Read Ebaibuli 1961 Esekiel 46 Bible Online

Esekiel 46 - Ebaibuli 1961 bible

Esekiel 46

¹ “Inera kwanata Ejakait EDEKE ebe: Egolio erute loka alaro nakotoma loeseseni kide apaarasia akanykape nuka aswam; konye eŋaanario kasabato, kapaaran da nailamunia elap eŋaanario.

² Elomanari ekapolon korot loka agola nalomaret lokorute lokokiŋa, kobwo eiduny kategerioit naka erute. Itemonokinete isasedotin ainakineteke naicweio, ka ainakinetake nuka ainapakin, emaenenei ŋesi kaneelomarere korute. Kosodi alomun, konye mam ekek egolonokinio aitodol eboŋ.

³ Emaenenete ituŋa luka akwap kokek loka erute kaŋol kakonyen nuka EJAKAIT kasabaton ka nailamununia elap.

⁴ Ainakinet da naicweio naeinanakini ekapolon mama ejai EJAKAIT kasabato eraenena imerekekin ikanykape ludidik lumam eŋwalito, ka emerekek lomam eŋwalit;

⁵ ainakinet da naka akiria eraenena epa ediopet kanuka emerekek, ka ainakinet da naka akiria kanuka imerekekin ludidik kwape epedoria ainakin, ekin da naka akinyet kaŋoli epa.

⁶Kapaaran da nailamunia elap eraenena emoŋ lotobait lodidi lomam eŋwalit; ka imerekekin ludidik ikanykape ka emerekek; eraenenas lumam eŋwalito.

⁷Ido itemonokini ainakinet naka akiria, epa ediopet kanuka emoŋ lotobait, epa ediopet da kanuka emerekek, ido kanuka imerekekin ludidik kwape epedoria, ekin da loka akinyet kaŋoli epa.

⁸Naelomanaria ekapolon, elomanari korot loka agola nalomaret naka erute, ido iboŋonori korot kaŋope kaŋol.

⁹ “Konye naeponenenata ituŋa luka akwap kakonyen nuka EJAKAIT kopucin lueseunitai, ŋol loelomanari korot lokorute loka agolitomei aima, elomununei korot lokorute loka eŋalakimak; ŋol da loelomanari korot lokorute loka eŋalakimak, elomununei korot lokorute loka agolitomei: mam eboŋonori korot lokorute loalomaria, konye itori lokoiŋarenike.

¹⁰Naelomanariata ituŋa, elomanari ekapolon da kakes, ido naelomununiata, elomununei ŋesi da.

¹¹“Kopucin da ka apakio nueseunitai eraun ainakinet naka akiria epa ediopet kanuka emoŋ lotobait, ka epa ediopet kanuka emerekek, ido kwape epedoria ainakin kanuka imerekekin ludidik, ekin da loka akinyet kaŋoli epa.

¹² Ido naitemonokinia ekapolon ainakinet naka akote, ainakinet naicweio, arai ainakineta nuka ainapakin araut ainakinet naka akote mama ejai EJAKAIT, eŋaanakinio erute loeseseni kide, itemonokini da ainakineteke naicweio ka ainakinetake nuka ainapakin, kwape iswamaenenaa kasabaton. Kosodi do elomuni, kedau alomun egolenenoo erute.

¹³ “Itemonokini imerekek yenika ekaru ediopet yenimam eŋwalit araut ainakinet naicweio mama ejai EJAKAIT ŋinipaaran: itemonokini da ŋinitupuruc.

¹⁴Itemonokini da ainakinet naka akiria nepepe kaŋes, ŋinitupuruc, idiopet kokanykape yenika epa, ka idiopet kouni yenika ekin loka akinyet ainyalakinia kakiria nuidicic; ainakinet naka akiria natir mama ejai EJAKAIT kanuka aicorakinet namam enaŋi.

¹⁵Kwaŋin itemonokinioto imerekek, ka ainakinet naka akiria, ka akinyet, ŋinitupuruc, araut ainakinet natir naicweio.

¹⁶“Inera kwanata Ejakait EDEKE ebe: Arai einakini ekapolon idio kodweke ainakinet, erai airumeteke, eraun da nakodweke; eraas alupokec nukiruma.

¹⁷ Konye arai einakini nuka airumuke ainakinet mama ejai idio kobulesinike, eraun nake kiton okaru loka aosikinio; kosodi ainyakakinio neejai ekapolon; konye airumeteke eraun naka odweke.

¹⁸ Bobo da mam ekapolon eyaŋaari airumet naka ituŋa, aireŋear kalupokec; einakini odweke airumet naelemuni kalupoke elopet: kinyeis ikatuŋa aisiarisiarun ŋinituŋanan anyoun kalupoke.”

¹⁹Kosodi ketotor neelomarere, kariri kerute, ketoloma agolai nukalaunak nuka isasedotin, nuesesenete agolitomei: ido koany, kojai aibois agule kari nakoto.

²⁰ Katema eoŋ atiar, “Na ŋes aibois naipoenenoto isasedotin ainakinet naka adiakaret ka ainakinet naka aronis, neepeenenoto ainakinet naka akiria; tetere mam itolomarete alaro nakokiŋa, aitalaunia ituŋa.”

²¹Kosodi ketolom alaro nakokiŋa ketotor agoria aoŋon nuka alaro; ido koany, kojai alaro toma ŋinigor.

²²Kagoria aoŋon nuka alaro, kejaas alaroi nuedisiak nukebwaitai, aojaukec ikubitin akaisaoŋon, alalaukec da ikubitin akaisauni: ŋun aoŋon nukejaas agoria keraas nuka aitemisioit adiopet.

²³Kotomakec, kejai ekokoro loadukitoi airimor kes kere aoŋon, ido kiswamatai kojaas ikial lukipois kwap kikokoron airimor.

²⁴ Kosodi katema atiar, “Lu kes itogoi lukipois, lukipoenenata ikejaanakinak luka etogo asubanit kanuka ituŋa.”