Read Ebaibuli 1961 Esekiel 4 Bible Online

Esekiel 4 - Ebaibuli 1961 bible

Esekiel 4

¹“Ijo da, okoku loka etuŋanan, kolem amatapalit, kibwaik akonyenekon, kigir aput naka ere Yerusalem:

²kirigau, koduk arwatatin asurokinia, kitutu itutio; kiswama iidukurun asurokinia, kibwaik akuta nutiyanakinet airimor.

³ Ido kolem aiwowas naka asuat, kibwaik araun arwatat naka asuat kidiŋikon ka ere: kotereik akonikonyen neejai, aso irigaunio do, ijo da irigauni ŋes, Eraun ŋin aanyunet mama ejai ekek loka Isirael.

⁴“Bobo da koper kosiepikon lokokediany, ebwaikini aiticanet naka ekek loka Isirael mamakon: etiai loka apaarasia nuiperi, kiŋuikin aiticanetekec.

⁵ Naarai kaseik ikar luka aiticanetekec araut kamakon etiai loka apaarasia, kes apaarasia akwat auni ka akaisakanykaoŋon: kwaŋin kiŋuikin aiticanet naka ekek loka Isirael.

⁶Ido, naidaunia aitodolikin ŋun, iperi kosiepikon lokoteten, kiŋuikin aiticanet naka ekek loka Yuda; apaarasia akaisaoŋon, ŋinipaaran erianas kekaru, ŋupeŋun kaseik jo.

⁷Kotereik akonikonyen neejai airigaun naka Yerusalem, kopukorite akonikan; idwari asurokinia ere.

⁸ Ido koany, kebwaik aeneta mamakon, komam ibelokini esiep epuai, aitodol neitodolikinio apaarasia nuka airigaunikon.

⁹“Kolem da eŋano, ka esairi, ka imare, ka ekao, ka akima, ka imumwa da, kibwaik kes obore idiopet, koŋo atap; inyamenenei ŋin apaarasia kere nuiperenenoo kosiepikon, kes apaarasia akwat auni ka akaisakanykaoŋon.

¹⁰Itemenenoo ŋinipaaran inyamat luinyamenenei isekelin [1] akaisaarei: inyamenenei irwan atipet ŋinipaaran.

¹¹Imasenenei akipi nuitemio, idiopet kokanykape yenika ekin: [2] imasenenei irwan atipet ŋinipaaran.

¹²Inyamenenei bala aluŋuren nuka esairi, ipei da kacin nuka ituŋa kakonyenekec.”

¹³ Kobala EJAKAIT ebe, “Kwape kwaŋin enyamenenata idwe luka Isirael inyamatakec lumam elaete, kotoma atekerin nuereŋeari kes.”

¹⁴ Kasodi eoŋ atemar atiar, “Wu okwe Ejakait EDEKE! Koany, mam lem akaijar emunaaritai; naarai ameun koiditeuka kiton kwana mam anyamenenei ŋin yenetwani, karaida yenepoopoot etiaŋ; akiriŋ da naketal mam elomanari aitukuka.”

¹⁵Kosodi ŋesi atemar eoŋ atiar, “Koany, kainak aoret naka aituk aibois naka acin nuka ituŋa, itemonokinenei kanen ikoninyamat.”

¹⁶ Bobo da katema eoŋ atiar, “Okoku loka etuŋanan, koany, abili ebela loka inyamat kotoma Yerusalem: enyamenenete inyamat luitemete, ido iyaloŋoŋoete, emasenenete akipi nuitemete, ido kojuruŋuŋito:

¹⁷ tetere emamikinete inyamat ka akipi, koŋolianakinos kajuruŋuŋ, idokororaros kotoma aiticanetekec.