Read Ebaibuli 1961 Daniel 3 Bible Online

Daniel 3 - Ebaibuli 1961 bible

Daniel 3

¹ Abu ekabaka Nebukadenesar kosub aput naka esabu, aojauke ikubitin akaisakanykape, alalauke da ikubitin ikanykape: kosipok apuuton naka Dura, obuku loko Babulon.

²Kosodi ekabaka Nebukadenesar aijukar atukonokin lukibukui, ka luketeok, ka lukitemwan, ikerabak, ka ikeŋadak, ikenerunak, ka iricakisila, ka ijaka kere lukobukui, aponare toma asuban nuka aitan aput naabu ekabaka Nebukadenesar kosipokinite.

³ Kosodete lukibukui, ka luketeok, lukitemwan, ka ikerabak, ka ikeŋadak, ka ikenerunak ka iricakisila ka ijaka kere lukobukui, kotukonokinos kanuka asuban nuka aput naabu ekabaka Nebukadenesar kosipokinite; kobwaata kesi kakonyen nuka aput, naasipokinit ekabaka Nebukadenesar.

⁴ Kosodi lokalimoron aiworoor kuju ebe, “Kicorakinitai yes ituŋa, ka atekerin ka aŋajepa,

⁵naipupunioto aruo naka arupepe, ka alamaru, ka adeudeu, ka ajosi, ka etida, ka esos, ka ŋolipone kere loeruo, kosodete aisuded kere aima aput naka esabu naabu ekabaka Nebukadenesar kosipokinite:

⁶ ido yenimam isudedei aima apak ŋipeŋin, ecakakinio kidiŋ oupa loesarani noi.”

⁷Aso kapak kaŋin kepuput ituŋa kere aruo naka arupepe, ka alamaru, ka adeudeu, ka ajosi, ka etida, ka ŋolipone kere loeruo, kosodete ituŋa kere, atekerin, ka aŋajepa, aisuded aima aput naka esabu naabu ekabaka Nebukadenesar kosipokinite.

⁸ Kosodi kapak kaŋin kikunyakis Ikaludean ice aideide Iyudayan.

⁹ Koboŋokis kotemasi ekabaka Nebukadenesar atiar, “Wu ekabaka Nebukadenesar, kobusi ikar kere.

¹⁰Ijo, wu ekabaka, ibu kibwaik ekisil ebe, ŋin yeniirari aruo naka arupepe, ka alamaru, ka adeudeu, ka ajosi ka etida, ka esos, ka ŋolipone kere loeruo, kisudedei komai aput naka esabu:

¹¹ido ŋin yenimam isudedei ka aima ecakakinio kidiŋ oupa loesarani noi.

¹² Ejaas Iyudayan ice luibu ijo kitopoloo kotoma akiro nuka ebuku loko Babulon, Sadurak, ka Mesak, ka Abed-nego; ituŋa ŋul, wu ekabaka, mam kipodosi jo; mam ijaanakinete idekesiokon, karaida aima aput naka esabu naibu kosipok.”

¹³ Kosodi konyet Nebukadenesar anyunyurikin koresiar kicorak ayaun Sadurak, ka Mesak, ka Abed-nego. Koyaunai ituŋa ŋul akonyen nuka ekabaka.

¹⁴ Koboŋok Nebukadenesar kotema kes atiar, “Yes, Sadurak, ka Mesak, ka Abed-nego, ipeleikinito kereka yesi apele aigir aijaanakin ekadeke, aima da aput naka esabu naabu eoŋ kasipok?

¹⁵ Aso natikwana arai itemonokino kipuput aruo naka arupepe, ka alamaru, ka adeudeu, ka ajosi, ka etida, ka esos, ka ŋolipone kere loeruo, kisudedeoto aima aput naabu kasub, aso; konye arai mam imaete, kicakakinio toma oupa loesarani noi; ido iŋai bo Edeke ŋol Iokiyuuni yes kakaninika?”

