Read Ebaibuli 1961 Esekiel 41 Bible Online

Esekiel 41 - Ebaibuli 1961 bible

Esekiel 41

¹ Kayau oyekalu, kitem ategerio, alalaukec ikubitin ikanykape epuwai, ka ikubitin ikanykape epuwai, nakerai alalau naka ewema.

²Alalau naka alomaret ikubitin itomon; isiepion luka alomaret keraas ikubitin ikany epuwai, ka ikubitin ikany da epuwai; kitem aojauke, ikubitin akaisaoŋon, alalauke ikubitin akaisaarei.

³Kosodi alomar toma, kitem ŋinitegerioit naka alomaret, ikubitin iarei; ka alomaret, ikubitin ikanykape; alalau naka alomaret, ikubitin ikanykaarei.

⁴ Kitem aojauke, ikubitin akaisaarei, alalauke da ikubitin akaisaarei, koiŋaren keyekalu: katema eoŋ atiar, “Na ŋes aibois nakalaunan noi.”

⁵Kosodi kitem arwatat naka etogo, ikubitin ikanykape; alalau da naka ŋinigola nakosiep, ikubitin iwoŋon, airimor etogo kowaitin kere.

⁶ Eculul agolai nukosiep irwan auni, adiopet kuju kanace: akaisauni kaŋinikiculet, Kolomasi ŋun arwatat naka etogo kanuka agolai nukosiep airimor, tetere igaŋio kanen, komam egoŋakina arwatat naka etogo.

⁷Kiyatanakinos agolai nukosiep alalaar airimor, iwosete kuju: naarai airimor etogo eyatanakin aiwot kuju airimor etogo: ŋes ainakin alalau naka etogo iyatanakin kuju: kwaŋin kidoka anyoun kanakokwap kiton kuju itori aiculet nakokidiŋ.

⁸ Abu kaany da ebe kejai etut airimor: apeteta nuka agolai nukosiep keraas agada adiopet cut naka ikubitin ikanykape lueojak.

⁹Abures naka arwatat nakokiŋa naka agolai nukosiep kerai ikubitin ikany: atutubet nakesali kere aibois naka agolai nukosiep nukotogo.

¹⁰Ido kidiŋ kagolai ajai abures naka ikubitin akaisaarei airimor etogo kowaitin kere.

¹¹Ketereikina ikekia luka agolai nukosiep aibois nakesali, atereikina da ekek ediopet agolitomei, ka ekek ece eŋalakimak: abures naka aibois nakesali kerai ikubitin ikany airimor.

¹²Aduket nakejai kiŋaren kaneatiakaritai kari nakoto alalauke ikubitin akaisakanykaarei; abures da naka arwatat naka aduket kerai ikubitin ikany airimor, aojauke da ikubitin akaisakanykaoŋon.

¹³Kitem etogo, aojauke, ikubitin akwatat; kaneatiakaritai ka aduket nepepe karwatatinike aojauke ikubitin akwatat.

¹⁴Alalau da nakoiŋaren ketogo kokide, ka alaro kerai ikubitin akwatat.

¹⁵Kitem aojau naka aduket koiŋaren kaneatiakaritai naejai kauke, ka ibalasanake epuwai ka epuwai, ikubitin akwatat. Eyekalu da lokotoma, ka agolai nulomaret nuka alaro,

¹⁶ ariri naka ikekia, ka apedon nuagolokino, ka ibalasan luirimorito aiculetakec auni atereikina ariri naka ekek keraparito akito kowaitin kere, anyoun kokwap aitodol apedon; ido keraparitai apedon:

¹⁷aitodol apak nakejai kuju kekek kiton togo lokotoma, kokiŋa da, karwatat da kere airimor kotoma, kokiŋa da, kaitemis.

¹⁸ Kegeritai ikerubin ka idukudukun; kejai edukudukut kidiŋ ekerubi ka ekerubi, kejaas ŋolikerubi ireeta iarei;

¹⁹kwaŋin kejai ereet loka etuŋanan atereikina edukudukut kepuwai, ka ereet loka ikoku yenika eŋatuny atereikina edukudukut kepuwai. Kiswamatai kwaŋin anatar etogo kere airimor;

²⁰kegeritai ikerubin ka idukudukun anyoun kokwap kiton kuju okek: kikoni nen arwatat naka eyekalu.

²¹Oyekalu kejaas ategerio nueriakanara owaitin kere; koiŋaren naka aibois nakalaunan ajai ibore yenasubit bala

²² etem loka akito, amukururuke ikubitin iuni, aojauke ikubitin iarei; agoriaike, kwapuke, ka arwatatinike keraas nuka akito. Katema eoŋ atiar, “Lo ŋes emesa loejai akonyen nuka EJAKAIT.”

²³ Ido eyekalu ka aibois nakalaunan da kere ajaas ikekia iarei.

²⁴Araas ikirigin luka abaoi aarei, abaoi aarei nuesukonokinos; abaoi aarei nuka ekirigi ediopet, ka abaoi aarei nuka ekirigi lokiareit.

²⁵Ido kegerakinitai okirigin luka eyekalu, ikerubin ka idukudukun, kwape ageritere arwatatin; ido kiŋaren kagola nalomaret kokiŋa, kejaas abaoi nueburok nuka akito.

²⁶ Ajaas apedon nugolokino, ka idukudukun epuwai ka epuwai da, kowaitin luka agola nalomaret: kikote nen agolai nukosiep nuka etogo, ka abaoi nueburok.