Read Ebaibuli 1961 Esekiel 28 Bible Online

Esekiel 28 - Ebaibuli 1961 bible

Esekiel 28

¹Kobu bobo akirot naka EJAKAIT mama ajai ebe:

² “Okoku loka etuŋanan, kolimok ekapolon loka Turo ebe, Inera kwanata Ejakait EDEKE ebe: Naarai ekeun ekonitau, Ibu da kiner ebe, ‘Arai eoŋ edeke, Eboiei koicoloŋ loka Edeke, Kokidiŋ kaŋololin’; Kwabo irai etuŋanan, mere Edeke, Karaida itupusit ijo ekonitau bala etau loka Edeke:

³ Koany, irai ijo lokacoa aitelekar Daniel; Mam kimunonikinitai jo nukaiyeiyea kere.

⁴Kanuka acoakon ka ajenunikon idum abar, Idum da esabu ka epuesa Kotoma aiŋadisiakon:

⁵ Kanuka acoakon naepol, ido kanuka agwelanarikon Iyatanak abarakon, Ekeun da ekonitau kanuka abarakon.

⁶ Aso do inera kwanata Ejakait EDEKE ebe: Naarai itupusit ijo ekonitau Bala etau loka Edeke;

⁷ Aso koany, ayauni imo asurokin jo, Lusogim luka atekerin: Eutunete ikecekileŋa Asurokin ajokis naka acoakon, Emunaarete amwekimwekekon.

⁸Kijesarete jo kiton Aipany; Itwani atwanare naka ŋul kaluearitai, Kotau loka aŋololin.

⁹Iriŋa kereka ijo inera ebe, ‘Arai eoŋ Edeke,’ Kakonyen nuka yenikiari? Kwabo irai etuŋanan, mere Edeke, Kakan naka yenikimusuŋi.

¹⁰ Itwani atwanare naka lumam ekepitai Kakan naka imo, Naarai ebala Ejakait EDEKE ebe, Eoŋ ŋes ener.”

¹¹Bobo da kobu akirot naka EJAKAIT mama ajai ebe:

¹² “Okoku loka etuŋanan, kokuudianik ekabaka loka Turo, kolimok ŋes ebe, Inera kwanata Ejakait EDEKE ebe: “Ibu ijo korai aanyunet naka etiai, Ileleba acoa, idoliorit kajokis.

¹³ Ijai kolo toma Eden, emanikor loka EDEKE; Kerai ŋinimoru naketiai arapetekon, Asadia, atopasit, ka daimod. Aberulo, naemelomelot, ka ayaseper, Asapiro, emeralid, ka karubunikol; Iminanakinitai kesabu loegerer. Kitemonokinitoi kapaaran nakisubunere.

¹⁴ Abu kebwaik jo nepepe kekerubi loidari loinyonyoikinitai akinyet; Ibu kojai oroŋat lokalaunan loka Edeke; Kirimi kokidiŋ amor nuka akim.

¹⁵Ibu kodolit korotinikon Ageun kapaaran nakisubunere, Aitodol neatakanuniata numam adolit kamakon.

¹⁶Kanuka aipues naka agwelanarikon, Kilelebi akaje, idiaka; Ŋes kacakaria jo kwape yenemunaara Anyoun koroŋat loka Edeke; Kireŋea jo ekerubi loidari Kokidiŋ kamor nuka akim.

¹⁷ Ekeun ekonitau kanuka ajokisikon; Kimuna acoakon kanuka amwekimwekekon: Kacaka jo kiton akwap, Keperik akonyen nuka ikabakan, Tetere kisesenete.

¹⁸ Kanuka aipues naka numam adolitekon, Kanuka numam adolit nuka agwelanarikon, Imunaa aiboisiokon nukalaunak: Kanuka ŋun etolom akim kokidiŋikon, Kitisisi jo, ketuluo ekurwon kakwap, Kakonyen nuka ŋul kere lukisesenete.

¹⁹Kiumokinete ŋul kere Lukijenete jo kotoma otuŋa: Iraun etasuro, mam bobo ijaun.”

²⁰ Kobu akirot naka EJAKAIT mama ajai ebe:

²¹ “Okoku loka etuŋanan, kite Sidon, kodwarak ŋes,

²² kiner ebe, Inera kwanata Ejakait EDEKE ebe: “Koany, arai eoŋ lokasurupikon, ijo Sidon; Ketopoloor kokidiŋikon, Ejenunete do ebe arai eoŋ EJAKAIT. Kadau aitodolikin itubesia kamake, Ketalaun kamake.

²³ Naarai eyakikini ŋes atular Ka aokot korotinike; Ibirokinos luimusuŋitai kidiŋike, Kanuka ekileŋ loirimori ŋes kowaitin kere, Ejenunete do ebe arai eoŋ EJAKAIT.

²⁴ “Mam bobo ejaununete ikodokodo lueremeremete ekek loka Isirael, karaida ikukwa luisiriebete ŋul luirimorete kes, luiswamakinete kes nukepali. Ejenunete do ebe arai eoŋ Ejakait EDEKE.

²⁵ “Inera kwanata Ejakait EDEKE ebe: Naadaunia atukonokin ekek loka Isirael kotoma otuŋa kama isiarakina, ketalaun kamakec kakonyen nuka atekerin, kosodete iboikinos akwapukec nakainakinit ekabulesit Yakob.

²⁶ Iboikinos nen inapakina; eebo, edukete itocoi, iraete imanikoria luka emusabibu. Iboiete inapakina, kadau aitodolikin itubesia kama kaŋul kere luiswamaete nukepali kowaitin kere. Ejenunete do ebe arai eoŋ EJAKAIT Ekecedeke.”