Read Ebaibuli 1961 Esekiel 23 Bible Online

Esekiel 23 - Ebaibuli 1961 bible

Esekiel 23

¹Kobu bobo akirot naka EJAKAIT mama ajai ebe:

² “Okoku loka etuŋanan, ajaas aŋor aarei, totokec adiopet:

³ kiporoto Misiri; kiporoto koiditeukec: koridakinai ikecekisin kaŋina, kicikakis atibolok nuka abekonutukec kaŋina.

⁴Ikecekiroria Akola nakapolon, ka Akoliba kinacike. Koraut nukaŋ, kouriata idwe lusap ka lupesur. Ikecekiroria da, Samaria ŋes Akola, Yerusalem da ŋes Akoliba.

⁵ “Kiporo Akola nakeraar nakaŋ; kikila ipailonoke, Iyasurian ikeidunyeta.

⁶Lukenapenenete lubulului, ikayaitok ka ijaka, kes kere ikarumunak luimielai, ikebwanenok luibwanenete ibalasin.

⁷Kokorak kes akedoteu, kes kere, ituŋa luseuna luka Asuria: ka ŋol da lokikila ŋesi, komunaar kaputosiakec kere.

⁸Kwabo mam kinyeini akedoteu anyoun kapaarasia nuka Misiri; naarai koperoto kaŋes katumunike, kicikakis atiboloka nuka abekonutuke: kobukokis ŋes akecedoteu.

⁹ Ŋes kakorakinia akanin nuka ipailonoke, akanin nuka Iyasurian, lukikila.

¹⁰ Kopukosi ŋul amujalalake: koyaŋaasi ikedwe lusap ka lupesur, koara ŋes kekileŋ: koraun naejenio kaŋor; naarai aponi kotubokinai akiro.

¹¹“Koany kinacike da Akoliba ŋun, konye kiteleka ŋesi ŋin kapaar naka eikilike, kotoma adoteuke da naitelekarit adoteu naka inacike.

¹² Kikila Iyasurian, ikayaitok ka ijaka, ikeidunyeta, lukenapenenete lukaibuses naepol, ikebwanenok luibwanenete ibalasin, kes kere ikatumunak luimielai.

¹³Kaany ebe emunaara; kotupasi kesi kere edioperot.

¹⁴ Konye kiyatak ŋesi akedoteu: naarai koany ituŋa lukinomakinitai arwatat, aputosia nuka Ikaludean nukinomitai kejese loiraŋaŋai.

¹⁵Koenitos arokoban aŋabesikec, kienienito akwesikec kigoen lukijesesinei, kes kere kotakanete kwape ikapolok, kwape ejaar aput naka Ibabulonin luka Kaludea, akwap nakobukec.

¹⁶Napaanyunia kes kikila, kiyakik ikiyakia koKaludea.

¹⁷Kopotu Ibabulonin mama ejai ŋesi kaperis naka amin, komunaasi ŋes kadoteukec, komunaar kakes, kopianik eketau kes.

¹⁸ Kwaŋin kopuko akedoteu, kopuko da akemujalal: kopianik ekatau ŋes, kwape apianikinia ekatau kinacike.

¹⁹Konye kiyatak adoteuke, kiitu apaarasia nuka atumunike, nueporoo kakwap nako Misiri.

²⁰ Kikila ipailonokec, kosubito awatekec bala awat nuka asigiria, kosubite aurikec bala aur naka ibalasin.

²¹Kwaŋin iitunit adoteu naka atumunikon, nakieikakiniata Imisirian aiburun naka atibolokakon nuka atumunikon.

²² “Aso do, inera kwanata Ejakait EDEKE ebe: Ijo Akoliba, koany, etonyouni ipailonokon asurokin jo, luapianiki ekonitau, ayauni kes asurokin jo kowaitin kere;

²³Ibabulonin, ka Ikaludean kere, Pekod ka Soa, ka Koa, ka Iyasurian kere nepepe kakes: ikatumunak luimielai, kes kere ikayaitok ka ijaka, ikapolok ka ituŋa luejenikina, kes kere ibwanenito ibalasin.

²⁴ Epote kesi asurokin jo ekapitos lujiis, kagalin, ka nukakokoron, ka atukot naka ituŋa; iderakinos ejie kajo kojaas kiupalin ka ibukwi ka akopiran owaitin kere: adakakini kes atubokin akiro, kitubokinete kwape ejaatar itubesiakec.

