Read Ebaibuli 1961 Esekiel 25 Bible Online

Esekiel 25 - Ebaibuli 1961 bible

Esekiel 25

¹ Kobu akirot naka EJAKAIT mama ajai ebe:

² “Okoku loka etuŋanan, kite idwe luka Amon, kodwarak kes.

³ Kolimok idwe luka Amon ebe, Kiirasi akirot naka Ejakait EDEKE; Inera kwanata Ejakait EDEKE ebe: Naarai iner atiar, ‘Uus!’ aimwaŋ akaibois nakalaunan, nakemunaaror; aimwaŋ da akwap naka Isirael, nakitisilere; aimwaŋ da ekek loka Yuda, nakijoreorere;

⁴ aso do koany, kejaikini jo araun airumet naka idwe lukokide, idukurete kesi tomakon, edukokinete ikecetogoi tomakon; enyamete akoniraito, emasete da akonikile.

⁵ Etarauni Raba auj naka ikaalai, ka idwe da luka Amon aperis naka isipanin. Ijenunete do ebe arai eoŋ EJAKAIT.

⁶Naarai inera kwanata Ejakait EDEKE ebe: Naarai ibap akaninikon, kotac kakejekon, kolelak kepali kere lokotaukon akwap naka Isirael;

⁷aso koany, ario akakan mamakon, kejaikini jo araun iŋatat yenika atekerin; keŋadaari jo kotoma otuŋa, ketooliori jo kakwapin: kamudiari. Ijenuni do ebe arai eoŋ EJAKAIT.

⁸ “Inera kwanata Ejakait EDEKE ebe: Naarai inerasi Moab ka Seir ebe, Koany, eputos ekek loka Yuda katekerin kere;

⁹aso koany, aŋaikini ewai loka Moab anyoun koreria, anyoun koreriake lukoikorunoke, aibuses naka akwap, Bet-yesimot, ka Baal-meon, ka Kiriataim.

¹⁰Mama ejaas idwe lukokide, aitiji idwe luka Amon, ainakini kes araun airumet, tetere mam bobo iitunio idwe luka Amon katekerin.

¹¹Atubokini Moab. Ejenunete do ebe arai eoŋ EJAKAIT.

¹² “Inera kwanata Ejakait EDEKE ebe, Naarai eswamak Edom erono ekek loka Yuda ainyaŋ, ebuca noi, enyaŋa kamakec:

¹³Ŋes inerar kwanata Ejakait EDEKE ebe, ariori akakan mama ejai Edom, apiari ituŋa ka itiaŋ; etisili ageun koTeman; aitodol Deden ibiroros kekileŋ.

¹⁴ Ebwaikini Edom ekanyaŋit kakan naka ikatuŋa Isirael; iswamakinete Edom kwape ejaar akanyunyura ido kwape ejaar akadedeŋ. Ebala Ejakait EDEKE ebe, Ejenunete kesi ekanyaŋit.

¹⁵ “Inera kwanata Ejakait EDEKE ebe: Naarai eswamata Ipilisitian enyaŋit, enyaŋata kepali loka otauonokec amudiar kaitusurup namam enaŋi;

¹⁶ aso do inera kwanata Ejakait EDEKE ebe, Koany, ariori akakan mama ejaas Ipilisitian, apiari Ikeretin, amudiari da aatoŋot naka ariri naka aŋolol.

¹⁷ Enyaŋi noi kamakec kairetakin naededeŋ. Ejenunete do ebe arai eoŋ EJAKAIT, naebwaikinia kes ekanyaŋit.”