kwabo mam kiropio, kanuka ŋun igelara ijo.

³⁵“Aso do ijo adote, kiira akirot naka EJAKAIT.

³⁶ Inera kwanata Ejakait EDEKE ebe, Naarai abukor akonisilianut, kopukoroi amujalalakon kanuka adoteukon mama ejaas ipailonokon; ido kanuka aputosia kere nuka italesiakon, kanuka aokot nuka idwekon luiinakinit kes;

³⁷ aso do koany, atukonokini ipailonokon kere, luibu kolakanarotor, ka ŋul kere lukimina, ka ŋul da kere luibu kolaite; atukonokini kes ejie kajo kowaitin kere, apukokini kes amujalalakon, koanyutu amujalalakon.

³⁸ Ido katubokini akiro, kwape etubokinere aŋor nuegircte adukokinikec nuebukorete da aokot; ido kainuni aokot nuka adedeŋ ka ekokote.

³⁹ Kakorakini akanin nuka ipailonokon, ecakarete kesi aiboisikon naikumemei, kotiyatiyata aiboisiokon nuiidiara; kilacarete inapenekon, enaŋete ikoniboro lukajokak luka akais nuipu: kinyeinete ijai titai imujalal.

⁴⁰ Kiinunete erioŋet asurokinia jo, kibiribirete kamor, kicumucumata cut kikecekileŋa.

⁴¹ Ido icweete ikonitogoi, itodolikinete etube kamakon kosesenete aŋor nuipu; kesinyeini adoteu, kwabo mam bobo iropi.

⁴² Kwaŋin esimonikinia akadedeŋ kamakon, kinyein ekakokote, eyamakin, komam bobo anyunyurikin.

⁴³ Naarai mam iitununei apaarasia nuka eiditeukon, konye kitakadikin kaŋun kere; ebala EJAKAIT ebe, Aso koany, ayauni eoŋ ekonirot akoukon. “Mam kereka iyatakinit adoteu kotalesiakon kere?

⁴⁴Koany, ŋinituŋanan yeninera awaragasia kiwaragi jo ebe, ‘Epone ka toto, ŋes loka akokuke da.’

⁴⁵Irai ijo akoku naka totokon, naelait okilenike ka ikedwe; irai ijo inac naka akoniinacan, nuelaete ikiliokokec ka ikecedwe, Kerai totokus Akitit, papakus da kerai Emorait.

⁴⁶Kinacikon nakapolon ŋes Samaria, naejai akanikon nakokediany, ŋes ka adweke: kinacikon nadidi naejai akanikon nakoteten, ŋes Sodom ka adweke.

⁴⁷ Konye mam ilosenenei korotinikec, ido mam iswamaenenei kwape ejaatar italesiakec; konye apak naedit, ibosit ijo adepar kes korotinikon kere.

⁴⁸ Ebala Ejakait EDEKE ebe, Kwape ajaria, mam kinacikon Sodom, karaida adweke, eswamaenenete kwape iswamaa ijo ka adwekon.

⁴⁹ Koany, keraas nu numam adolit nuka kinacikon Sodom; aiwoŋonut, ka aimonianakin inyamat, ka aijamam naka akerianut kejaas mamake ka adweke; mam ŋes esigalikinit yenikican ka yenilwaritoi.

⁵⁰ Ido eomikina kesi, kiswamata nuketal kakonyeneka; ŋes kainakini alemar kwape abu ketojokia.

⁵¹ Kwabo Samaria da mam eswamat atutubet naka aronisiokon; konye jo iyatanakini italesiakon adepar kes, iinakinit akoniinacan atakan bala nuedolito kanuka italesiakon kere luiswamat.

⁵²Ijo da, kibwok alopet ikonileic, naarai iinakinit etube loka ainacanakon abeneniar; kanuka aronisiokon nuiswamat nuketal adepar kes, ŋes kitelekaritotor ijo kadolit. Eebo, kitirira, ijo da kibwok ikonileic, naarai iinakinit akoniinacan atakan bala nuedolito.

⁵³ “Ido enyakuni aijoreoriokec, aijoreorio naka Sodom ka adweke, ka aijoreorio naka Samaria ka adweke, ka aijoreorio naka ijoreoritonokon luejaas kakes;

⁵⁴ tetere ibwoki ikonileic alopet, kirumata ileic kanuka ŋun kere nuiswamat, naarai italakari kes.

⁵⁵Eboŋunete do ainacanakon Sodom ka adweke apoloukec nakolo, eboŋunete da Samaria ka adweke apoloukec nakolo; ibonuŋete ijo da ka adwekon apoloukus nakolo.

⁵⁶Mam kereka kiwaragit kinacikon Sodom kapaaran naka aiwononutukon,

⁵⁷ eroko epukoro akonironis? Kwana da iputokinos kaŋes araut naamoromorot naka adwe nuka Edom, ka ŋun kere nuirimorito ŋes, ka adwe da nuka Ipilisitian, nukirimorito kimwaŋito jo.

⁵⁸Ebala EJAKAIT ebe, Ibu kibwok adoteukon ka italesiakon.

⁵⁹ “Naarai inera kwanata Ejakait EDEKE ebe: Keswamakini teni kwape ibu kiswamaa, ijo naimwaŋit aiyaposit kanuka aibil aitutuket.

⁶⁰ Konye eituni akaitutuket kajo naka apaarasia nuka eiditeukon, ido eticasi kamakon aitutuket namam edaun.

⁶¹ Kosodi konyet iituni irotinikon, kirumata ileic, nakainakinia jo ainacanakon, nukapolok ka nudidik; kainakini kes araut adwe, konye mere kanuka akoniitutuket.

⁶² Ido eticasi kamakon akaitutuket: ijenuni do ebe arai eoŋ EJAKAIT.

⁶³ Ebala Ejakait EDEKE ebe, Tetere iituni, itirirai, mam bobo iwooŋari akoniituk, kanuka ileicikon; naadaunia aisioni jo kere nuiswamat.”