Read Ebaibuli 1961 Esekiel 34 Bible Online

Esekiel 34 - Ebaibuli 1961 bible

Esekiel 34

¹Kosodi kobu akirot naka EJAKAIT mama ajai, kobala ebe:

² “Okoku loka etuŋanan, kodwarak ikecokok luka Isirael, kodwarak, kolimok kes, ikecokok ŋul, ebe, Inera kwanata Ejakait EDEKE ebe: Itukwi ikecokok luka Isirael luitanyamas bonik! Mam ti ikecokok itadakete amerekekin?

³ Inyamete lukasiepai, konapete ajul, koarete luetarioko: kwabo mam itadakete amerekekin.

⁴ Yeniroga mam iticasete, kwabo mam itaŋaleunete yenedek, kwabo mam iderete yenebilil, kwabo mam inyakununete yenereŋearitai, kwabo mam imoenenete yeneoliorit; konye iyaitos kes kagogoŋ ka adedeŋ.

⁵ Kisiarakinos kesi kanuemamear ekecokon: koraut inyamat luka itiaŋ kere luka ais, kisiarakinos.

⁶Kirimoto akamerekekin komor kere, ka ŋoliukot loeoj; eebo, kisiarakinos akamerekekin akwap kere; kwabo amamei yenabu kiŋisiŋisitoi karaida amoun.

⁷“Aso, yes ikecokok, kiirasi akirot naka EJAKAIT:

⁸Inera Ejakait EDEKE ebe, Kwape ajaria, abeit naarai apotu akamerekekin koluoros amejan, koraut da akamerekekin inyamat luka itiaŋ kere luka ais, kanuamamear ekecokon; kwabo mam ikakecokok apotu komoata akamerekekin, konye kitanyamas ikecokok bonik, komam itadakete akamerekekin;

⁹aso, yes ikecokok, kiirasi akirot naka EJAKAIT:

¹⁰ Inera kwanata Ejakait EDEKE ebe: Koany, etusurupi eoŋ ikecokok; eburai da akamerekekin kakanikec, kesinyeik kes aitadak amerekekin; kwabo mam bobo ikecokok itanyamas, Ayuuni akamerekekin kaitukukec, kinyeis araun inyamat kamakec.

¹¹“Naarai inera kwanata Ejakait EDEKE ebe: Koany, eoŋ elopet, eoŋ ba, eŋisiŋisitoi akamerekekin, amouni kes.

¹² Kwape emootor ekecokon ekesipan kapaaran naejaatar amerekekinike ace nuesiarakina neelwana, kwaŋin amoia akamerekekin, ayuuni kes kaiboisio kere kama kisiarakina kapaaran naka idouon ka naka amuton.

¹³ Alemuni kes kotuŋa, atukonokini kakwapin, ayauni kes akwapukec; etadaki kes oroŋan luka Isirael, kariri naka alelesia, ka aiboisio kere nuiboiere kakwap.

¹⁴ Etadaki kes amel, koroŋan luiceleleete luka Isirael eraun anukukec: nepenen eperete anuk naejok, kotosata amel koroŋan luka Isirael.

¹⁵Ebala Ejakait EDEKE ebe, Eoŋ elopet etadaki akamerekekin, kesiperik.

¹⁶ Amouni ŋin yenikeoliorit, enyakuni yenirenearitai, ederi yenebilil, eticasi yenedek: amudiari yenetumit ka yenikagogoŋ; etadaki da kaitub akiro.

¹⁷ “Inera kwanata Ejakait EDEKE ebe, Ka yes da, wu ekasipan, koany, atubokini ibaren ka ibaren, imerekekin kwape ikorwa.

¹⁸ Erai teni kamakus akirot naedit adak amel naatosok, konye kibusakinit tope aipupus kakusikeje amelokus nakesalit? Ido komata akipi nueliiliete, konye kibusakinit tope amunaar nukesalito kakusikeje?

¹⁹Edakasi kereka akamerekekin ŋin naipupusato kakusikeje, emasete da ŋun nuimunaasi kakusikeje?

²⁰“Kanuka ŋun elimokini Ejakait EDEKE kes kwanata ebe: Koany, eoŋ, eoŋ obe, atubokini ibaren luetumito ka ibaren luesenyito.

²¹Naarai iremorete kisiepion ka ikeperin da, iremorete luedekasi kere kamumwarakus, aitodol neisiarakiniata neelwana.

²²Aso etajari ekasipan, mam eraunos bobo imejan; atubokini ibaren ka ibaren.

²³ Adakakini ekecokon ediopet, itadaki ŋesi kes, ŋes ekabulesit Daudi; itadaki kes, eraun ekecokonikec.

²⁴ Eoŋ EJAKAIT araun Edekekec, ekabulesit Daudi da ekapolon kokidiŋikec; Eoŋ EJAKAIT ener.

²⁵ “Etutuki kakes aitutuket naka ainapakin, etanaŋi itiaŋ lukadedeŋak kakwap; iboiete inapakina kamagoro, ejotooros kamonieik.

²⁶ Etuluori kes ka aiboisio da nuirimorito ekaroŋat arereŋ; ainakini elimilim kapakike; eraun da elimilim lokarereŋ.

²⁷ Eraete ikito luka ais araitokec, einakini akwap amioke, ejaikinos akwapukec inapakina; ejenunete do ebe arai eoŋ EJAKAIT, naadaunia aibil akito nuka ajookotokec, ka ayuun da kakanin nuka luetubusianito kes.

²⁸ Mam bobo eraunete imejan mama ejaas ikapirin, karaida Itiaŋ luka akwap ainyam kes; konye iboiete inapakina, komam yenitukuriani kes.

²⁹Etonyoikini kes emanikor loejena, mam bobo epiari ebeli kakwap, karaida aibwok bobo ileic luka ikapirin.

³⁰ Ebala Ejakait EDEKE ebe, Ejenunete do ebe Eoŋ EJAKAIT Ekecedeke ajai nepepe kakes, kes da ekek loka Isirael eraas ikatuŋa.

³¹ Ebala Ejakait EDEKE ebe, Yes da akamerekekin, amerekekin nukoronyika, iraas ituŋa, eoŋ da arai Ekusideke.”