Read Ebaibuli 1961 Daniel 1 Bible Online

Daniel 1 - Ebaibuli 1961 bible

Daniel 1

¹ Kokaru lokiwuniet loka airumit naka Yekoiakim ekabaka loka Yuda, abu Nebukadenesar ekabaka loko Babulon kobu Yerusalem, kirigau.

² Abu EJAKAIT kijaik Yekoiakim ekabaka loka Yuda akanike, kice koboro luka etogo loka Edeke; koyaŋa kes akwap naka Sinar togo loka ekedeke: kibwaik iboro aiŋadis togo loka ekedeke.

³Abu ekabaka kolimok Asupenas ekapolokiton ibwacinake aitolomikin ice kodwe luka Isirael, luka aur naka ekabaka ka naka ikapolok da;

⁴ ikatumunak lumam eŋwalito, konye luejokuka akonyen, lueberiaŋ kacoa kere, luepiriaka kaijen, luedesiarete nuituutoorio, ka luibus da aibwo kotoma togo loka ekabaka; ido kisisianak kes acoa naka Ikaludean ka aŋajepekec da.

⁵Kicorak ekabaka adutanakin kes ŋinipaaran inyamat luka ekabaka ka ebino loemasenenei, ido kitanai kes ikar iuni; naedaunotor tetere kes ebwoete kakonyen nuka ekabaka.

⁶Kotoma kaŋul ajaas kodwe luka Yuda, Daniel, Kanania, Misael ka Asaria.

⁷ Abu ekapolon loka ibwacin komaanak kes ikiroria: komaik Daniel Beletesasar; komaik Kanania Sadurak; komaik Misael Mesak; komaik da Asaria Abed-nego.

⁸ Konye kopeleik Daniel kotauke kinyek amunaun kinyamat luka ekabaka, karaida kebino loemasenenei: kanuka ŋun kilip ekapolon loka ibwacin kinyek ŋesi amunaun.

⁹ Abu Edeke koinak Daniel aminunio ka aitimio kakonyen nuka ekapolon loka ibwacin.

¹⁰Kotema ekapolon loka ibwacin Daniel atiar, “Ayoŋit eoŋ ejakaitika ekabaka, loabu kicorak luinyamenenete ka luimasenenete: kinyek aanyun akusikonyen mam ejokuka kwape nuka ikatumunak luka aturikus; kwaŋin iyaunete aronis akouka kama ejai ekabaka,”

¹¹Kosodi Daniel atemar eketeon, loabu ekapolon loka ibwacin koinak ayait Daniel, ka Kanania, ka Misael, ka Asaria ebe:

¹²“Keŋaiŋait, kitem ber ikonibulesin apaarasia atomon; koinanakinete sio idiasio ainyam, ka akipi da aimat.

¹³Kosodete konyet airer akonyenekosi kakonyenekon, ka akonyen da nuka ikatumunak luenyamenenete inyamat luka ekabaka; ido kwape ianyunia ijo, kikwaik nen ikonibulesin,”

¹⁴Kopup ŋesi kes kakirot kaŋin, kitem kes apaarasia atomon.

¹⁵Kosodi ketuboros apaarasia atomon, kotakanut akonyenekec ejok, ido kibukeikinito awatekec, aitelekarit ikatumunak kere luanyamenenete inyamat luka ekabaka.

¹⁶Kosodi do eketeon alemar inyamatakec, ka ebino lotikemasenenete, koinanak kes idiasio.

¹⁷ Konye abu Edeke koinak ikatumunak ŋul iwoŋon aijen ka apirianut kotoma aisisia kere ka acoa; abu Daniel korau lokacobeu kotoma aitapoeta ka airujasia da.

¹⁸Kosodete kedaunos apaarasia nuabu ekabaka kicorak aitolomunia, kitolom ekapolon loka ibwacin kes akonyen nuka Nebukadenesar.

¹⁹Kiyala ekabaka kakes; ido kotomakec kere mam apotu kotakanut lueputos bala Daniel ka Kanania, ka Misael, ka Asaria: kobwaata do kesi kakonyen nuka ekabaka.

²⁰Ido kaŋinikirot kere naka acoa ka aijen, nakiŋisenenei kes ekabaka, koany kes ejok irwan atomon adepar imurwok ka ikasupok luajaas ajakanutuke kere.

²¹ Abu Daniel kojau aitodol okaru losodit loka ekabaka Kuro.