Read Ebaibuli 1961 Esekiel 48 Bible Online

Esekiel 48 - Ebaibuli 1961 bible

Esekiel 48

¹ “Lu kes ikiroria luka atekerin; ageun koikor loka agolitomei, kariri kerot loka Ketulon kiton neelomarere Kamat, kiton Kasar-enan koikor loka Damasiko, kari naka agolitomei eiduny Kamat; iikorunokec kide ka to; Dan, akorakinet adiopet.

²Koikor loka Dan, ageun kokide kiton to; Aser, akorakinet adiopet.

³Koikor loka Aser, ageun kokide kiton to; Naputali, akorakinet adiopet.

⁴Koikor loka Naputali, ageun kokide kiton to; Manase, akorakinet adiopet.

⁵Koikor loka Manase, ageun kokide kiton to; Epuraim, akorakinet adiopet.

⁶Koikor loka Epuraim, ageun kokide kiton to; Reuben, akorakinet adiopet.

⁷Koikor loka Reuben, ageun kokidekiton to; Yuda, akorakinet adiopet.

⁸ “Koikor loka Yuda, ageun kokide kiton to, ejaun ainakinet naiinakinete, alalauke ikubitin ilukumin akaisaarei ka lukany, aojauke kwape akorakinet adiopet, ageun kokide kiton to: ejaun da aibois nakalaunan kidiŋike.

⁹Aojau naka ainakinet naiinakinete mama ejai EJAKAIT eraun ikubitin ilukumin akaisaarei ka lukany, alalauke da ilukumin itomon.

¹⁰Ido ainakinet nakalaunan eraun naka ŋul, kes isasedotin, agolitomei aojauke ikubitin ilukumin akaisaarei ka lukany, to alalauke ilukumin itomon, kide alalauke ilukumin itomon, eŋalakimak da aojauke ilukumin akaisaarei ka lukany: ejaun da aibois nakalaunan naka EJAKAIT kidiŋike.

¹¹ Eraun naka isasedotin luitalaunitai lukodwe luka Sadok, luarieito akaicorakinet; lumam apotu kopaasi naapaariata idwe luka Isirael, kwape apaariata Ilebin.

¹²Eraun kamakec ainakinet naelemunio kainakinet naka akwap, aibois nakalaunan noi, koikor loka Ilebin.

¹³Edumunete Ilebin eiduny keikor loka isasedotin ikubitin ilukumin akaisaarei ka lukany kaojau, ka ilukumin itomon kalalau. Aojau kere ikubitin ilukumin akaisaarei ka lukany, ka alalauke da ilukumin akaisaarei.

¹⁴ Ido mam egwelanarete, karaida aisiecanar adiokalup kaŋun, karaida araito nugeet nuka akwap mam eraunos nuka ice: naarai eraas nukalaunak mama ejai EJAKAIT.

¹⁵ “Ikubitin ilukumin ikany luideuna kalalau, ka akaisaarei ka lukany kaojau, eraunos luebeete ituŋa kere, luka ere, aiboienenoo ka araut ironyia. Ejaun ere kidiŋike;

¹⁶nu kes aitemisioke; kowai loka agolitomei ikubitin ilukumin iwoŋon ka akwat akany, kowai loka eŋalakimak ilukumin iwoŋon ka akwat akany, kowai lokokide ilukumin iwoŋon ka akwat akany, kowai da loko to ilukumin iwoŋon ka akwat akany.

¹⁷Ejaunete ere ironyia; kari naka agolitomei ikubitin akwat aarei ka akaisakany, kari naka eŋalakimak akwat aarei ka akaisakany, kari nakokide akwat aarei ka akaisakany, kari nakoto da akwat aarei ka akaisakany.

¹⁸Luideuna kaojau kowai loka ainakinet nakalaunan ikubitin ilukumin itomon kide, ka ilukumin itomon to; idunyasi kainakinet nakalaunan. Amioke da eraunos inyamat luka ŋul luiswamaete kore.

¹⁹ Ŋul da luiswamaete kore, luka atekerin kere nuka Isirael ekorienenete.

²⁰ Ainakinet kere eraun aojau ikubitin ilukumin akaisaarei ka lukany, alalau da ilukumin akaisaarei ka lukany: iinakinete ainakinet nakalaunan korianas kowaitin iwoŋon, nepepe kalup nuka ere.

²¹ “Atutubet naideuna eraun naka ekapolon, eiduny kainakinet nakalaunan, ka alup nuka ere, epuwai ka epuwai, kosiep loka ikubitin ilukumin akaisaarei ka lukany luka ainakinet atereikin eikor lokokide, kosiep loka ikubitin ilukumin akaisaarei ka lukany atereikin eikor lokoto, atereikina akorakineta, eraun naka ekapolon. Ainakinet nakalaunan, ka aibois nakalaunan naka etogo ejaunete kidiŋike;

²²bobo da ageun kalup nuka Ilebin, ka alup nuka ere, nuejaas kidiŋ katutubet naka ekapolon, kidiŋ oikor loka Yuda, ka eikor loka Benyamin, eraunete nuka ekapolon.

²³“Nuka atekerin nuideuna: ageun kokide kiton to; Benyamin, akorakinet adiopet.

²⁴Koikor loka Benyamin ageun kokide kiton to; Simeon, akorakinet adiopet.

²⁵Koikor loka Simeon, ageun kokide kiton to; Isakar, akorakinet adiopet.

²⁶Koikor loka Isakar, ageun kokide kiton to; Sebulun, akorakinet adiopet.

²⁷Koikor loka Sebulun, ageun kokide kiton to; Gad, akorakinet adiopet.

²⁸ Koikor loka Gad, kari naka eŋalakimak, ejaun eikor ageun koTamar kiton akipi nuka Meribat-kades, kiton aguurut nako Misiri, kiton Aŋolol Nakapolon.

²⁹ Ebala Ejakait EDEKE ebe, Ŋin ŋes akwap naikorokoroete keroet atekerin nuka Isirael araun airumet; ŋun da kes akorakinetakec.

³⁰ “Nu kes alomanareta nuka ere; kari naka agolitomei ikubitin ilukumin iwoŋon, ka akwat akany kaitemisioit:

³¹ emaikinio irutei luka ere ikiroria luka atekerin nuka Isirael; irutei iuni kari naka agolitomei; erute loka Reuben, ka erute loka Yuda, ka erute loka Lebi.

³²Kari nakokide ikubitin ilukumin iwoŋon, ka akwat akany; ka irutei iuni; erute loka Yosep; ka erute loka Benyamin; ka erute loka Dan.

³³Kari naka eŋalakimak, ikubitin ilukumin iwoŋon, ka akwat akany; ka irutei iuni; erute loka Simeon; ka erute loka Isakar; ka erute loka Sebulun.

³⁴Kari nakoto ikubitin ilukumin iwoŋon, ka akwat akany; ka iruteikec iuni; erute loka Gad; ka erute loka Aser; ka erute loka Naputali.

³⁵ Airimor ere ikubitin ilukumin itomon ka akanykauni. Ido ageun kapaaran kaŋin eraun ekiror loka ere, Ejai EJAKAIT nen.”