Read Ebaibuli 1961 Esekiel 22 Bible Online

Esekiel 22 - Ebaibuli 1961 bible

Esekiel 22

¹Bobo da kobu akirot naka EJAKAIT mama ajai ebe,

²“Ijo da, okoku loka etuŋanan, itubokini, itubokini kereka ijo ere loka aokot? Aso kitejenik ŋes italesiake kere.

³ Kinera ebe, Inera kwanata Ejakait EDEKE ebe: Ere loebukokini aokot kidiŋike, tetere edolokini apakike, loiswamai aputosia amunaaror!

⁴ Igwaunit akirot naka aokot nuibukoo, imunaar kaputosiakon nuiswama; isukuny apaarasiakon, ido idolok okarukon, ŋes kainakini ketuluori amorosit katekerin, ka yenikisekelo kakwapin kere.

⁵Lukiapiatar, ka luelwaka, kisekelete, ijo loejai ekiror lokamunaara, ido ileleba autaar.

⁶ “Koany, ikapolok luka Isirael, ŋinituŋanan kwape ejaar apedorike, kejaenenas kotomakon abukor aokot.

⁷ Kotomakon kemenenenata papa ka toto; kidiŋikon kiswamanakiniata ipejonon nukamwanit: kotomakon kenyamanakiniata kepali yenemamei papake ka apuserut.

⁸ Imwan ikaboro lukalaunak, imunaa da akasabaton.

⁹Kejaenenas ituŋa lukasabanakinak kotomakon abukor aokot: kotomakon da ŋes kenyameneniata koroŋan: kidiŋikon kiswamaeneniata nukadoteu.

¹⁰ Kotomakon kepukoriata amujalal naka lukapapakec: kotomakon kitisilioto aŋor numam alaete kanuka atiakarikec.

¹¹ Ido ejai loiswamai nuketal kaberu naka eidunyeteke; ido ejai ece loemunaari kadoteu aberu naka okokuke; ido ejai ece kotomakon loitisili kinacike, akoku naka papake.

¹² Kotomakon eropio kes abukor aokot; ibu kotukonok ameda aitedepar, idum amakira kama ejaas iidunyetakon kanuka areit; ido ebala Ejakait EDEKE ebe, Kimurwok eoŋ.

¹³ “Aso do koany, atuari akakanin kamakirakon nakaimod naidum, kaokot da nukejaenenas kidiŋikon.

¹⁴ Epedori kereka ekonitau atitiŋikin, arai akonikanin ajaut kagogoŋ, kapaarasia nukeswamakinia? Eoŋ EJAKAIT ener, eswamai da.

¹⁵ Kesiarisiari jo katekerin, keweliweli kakwapin; etanaŋi da amodokokokon kotomakon.

¹⁶ Kosodi imunaar kanukon, kakonyen nuka atekerin; ijenuni ebe arai eoŋ EJAKAIT.”

¹⁷Kobu akirot naka EJAKAIT mama ajai ebe,

¹⁸ “Okoku loka etuŋanan, arau ekek loka Isirael elele kamaka; eraas kesi kere aisinin, ka adebe, ka asua, ka asasin kokidiŋ oupa; eraas kesi elele loka epuesa.

¹⁹Aso do inera kwana ta Ejakait EDEKE ebe: Naarai iraunos kere elele, aso do koany, katukonokini yes kidiŋ Yerusalem.

²⁰Kwape etukonokinere epuesa ka aisinin, ka asua ka asasin ka adebe kidiŋ oupa, aicukokin akim, aisicalaria; katukonokini yes kwaŋin kakanyunyura, kakadedeŋ; kebwaikini nen, kesicalari.

²¹Eebo, katukonokini, kecukokini akim naka akanyunyura, icalaros yesi kokidiŋike.

²²Kwape ecalaror epuesa kokidiŋ oupa, icalaros yesi da kwape kwaŋin kokidiŋike; ijenunete ebe eoŋ EJAKAIT kabukok yes akadedeŋ.”

²³Kobu akirot naka EJAKAIT mama ajai ebe:

²⁴“Okoku loka etuŋanan, kolimok ŋes ebe, Irai ijo akwap namam itesegario ido mam itetepio akiru kapaaran naka aisiop.

²⁵ Enerut inabinoke kokidiŋike, kwape eŋatuny loegat naepoopoaa imejauna: anyamata aijar naka ituŋa; aŋatata iboro luka akais nuipu ka luka etiai loepol; etupuata apuserunuke kokidiŋike.

²⁶ Epaliikis isasedotinike ikakisila, amunaasi ikaboro lukalaunak; mam etiakitos iboro lukalaunak ka luka apakio kere, mam isisianakinito atiaketait kotoma lumam elaete ka luelaete, ebwaata akecekonye kasabatonoka, kamoromoroo eoŋ da kamakec.

²⁷ Esubito ikapolokoke kokidiŋike bala ipeen luepoopoete imejauna; abukor aokot, ka amudiar aijar, tetere imakiraete kaimod.

²⁸ Ido eladaata inabinoke kanukec aitwakaŋ, eanyunete aamameak, edwarakinete kes nukaiŋal, kobalas ebe, ‘Inera kwanata Ejakait EDEKE,’ kwabo mam EJAKAIT inerit.

²⁹ Apotu ituŋa luka akwap komwaŋa, kotupasi aiŋat; eebo, esiyaloŋoŋoto lukican ka luilwaritos, ido amwaŋata imoit atitai.

³⁰ Kamoote ituŋanan kotomakec, yeniketetean abwas, yenebwoi karorwa kakonyeneka kanuka akwap, kenyek amudiar; konye mam abu kaany imodio da.

³¹Ebala Ejakait EDEKE ebe, Kanuka ŋun ŋes abukokinia kes akaisiop; kadau kes kakim naka akanyunyura: etebeik ekecerot akwesikec.”