Read Ebaibuli 1961 Esekiel 38 Bible Online

Esekiel 38 - Ebaibuli 1961 bible

Esekiel 38

¹Kobu akirot naka EJAKAIT mama ajai ebe:

² “Okoku loka etuŋanan, kite Gog, loka akwap naka Magog, ekapolon loka Ros, ka Mesek ka Tubal, kodwarak ŋes,

³kiner ebe, Inera kwanata Ejakait EDEKE ebe: Koany, arai lokasurupikon, ijo Gog, ekapolon loka Ros, ka Mesek ka Tubal.

⁴ Kebelokini jo, kebwaikini igolun abokonyakon, ketolomuni jo ka akonijore kere, ibalasin ka ikebwanenok, kere luenapitos lujiis luilosikino, atukot naepol naejaas iupalin, ka ibukwi, ekapito kere ikileŋa:

⁵Perusia, ka Kus, ka Put nepepe kakes; ejaas kere ibukwi ka akopiran.

⁶ Gomer, ka ikekodeta kere; ekek loka Togarama owaitin lukosaŋe loka agolitomei, ka ikekodeta kere: ituŋa luipu luejaas kajo.

⁷ “Kitemokin, eebo kitemokin ijo ka atukon kere nuetukokina mamakon, koraun ijo ekedaranikec.

⁸ Akaulo kapaarasia nuipu kianyanario: ikar lukawasia ibuni kiton akwap naenyakunio kairum naka ekileŋ, akwap nakitukonokinere ituŋa anyoun katekerin nuipu, oroŋan luka Isirael, luaraas lueswapito duc: konye itolomunio iketuŋa katekerin, iboikinos iyamakina, kes kere.

⁹ Idokari, ibuni bala ekwam loepol, iraun bala edou arapakin akwap, ijo ka ikonikodeta kere, ka ituŋa luipu luejaas kajo.

¹⁰“Inera kwanata Ejakait EDEKE ebe: Kapaaran kaŋin elomarete aomisio otaukon, ipwakuni ijo nukiswama nueroko:

¹¹ Itemari atiar, ‘Adokari kiton akwap naka ireria lumam ebwaitai; alosikini luijamamaete, luiboiete iyamakina, kere luiboiete komameete arwatatin, karaida atiketa ka irutei’:

¹²aiŋat iŋatan ka amej imejan: ibelokini akonikan asurokin aiboisio nulem iswapito nuejaas ituŋa, ka asurokin ituŋa luetukokina anyoun katekerin, luadumunito ibaren ka iboro, luiboiete kokidiŋ kakwap.

¹³ Seba ka Dedan, ka ikagwelanarak luka Tarusis, ka idwe luka iŋatunyo kere, kitemarete atiar, ‘Ibunit kereka ijo aiŋat iŋatan? Itukokinit kereka akonitukot amej imejan? Ayaŋaar epuesa ka esabu, alemar ibaren ka iboro, aŋatar iŋatuna luipu?’

¹⁴ “Aso do, okoku loka etuŋanan, kodwar, kolimok Gog ebe, Inera kwanata Ejakait EDEKE ebe: Kapaaran kaŋin naiboikinotor ikatuŋa Isirael iyamakina, mere ijeni ijo?

¹⁵ Ibuni ijo kaiboisikon kosaŋe loka agolitomei, ijo ka ituŋa luipu, ibwanenito kere ibalasin, atukot naepol, ka ajore da nakos:

¹⁶ Idokuni asurokin ikatuŋa Isirael, kwape kedou loerapakini akwap. Kosodi kanen kapaarasia nukawasia, kayauni jo asurokin akakwap, tetere kajenunete atekerin, naetalaunor kakonyenekec kamakon, ijo Gog.

¹⁷“Inera kwanata Ejakait EDEKE ebe: Ijo kereka ŋol loenerenena eoŋ apeŋo kama kikabulesin inabin luka Isirael, luadwarenenete kapaarasia kakwa ikar luipu ebe kayauni jo asurokin kes?

¹⁸Ebala Ejakait EDEKE ebe, Kosodi kanen kapaaran kaya, naebunio Gog asurokin akwap naka Isirael, elomari akadedeŋ okumesika.

¹⁹ Naarai ener kotoma okokoteka, ka akim naka akanyunyura ebe, Abeit kapaaran kaŋin ejauni amaran naepol kakwap naka Isirael.

²⁰ Emaranete iboro lukecor lukaŋolol, ka akweny nuka apak, ka itiaŋ luka ais, ka iboro kere lueliatos kalup, ka ituŋa da kere luejaas akwap, kanuka abunoreka, eukonorio iroŋan, ibirori neicelelei, ibironoros da arwatatin kere kwap.

²¹ Ebala Ejakait EDEKE ebe, Anyarakini ekileŋ koroŋanaka kere asurokin ŋes; esurokini ekileŋ loka ŋolituŋanan onaceke.

²²Atubokini ŋes katular ka aokot; etetepakini ŋes ka ikodetake, ka ituŋa luipu luejaas kaŋes, akiru naepol, ka akako naepol, ka akim, ka acukuman.

²³Ido etopoloor ketalaun da, etejenun bon kakonyen nuka atekerin nuipu. Ejenunete do ebe arai eoŋ EJAKAIT.