Read Ebaibuli 1961 Esekiel 44 Bible Online

Esekiel 44 - Ebaibuli 1961 bible

Esekiel 44

¹ Kosodi kenyak korot lokorute lokokiŋa loka aibois nakalaunan, loeseseni kide; ido kegolol.

²Katema EJAKAIT eoŋ atiar, “Esalakini erute lo egolol, mam eŋaario, kwabo emamuun ituŋanan yenelomari, naarai aloma EJAKAIT, Edeke loka Isirael nen; ŋes agolere.

³ Iboikin ekapolon nen, korai ekapolon, anyamanakin atap nen kakonyen nuka EJAKAIT; elomari korot loka agola nalomaret naka erute, ido elomuni korot ŋopeŋol.”

⁴ Kosodi kayaŋa korot lokorute loka agolitomei koiŋaren ketogo; kasesen, ido koany, kileleba aibuses naka EJAKAIT togo loka EJAKAIT: kebiror ebuburia.

⁵ Katema EJAKAIT eoŋ atiar, “Okoku loka etuŋanan, kibwaik ekonitau noi, kosesen kakonikonye, ido kiira kakoniki ŋun kere nukalimokini jo nuka aicorakineta kere nuka etogo loka EJAKAIT, ka ikekisila kere: ido kibwaik ekonitau noi luelomanarete togo, ka luelomanarete da aibois nakalaunan.

⁶ Ido ilimonokini lukepali, kes ekek loka Isirael ebe, Inera kwanata Ejakait EDEKE ebe: Wu jo ekek loka Isirael, kodautu italesiakus kere,

⁷ naarai itolomununete imo, lumam ekepitai kotauon, ido Iumam ekepitai kawat, ajaut toma aiboisika nakalaunan, amunaar ekatogo, naiinanakiniata ikanyamat, atarion, ka aokot da. Ibilata yesi akaitutuket, aiyatakin italesiakus kere.

⁸ Kwabo mam iricito ikaboro lukalaunak: konye ibwaikis yesi imo araut ikaricak akaibois nakalaunan.

⁹ “Inera kwanata Ejakait EDEKE ebe: Emamuun emoit lomam ekepitai kotau, ido lomam ekepitai kakuan, loelomari aiboisika nakalaunan, emoit kere loejaunun toma odwe luka Isirael.

¹⁰ Konye Ilebin lualuluasi kamakaŋ, luapaasi kamakaŋ atupar aputosiakec, naapaaria Isirael, ibwokete kesi numam adolitekec.

¹¹ Konye eraunete kesi ikejaanakinak kotoma aiboisika nakalaunan, aanyanar korutei luka etogo, kijaanakinete da kotogo: earanakinete ŋul ainakinet naicweio, ka asubanit kanuka ituŋa, ido ebwoenenete kakonyenekec aijaanakin kes.

¹² Ebala Ejakait EDEKE ebe, Naarai kijaanakis kes kakonyen nuka aputosiakec, koraut ekomio kanumam adolit mama ejai ekek loka Isirael; ŋes ekeikinia akakan aluikin kes, ido ibwokete numam adolitekec.

¹³ Kwabo mam ikunyunete diekaŋ, aitodol aswam naka esasedoti mamakaŋ, karaida aikunyakin idio koboroka lukalaunak, ka iboro da lukalaunak noi; konye ibwokete ikeceleic, kanuka italesiakec lueswamaenenete.

¹⁴ Konye etuluori kes ikaricak etogo, kanuka aijaanakin kere nakotoma, kanuka akiro kere da nuiswamao kanen.

¹⁵ “Ebala Ejakait EDEKE ebe, Konye isasedotin Ilebin, odwe luka Sadok, luaricenenete akaibois nakalaunan, naapaariata idwe luka Isirael kamakaŋ, ŋul kes ikunyunete diekaŋ, aijaanakin eoŋ; ebwoete kakonyeneka ainakin eoŋ atarion ka aokot.

¹⁶ Elomanarete kesi aiboisika nakalaunan, ikunyununete omesaka, aijaanakin eoŋ, ido ericete akakiro.

¹⁷ Kosodi kanen naelomanariata orutei luka alaro nakotoma, enapenenete inapen luka ebaputa; kwabo mam enapenenete lukajul, naijaanakiniata korutei luka alaro nakotoma, kotoma da.

¹⁸Ejaenenas igoen lukieniena luka ebaputa akwesikec, ka epale loka ebaputa kaŋabesikec; mam enapenenete ibore kere yenisinyinyiri.

¹⁹ Kosodi naelomununiata alaro nakokiŋa, ŋes alaro nakokiŋa naka ituŋa, elacenenete inapenekec luejaanakiniata, kinadakis agolai nukalaunak; kosodete ainap inapen ice, tetere mam italaunete ituŋa kinapenekec.

²⁰ Ido mam ebarenenete akwesikec, karaida aipit itim; konye eŋerenenete itimakec.

²¹ Mam emasenenei ediosasedoti ebino, naelomariata alaro nakotoma.

²² Kwabo mam emanyenenete apuserut, karaida naereŋearitai; konye komanyenenete abekon nuka aur naka ekek loka Isirael, arai apuserut nakerai apuserut naka esasedoti.

²³ Ido isisianakinete kesi ikatuŋa atiaketait kwape ejaar kidiŋ yenikalaunan ka yenika ituŋa kere, itejenikinete da atiaketait kwape ejaar kidiŋ yenimam elai ka yenelai.

²⁴ Etubonokinete kesi naejaatatar ipegeta; etubonokinete kwape ejaatar ikatubesia. Koricito ikakisila ka akaicorakineta opucinoka kere lueseunitai; kitalaununete da asabatonoka.

²⁵ Mam ikunyanakinete yenikatwan amunaaror: konye kanuka papa, arai toto, arai ikokukec yenisapat arai yenipese, arai onace, arai kinaci naemamei ekiliokit, epedorete amunaar.

²⁶ Kedau aitesegaario, kimarakinai apaarasia akanykaarei.

²⁷ Ebala Ejakait EDEKE ebe, Kosodi kapaaran naelomaria aibois nakalaunan, alaro nakotoma, aijaanakin aibois nakalaunan, einakini ber ainakineteke naka adiakar.

²⁸ “Ejaunete kairumet; arai eoŋ airumetekec: kwabo mam iinanakinete alup kotoma Isirael; arai eoŋ alupokec.

²⁹ Enyamenenete ainakineta nuka akiria, ka ainakineta nuka adiakar, ka ainakineta nuka aronis; ido ŋinibore yenipoliatai koIsirael eraun yenikec.

³⁰ Ka luegeete kere luka araito kere nugeet, ka ŋiniinakinet kere naka ŋinibore kere, naka ainakinetakus kere, eraununos nuka isasedotin: iinanakinete da isasedotin atapakus nakainumunum, tetere isirereŋio ekonitogo.

³¹ Mam enyamenenete isasedotin ibore kere yenetwani bon, arai yenepoopootai, arai akweny, arai itiaŋ.