Read Ebaibuli 1961 Esekiel 36 Bible Online

Esekiel 36 - Ebaibuli 1961 bible

Esekiel 36

¹“Ijo da, okoku loka etuŋanan, kodwarak iroŋan luka Isirael, kiner ebe, Yes iroŋan luka Isirael, kiirasi akirot naka EJAKAIT.

² Inera kwanata Ejakait EDEKE ebe: Naarai kinerak yes lokasurup ebe, ‘Uus!’ ido, ‘Aiboisio nuiceleleete nukolo sek araut bo do nukosi’:

³aso kodwar, kiner ebe, Inera kwanata Ejakait EDEKE ebe: Naarai, eebo, naarai kitisiliosi, kojwenyasi kowaitin kere, tetere kirumete nukesalete nuka atekerin, kilimitoi kaŋajepa nuka ikeyalak, ka abekoi naerono naka ituŋa:

⁴ kanuka ŋun, yes iroŋan luka Isirael, kiirasi akirot naka Ejakait EDEKE. Inera kwanata Ejakait EDEKE elimokini iroŋan ka iukon, ka alelesia, ka aditono, ka aiboisio nuiswapito nuesilok, ka ireria luinyeinitai, luaraas imejan ka amorosito mama ejaas nukesalete nuka atekerin nuirimorito.

⁵ Ŋes inerar kwanata Ejakait EDEKE ebe: Abeit ener kotoma akim naka ekokoteka asurokin nukesalete nuka atekerin, ka Edom kere, luaseikinos ikulepek akakwap araun airumet naka aiyalama naka itauonokec kere, kanuka epali loka etau, tetere irumete araut amejat.

⁶ Kanuka ŋun kodwar nuka akwap naka Isirael, kolimok iroŋan ka iukon, ka alelesia ka aditono ebe, Inera kwanata Ejakait EDEKE ebe: Koany, ener kokokoteka, kadedenuka, narai ibwokata ileic luka ikapirin:

⁷ aso inera kwanata Ejakait EDEKE ebe: Ekeu akakan, ebe, Abeit ikapirin lukirimorito, ibwokete kesi ikulepek ikeceleic.

⁸“Konye yes, iroŋan luka Isirael, ipesiarete atenueikikus, koraikis ikatuŋa Isirael araitokus; naarai eapie kes aboŋun.

⁹ Naarai koany, ajai eoŋ owaikus, ebelokin eoŋ mamakus, kikorio kiyeio.

¹⁰ Etupui ituŋa kamakus, ekek kere loka Isirael, kere ba: ejaunete ituŋa oreria, iteteununio aiboisio nuiswapito.

¹¹ Etupui ituŋa ka itiaŋ da kamakus: iyatanakinos, iwuriaros: ketudumikini yes ituŋa kwape lem ijaatar, ka aiswamakin yes ejok aitelekarit ageunetekus. Ijenunete do ebe arai eoŋ EJAKAIT.

¹² Eebo, ainakin ituŋa aitorit nekus, kes ikatuŋa Isirael; kirumete, iraun airumetekec, mam bobo itwataniari kes ikecedwe.

¹³ Inera kwanata Ejakait EDEKE ebe: Naarai kilimonokinete ebe, ‘Inyami ijo ituŋa, itwataniari atekerikon idwe’:

¹⁴ebala Ejakait EDEKE ebe, Aso mam bobo iyatakini ainyam ituŋa, karaida aitwataniar akoniteker idwe.

¹⁵ Ebala Ejakait EDEKE ebe, Mam bobo kesibwoki ileic luka ikapirin, ido mam bobo ibwoki amorosit naka ituŋa, ido mam bobo itiguikini akoniteker.”

¹⁶Bobo da kobu akirot naka EJAKAIT mama ajai ebe:

¹⁷ “Okoku loka etuŋanan, nakiboio ekek loka Isirael kakwapukec, apotu komunaaros korotinikec ka aswamisiokec da: korau ekecerot kakonyeneka bala namam elai naka aberu naibami.

