Read Ebaibuli 1961 Esekiel 5 Bible Online

Esekiel 5 - Ebaibuli 1961 bible

Esekiel 5

¹ “Ijo da, okoku loka etuŋanan, kolem ekileŋ loekwana, kitwasam bala ebarenit loka ekabarenon, kitorio akoukon kopenekekon da: kosodi kolem aitemis aitemio, kotiak itim.

² Icwei atutubet nakiwuniet kakim kokidiŋ ore, naitodolikinere apaarasia nuka airigaun; kolem atutubet nakiwuniet kireb kekileŋ airimor ere; atutubet nakiwuniet da kiwelana neejai ekwam, autuni eoŋ ekileŋ loetupari kes.

³ Ilemuni idis, koen kanapitokon.

⁴ Ilemuni kaŋul da, icakakini kidiŋ akim, icwei kes; namakec elomuni akim nailosikini ekek kere loka Isirael.

⁵Inera kwanata Ejakait EDEKE ebe: Ŋin ŋes Yerusalem: ebwaik kidiŋ atekerin ka akwapin da nuirimorito.

⁶ Abu kipaliik ikatubesia kiswamaenenei nukaronok adepar atekerin, ido epaliiki ikakisila adepar akwapin nuirimorito: naarai agiro ikatubesia, mam da elosenenete kotoma okisilaka.

⁷ Kanuka ŋun ŋes inerar kwanata Ejakait EDEKE ebe: Naarai iloliaka yesi adepar atekerin nukirimorito, kwabo mam ilosikinito ikakisila, komam iricito ikatubesia, karaida aswam kwape elaatar itubesia luka atekerin nukirimorito;

⁸ŋes inerar kwanata Ejakait EDEKE ebe: Koany, eoŋ, eoŋ obe, arai lokasurupikon, etodolikini ikatubesia kamakon kakonyen nuka atekerin.

⁹ Keswamakini jo numam eswamat apeŋo, mam bobo abuni aswam kwaŋin, kanuka italesiokon kere.

¹⁰ Kanuka ŋun enyamete lukapapa idwe kokidiŋikon, idwe da enyamete lukapapakec; etodolikini itubesia kamakon, eweliweli da aatoŋotokon kere mama ejaas ikwamin kere.

¹¹ Ebala Ejakait EDEKE ebe, Aso, kwape ajaria, abeit, naarai imunaa akaibois nakalaunan kanuka iborokon kere luasacit, ka italesiakon kere, kanuka ŋun keŋoŋari jo: mam akakoŋu isionie, ido mam etimi.

¹² Etwani atutubetekon nakiwuniet atular, epiari eteŋei kes kokidiŋikon; eari ekileŋ atutubetekon nakiwuniet airimor; eweliweli da atutubet nakiwuniet mama ejaas ikwamin kere, autuni ekakileŋ loetupari kes.

¹³ “Kwaŋin itodolikinor akanyunyura, esimonikini akadedeŋ kamakec, kasodi aisiyamikin: ejenunete kesi ebe Eoŋ EJAKAIT ener kokokoteka, naadaunia aitodolikin akadedeŋ kamakec.

¹⁴ Bobo da ketuluori asilio ka amorosit kotoma atekerin kere nukirimorito, koanyunete ŋul kere luitorete.

¹⁵ Kosodi eraun amorosit, ka ainyanakin, ka aikwenyaret ka aumokinet da mama ejaas atekerin nukirimorito, naetodolikinio itubesia kamakon kanyunyura ka adedeŋ, kaitoronio naededeŋ: Eoŋ EJAKAIT ener ŋun.

¹⁶ Nakejukakinia imalia lueroko, luka eteŋei, ka luka amudiar, lukejukuni amudiaria; ido eyatakini eteŋei kamakus, abili do ebelakus loka inyamat.

¹⁷ Kejukakini yes eteŋei ka itiaŋ lueroko, itwakiarete lukus; itori atular ka aokot mamakus; kainuni da ekileŋ. Eoŋ EJAKAIT ener ŋun.”