²⁵Ederakini ekokoteka asurokin jo, kiticanete kadedeŋ. Kituborete ikumesikon, ka akiikon; irikakini ekileŋ akonitutubet naesali. Eyaŋaarete idwekon lusap ka lupesur; icweio akonitutubet naesali kakim.

²⁶ Kilacarete inapenekon, eyaŋaarete lukaseganutukon luejok.

²⁷ Kwaŋin etanaŋia akonidoteu, ka eporokon lokolo iyauni kakwap nako Misiri: tetere mam iteluori akonikonye mamakec, karaida akiitun bobo Misiri.

²⁸ Naarai inera kwanata Ejakait EDEKE ebe: Koany, kakorakini jo akanin nuka ŋul kaluireit, akanin nuka ŋul kaluapianiki etaukon.

²⁹ Kiswamakinete jo nukanar, kidemarete aitaaritoikon kere, kijalakinete imujalal atitai: epukorio amujalal naka adoteukon. Eporokon ka adoteukon kere

³⁰ kiswamakinito kwaŋin naarai ibu kiporo mama ejaas ikapirin, ido naarai imunaar kaputosiakec.

³¹ Ibu kotupa erot loka inacikoo; ŋes kainakinia akolike akanikon.

³² Inera kwanata Ejakait EDEKE ebe: Imasi akoli naka inacikon, Naidul naepol; Kikienare noi kimuario; Naarai igauni ŋesi nuipu.

³³Kilelebikin amera ka aiturur. Akoli naka aitirira ka ajalakinio, Ŋes akoli naka inacikon Samaria.

³⁴ Imasi aikokoor, Iboiboi abelekekake, Icili da ikonikisina: Naarai ebala Ejakait EDEKE ebe, Eoŋ ener.

³⁵ Aso inera kwanata Ejakait EDEKE ebe: Naarai kimurwok eoŋ, kocaka eoŋ kaukon, aso do jo da kibwok eporokon ka adoteukon.”

³⁶ Bobo da kalimok EJAKAIT eoŋ ebe: “Okoku loka etuŋanan, itubokini kereka Akola ka Akoliba? Aso kolimok kes italesiakec.

³⁷ Naarai adoteata, ejaas aokot akaninikec; adoteata aputosiakec; ido etotoroto ikecedwe lusap lukawurikinete akim ainakin ŋun ainyam.

³⁸ Ido bobo keswamakis eoŋ nu: amunaasi akaibois nakalaunan apaaran ŋipeŋin, amunaasi da akasabaton.

³⁹ Naarai kedautu aarakin ikecedwe mama ejaas aputosiakec, kosodete alomar aiboisika nakalaunan kapaaran kaŋin amunaar. Ido koany, kwape kwaŋin eswamaata kotogoka.

⁴⁰ Ido bobo ijukakis anyaraun ituŋa luepote kama elwana: luejukakinio ekiyakia, ido koany, kopotu. Kiloŋ kanuka ŋul, kojuk akonyekon, kisir lukisiro.

⁴¹ Kiboikin aperis nanepuk, kitemonokinitete emesa kiŋarenike, loibwaikinit lukisupurununoka ka akakinyet.

⁴²Kojai eporoto loka ekodet loijamamai kaŋes: koyaunai ikamerak anyoun kamodiŋ nepepe kimukopin; kitanapai ŋun aikomon akaninikec, ka abokoi da nuejok akwesikec.

⁴³“Kasodi eoŋ einer nuka ŋin naemojonikinit adoteu ebe, Kwana edoteete kaŋes, ŋin da kakes.

⁴⁴Kolomasi mama ejai, kwape elomariata mama ejai naadote. Kwape kwaŋin kelomariata mama ejai Akola ka Akoliba, aŋor nukeporok.

⁴⁵ Etubokinete ikadolitok ŋun akiro kwape etubokinere nudotea, ido kwape etubokinere aŋor nuebukorete aokot; naarai eraas nudotea, ejaas aokot akaninikec.”

⁴⁶Naarai ebala kwanata Ejakait EDEKE ebe: “Etonyoikini kes ekodet, kainakin aiiliilio ka aŋatario.

⁴⁷ Ibiribirei kes ekodet kamor, icutarete kikileŋakec; earete ikecedwe lusap ka lupesur, icweete ikecetogoi kakim.

⁴⁸ Kwaŋin etanaŋia eporo kakwap, tetere isisianakinio aŋor kere kinyeis arokor eporokus.

⁴⁹Ido kitacakinio eporokus, ibwokete aronisio nuka aputosiakus: ijenunete do ebe arai eoŋ Ejakait EDEKE.”