¹⁸ Aso kabukoki kes akadedeŋ kanuka aokot nuapotu kobukokis akwap, kanu da amunaarotor kaputosiakec:

¹⁹ kesiarisiar kes atekerin, kiweliwelai anatar akwapin: katubok kes kwape ejaar ekecerot, ido kwape ejaatar akeceswamisio.

²⁰ Nakedolioto kesi atekerin nualosete, komunaasi ekakiror lokalaunan; naarai kobalas ituŋa ebe, ‘Lu kes ituŋa luka EJAKAIT, anyoutu kesi da kakwapuke.’

²¹ Konye abu ketim ekakiror lokalaunan, loamunaari ekek loka Isirael kotoma atekerin nualosete.

²² “Aso kolimok ekek loka Isirael ebe, Inera kwanata Ejakait EDEKE ebe: Mam eoŋ eswamai kanukus, ijo ekek loka Isirael, dimarai kanuka ekakiror lokalaunan, loipotu komunaasi kotoma atekerin nuilosete.

²³ Etalauni eoŋ ekakiror loepol, loamunaaritai katekerin, loimunaarete yesi kokidiŋikec, Ebala Ejakait EDEKE ebe, Ejenunete do atekerin ebe arai eoŋ EJAKAIT, naetalaunor kamakus kakonyenekec.

²⁴ Naarai kalemuni yes katekerin, katukonok alemun kakwapin kere, ketolomik akwapukus.

²⁵ Ido kabwasi yes akipi nuelaete, ilaunete: kedetarete kotoma amodokokus kere ka aputosiakus da kere.

²⁶ Kainakinete etau lokitetet, ebwaikini emoyo lokitetet tomakus: ido alemuni etau lokamoru kawatekus, kainakinete etau loka akiriŋ.

²⁷ Ebwaikini ekamoyo tomakus, ketoloto kokisilaka, ido iricete ikatubesia, kiswamata da.

²⁸ Iboikinos akwap nakolo kainakini lukapapaakus; iraenenas ikatuŋa, eoŋ da araenena Ekusideke.

²⁹ Ido etajari yes kanumam ailakus kere: anyarauni akima, ka aiyatakin, mam bobo kainunete ebeli.

³⁰ Ido esideneriai araito nuka ikito, ka amio nakomanikor, kinyeis bobo amoromoroo katekerin kanuka ebeli.

³¹ Kosodete aiitun ikusirotin lueroko, ka akusiswamisio numam ajokuka; itakadikinos kanuka numam adolitekus, ka italesiakus.

³² Ebala Ejakait EDEKE ebe, Kojenutu bo, mam eswamai nu kanukus. Kirumata ileic kitiriraata da kanuka ikusirotin, ijo ekek loka Isirael.

³³ “Inera kwanata Ejakait EDEKE ebe: Kapaaran nakedetaria yes kanumam adolitekus kere, esiboikini ituŋa toma oreria, edukio da aiboisio nuiswapito.

³⁴ Ekorio akwap naasil, nakerai naesil kakonyen nuka ŋul kere kalukitorenenete.

³⁵ Ebalasi do ebe, ‘Arau akwap na naasil bala emanikor loka Eden; ireria da lueswapito luasilok ka luatiyanakina abwai ido eboikinos ituŋa toma.’

³⁶ Kosodete ejenunete atekerin nukesalete nukirimorito ebe Eoŋ EJAKAIT aduk aiboisio nuatiyanakina, era da neasil: Eoŋ EJAKAIT ener, eswamai da.

³⁷ “Inera kwanata Ejakait EDEKE ebe: Akoto ekek loka Isirael keŋisenenei eoŋ aiswamakin kes; etupui ituŋa bala esipan.

³⁸Bala esipan loka asuban, bala esipan loka Yerusalem kopucinoke lueseunitai; kwaŋin elelebia ireria lueswapito isipanin luka ituŋa, Ejenunete do ebe arai eoŋ EJAKAIT.”