Read Ebaibuli 1961 Esekiel 3 Bible Online

Esekiel 3 - Ebaibuli 1961 bible

Esekiel 3

¹ Kabala ebe, “Okoku loka etuŋanan, konyam ŋin yenidumuni; konyam anunuket na, kosodi kolot, kolimok ekek loka Isirael.”

²Kasodi kaooŋ akaituk, kainak eoŋ ainyam anunuket.

³Katema atiar, “Okoku loka etuŋanan, kitanyam akonikoik, kisimonik aboikon anunuket na nakainak.” Kasodi kanyam; kowiny kaitukuka kwape kesik.

⁴Kosodi katema eoŋ atiar, “Okoku loka etuŋanan, kolot kodol neejai ekek loka Isirael, kiner akakiro mamakec.

⁵Naarai mam kijukaritai neejai ateker naegelara aŋajepeke, ido luka aŋajep naetiono, nabarai togo loka Isirael:

⁶mere neejaas atekerin nuipu nuegelara aŋajepekec ido luka aŋajep naetiono, lumam ipedori ajenun akirokec, Abeit arai keejukarit neejaas ŋul, ti kiirasi.

⁷ Konye ekek loka Isirael, mam kiirarete; naarai mam keirarete eoŋ; naarai ekek loka Isirael kere eraas luegogoŋ akonyen, ido lueninik itauon.

⁸Koany, etogogoŋ akonikonyen kama ejaas akecekonyen, etogogoŋ ekonireet da koreetakec.

⁹ Kwape egogoŋior eikep adepar alicait, etuluo kwaŋin ereetekon: sirikikurianar kes, karaida ajuruŋuŋ ekwenyekec, karaida kerai ekek lokepali.”

¹⁰Ido katema eoŋ bobo atiar, “Okoku loka etuŋanan, akakiro kere nukalimokini jo, kiyuu kotaukon, kiira da kakoniki.

¹¹Ido kolot, kodol neejaas ŋul luijoreoritai, neejaas idwe luka ikonituŋa, kiner kakes kolimok ebe, ‘Inera kwanata Ejakait EDEKE’; arai iirarete arai eŋerete akiirar.”

¹² Kosodi kadaka eoŋ Emoyo, keira kokauka eporoto loka aunya naepol, inera ebe, Kituritete aibuses naka EJAKAIT kaiboisike.

¹³Keira eporoto loka abebenoka nuka isuban lukajarak eretonokinos, ka eporoto loka akokoron kosiepikec, eporoto loka aunya naepol.

¹⁴ Kosodi kadaka eoŋ Emoyo, kayaŋa: kalot kakadakinit, komulai ekatau, kicasite da akan naka EJAKAIT kamakaŋ.

¹⁵ Kasodi abunore mama ejaas lukijoreoritono Tel-abib, lueboiete kariri naka ecor Kebar, neiboioto, Keboikin mamakec etirirai apaarasia akanykaarei.

¹⁶Kosodi kanen ketuboros apaarasia akanykaarei, kobu akirot naka EJAKAIT mama ajai, ebala ebe:

¹⁷ “Okoku loka etuŋanan, ketarau jo ekedaran loka ekek loka Isirael: aso kiira akiro nuka aitukuka, kikwenya kes kanukaŋ.

¹⁸ Arai katema ikaronon atiar, ‘Abeit itwani’; komam jo ikwenyari ŋes, ido komam inera aikwenyar ikaronon anyoun korotoke loerono, aitajar akeijar; etwanikini ikaronon ŋin toma numam adoliteke; konye etepeseni akeokot kakanikon.

¹⁹ Konye arai ikwenyari ikaronon, kogiri aibelokin ainyein akeronis, karaida anyoun korotoke loerono, etwanikini toma numam adoliteke; konye kitajarite ijo akoniijar.

²⁰ Bobo da, kibelokin ikadoliton ainyein akedolit, kiswama numam adolit, kebwaik eoŋ ekomio kakonyeneke, etwani; naarai mam ikwenyarit, etwanikini toma aronisike, mam iitunio akeswamisio nukadolit nueswamat; konye etepeseni akeokot kakanikon.

²¹ Konye arai ikwenyari ikadoliton, kinyek ikadoliton aidiak, komam ediaki, abeit ejari, naarai acamu aikwenyario; ijo da kitajarite akoniijar.”

²² Kojau akan naka EJAKAIT mamakaŋ kaŋina, kabala ebe, “Konyou, kolot apuuton, kiŋeri eoŋ kajo kaŋina.”

²³ Kasodi kanyou, kalot apuuton: ido koany, abwoi aibuses naka EJAKAIT kaŋina, kwape aibuses naabu kaanyunite kariri naka ecor Kebar: kebiror ebuburia.

²⁴ Kalomak Emoyo, kesibwo kakejeneka; kiner keoŋ, katema atiar, “Kolot, kogolokin togokon.

²⁵ Konye jo, okoku loka etuŋanan, koany, kibwaikinio irikoi, kienere, tetere mam ipedori alomun otuŋa.

²⁶ Esimakakini anajepekeŋ kodokolikon, korau ebaŋ, komam ipedori aitoron kes; naarai eraas ekek lokepali.

²⁷ Konye nakineria eoŋ kajo, esiwooŋari akoniituk, ijo da ilimokini kes ebe, ‘Inera Ejakait EDEKE kwanata’; Ŋin yeniirari, kiira; ka ŋin da yeneŋeri akiirar koŋer; naarai eraas ekek lokepali.