Read Ebaibuli 1961 Esekiel 7 Bible Online

Esekiel 7 - Ebaibuli 1961 bible

Esekiel 7

¹Bobo da kobu akirot naka EJAKAIT mama ajai ebe:

² “Ijo da, okoku loka etuŋanan, inera kwanata Ejakait EDEKE akwap naka Isirael ebe: Awasia! Adolok awasia agoria aoŋon nuka akwap.

³Kwana kidolok awasia, kejukakini akanyunyura, katubokini jo kwape ejaatar ikonirotin; keticani jo kanuka italesiakon kere.

⁴ Kwabo mam kisionie akakoŋu, ido mam etimi; konye keticani kanuka irotinikon, ejaunete da italesiakon kidiŋikon: ijenunete da ebe arai eoŋ EJAKAIT.

⁵“Inera kwanata Ejakait EDEKE ebe: Aronis, aronis adiopet! Koany, ebunit.

⁶Adol awasia, adol awasia alopet; akwenyu asurokin jo. Koany, ebunit.

⁷ Acila kide naka aijarakon, ijo yeniboie kakwap: adol apak, eapie apaaran; apaaran naka elala, konye mere naka eibwoŋ, koroŋan.

⁸ Kwana eapie abukokin akadedeŋ mamakon, ketodoliki akanyunyura mamakon, katubokini jo kwape ejaatar ikonirotin; ido keticani kanuka italesiakon kere.

⁹Kwabo mam isionie akakoŋu, ido mam etimi: keticani kanuka irotinikon, ejaunete da italesiakon kidiŋikon. Ijenunete do ebe arai eoŋ EJAKAIT loadanyi.

¹⁰“Koany, apaaran! Koany, ebunit! Acila kide naka aijarakon; eturo ebela, ibutunit eitur.

¹¹ Apolou akaje araun ebela loka aronis; emameun yenideun kakesi, karaida aipuesikec, karaida abarakec: emameun apolou kamakec.

¹²Adol apak, aeku apaaran die. Kinyek yenegweli ailel, kinyek da yenegwelari akadakin: naarai ejai adedeŋ aipuesikec kere.

¹³Naarai mam eboŋori ikagwelaran neejai yenegwelarit, karaida keroko ejarete, Naarai ikamunit aitapoet aipuesikec kere, emameun yeneboŋuni; ido emameun yeniketakin kanumam edolito nuka aijarake.

¹⁴“Akutata arupepe, akapata kere; konye emamei yenelosi ojie: naarai ejai akanyunyura aipuesikec kere.

¹⁵ Ejai ekileŋ kiŋa, atular da ka eteŋei ejaas toma: ŋin yenejai ais eari ekileŋ; ŋin da yenejai ore, emeori eteŋei ka atular.

¹⁶ Konye ŋul luekuete kakesi ekuete, ido ejaunete oroŋan kwape idudumerun luka aditon, ekuudianete kere, ŋinituŋanan kanumam adoliteke.

¹⁷ Elajakakaros akanin kere, ekalanyakaros da akuŋin kere kwape akipi.

¹⁸ Ido enapete ipukoi, erapari asogim kes; irumete ileic akonyenekec kere, ejaunos ipatai akwesikec kere.

¹⁹ Ecakanakinete ekecepuesa orotin, eraun da ekecesabu ibore yenimam elai; mam epedori epuesakec ka esabukec ayuun kes kapaaran naka anyunyura naka EJAKAIT; mam isimonikinete aijarakec, ido mam ituupete akecekoikes, Naarai keraas ŋul ikomion luka numam adolitekec.

²⁰ Atemelel naka ikecebore yenisirio kiloco araun eitur, konye kiswamaut aputosia nuka italesiakec ka ikeceboro luasacit kaŋes: ŋes etuluoria kamakec kwape ibore yenimam elai.

²¹Ainakini akanin nuka imo araun imejat, ido mama ejaas ikaronok luka akwapin araun iŋatara; emunaarete da.

²²Ido ebelokini kes akasebot, emunaarete da akaibois nakaiyeiyea: elomarete ikaŋatak, komunaasi.

²³ “Kiswama erikot: naarai ileleba akwap iarito, ileleba da ere akaje.

²⁴ Kanuka ŋun ŋes ayaunia lukacekwapin luitelekarito aronis, kiruma itogoikec: etanaŋi da aiwoŋonut naka ikagogoŋok; emunaario aiboisiokec nukalaunak.

²⁵Ebunit amudiar, emoete ainapakin, komam edumunete.

²⁶ Ebuni ameŋeranut kameŋeranut, nukabe da nukabe; emoete aitapoet kaneejai enabi; konye eoliorete ikisila kama ejai esasedoti, ka ainerun da kama ejaas imakio.

²⁷Ibworo ekabaka, enapi ekapolon aburun, emaranete akanin nuka ituŋa luka akwap. Eswamakini kes kwape ejaar ekecerot, ido atubokini kes kwape atubonokiniata; ejenunete do ebe arai eoŋ EJAKAIT.”