¹⁶ Koboŋokis Sadurak, ka Mesak, ka Abed-nego, kotemasi ekabaka atiar, “Wu Nebukadenesar, mam sio ibusakinit aboŋokin jo kotoma akirot kaŋin.

¹⁷ Arai kikwaik nen, epedori Edekekosi lokijaanakini ayuun sio kotoma oupa loesarani noi, kiyuuni da kakanikon, wu ekabaka.

¹⁸ Konye arai mere kwaŋin, kojen, wu ekabaka, kwape mam sio kijaanakinia idekesiokon karaida aima aput naka esabu naibu kosipok.”

¹⁹Kanen, konyunyurikin cut Nebukadenesar, kitegelikin epone loka akonyeneke mama ejaas Sadurak, ka Mesak, ka Abed-nego, kiner, kicorak aitasaran eupa aatenak akanykaarei adepar nelem esarania.

²⁰Kicorak ikagogoŋok ice kaŋul luajaas ajoreke ajen Sadurak, ka Mesak, ka Abed-nego: ka acakakin da toma oupa loesarani noi.

²¹Aponi koenai ituŋa ŋul konapitos ipaleikec, ka ikootinikec, ka ilounakec, ka inapenekec ice, kocakakis kidiŋ oupa loesarani ŋol.

²²Kanuka ŋun naarai abu ekabaka kicorakinite cut kosaranunite eupa noi, apotu aipelonoreta nuka akim koarata ituŋa kwi luetiŋito Sadurak, ka Mesak, ka Abed-nego.

²³ Kodooto ituŋa ŋul luuni, Sadurak, ka Mesak, ka Abed-nego, eenen kidiŋ oupa loesarani noi.

²⁴Kosodi ekabaka Nebukadenesar aumokin, kodetun; kiner kotema ikekenerunak atiar, “Mam nat oni kicakakinit ituŋa iuni eenen kidiŋ akim?” Koboŋokis kotemasi ekabaka atiar, “Abeit, wu ekabaka.”

²⁵ Koboŋok kotema atiar, “Koany, aseseni eoŋ ituŋa iwoŋon elacara, elosete kokidiŋ akim, kwabo emamei kes aronis; asima naka lokiwoŋonet esubit bala okoku loka idekesio.”

²⁶Kosodi kikunyak Nebukadenesar okek loka eupa loesarani noi; kotema atiar, “Sadurak, ka Mesak, ka Abed-nego, yes ibulesin luka Edeke Loejai kuju kakuj, kolomutu, kopotu nee.” Kosodete Sadurak ka Mesak ka Abed-nego alomun kokidiŋ akim.

²⁷ Kotukokinos lukibukui ka luketeok, ka lukitemwan, ka ikenerunak luka ekabaka, aanyun ituŋa ŋul, lumam akim apedorit awatekec, karaida itima luka akwesikec mam asisiito, karaida ikecenapen mam ilocokino, karaida aures naka akim mam ajaas kakes.

²⁸ Kotema Nebukadenesar atiar, “Kituritete Edeke loka Sadurak, ka Mesak, ka Abed-nego, loejukuni ekemalaika, kitajar ikebulesin luapotu komunokinos ŋes, kilocoto da akirot naka ekabaka, kijaikis awatekec kinyeis aijaanakin karaida aima edeke kere nabarai Edekekec bon.

²⁹ Ŋes esilakinia ekisil ebe, ŋulutuŋa, ka ateker, ka aŋajep, luinerenenas aronis kere mama ejai Edeke loka Sadurak, kaMesak ka Abed-nego, ejepejepeo, itogoikec da ituluorio amejei: naarai emamei edeke ece loepedori aitajar kopone kaŋol.”

³⁰Kosodi ekabaka aitopoloor Sadurak, ka Mesak ka Abed-nego, kobuku loko Babulon.