Read Ebaibuli 1961 Daniel 5 Bible Online

Daniel 5 - Ebaibuli 1961 bible

Daniel 5

¹ Kipoik ekabaka Belesasar elukumit loka ijakake epucit, komat ebino kakonyen nuka elukumit ŋol.

² Kiir ŋesi ebino, kicorak Belesasar ayaun iboro luka esabu ka luka epuesa luabu Nebukadenesar papake koŋat koyekalu loajai Yerusalem; tetere emasi ekabaka ka ijakake, ka akeŋor ka akebusian da kotomakec.

³Aponi koyaunai iboro luka esabu luaponi koŋatarai koyekalu loka etogo loka Edeke loajai Yerusalem; komasia ekabaka ka ijakake, ka akeŋor ka akebusian da.

⁴ Komasete ebino, kituritos idekesio luka esabu, ka luka epuesa, ka luka aisinin, ka luka asua, ka luka akito, ka luka amor da.

⁵ Kosawa kaŋol kotakanut ibokor luka akan naka etuŋanan, kiwadik kiŋaren kepir loka atala, karwatat naeladatai naka etogo lokapolou loka ekabaka: koany ekabaka atutubet naka akan naewadikai.

⁶ Kosodi kijulakinos akonyen nuka ekabaka, kisiyaloŋoŋoto ŋes akeomisio; komaranata akojo nuka itulinike, koretonokinos akekunin.

⁷ Kiworo ekabaka aitolomun ikasupok, Ikaludean, ka ikadwarak. Kotema ekabaka lukacoa luko Babulon atiar, “ŋin yenepedori asoman nuiwadikatai nu, ka aitodikin da eoŋ apoloukec, kitanapai lomuge, erikot da loka esabu omurisiŋike, eraun ekayaiton lokiwuniet loka ajakanut,”

⁸ Kolomutu do lukacoa kere luka ekabaka: konye mam apedorete asoman nuiwadikatai, karaida aitejenikin ekabaka apolouke.

⁹Kosodi kiyaloŋoŋ ekabaka Belesasar noi, kijulakinos akekonyen, kobuonokinos ijakake.

¹⁰ Kolom akabaka togo loka epucit kanuka akiro nuka ekabaka ka ijakake, Kotema akabaka atiar, “Wu ekabaka, kobusi ikar kere; kinyeis akoniwomisio aisiyaloŋoŋ jo, karaida akonyenekon aijulakin.

¹¹ Ejai etuŋanan toma ajakanutukon, loejai emoyo loka idekesio lukalaunak kotomake; kapaarasia da nuka papakon aponi kodumunai aica ka aijen ka acoa da tomake kwape kacoa naka idekesio. Abu ekabaka Nebukadenesar papakon, ŋes ekabaka, papakon, kitarau ŋes ekapolon loka imurwok, ka ikasupok, ka Ikaludean, ka ikadwarak da;

¹² naarai kojai kotoma Daniel ŋol loabu ekabaka komaik Beletesasar, emoyo loitelekarit, ka aijen ka apirianut aitejenun apolou naka airujasia, ka abeunun asogolin, ka ailac ilomorun. Aso konyarau Daniel, ŋes da kitodikini apoloukec.”

¹³Kosodi koyaunai Daniel akonyen nuka ekabaka. Kotema ekabaka Daniel atiar, “Ijo kereka Daniel ŋol, loirai lokodwe luka aijoreunio naka Yuda, luejoreuni papaka koYuda?

¹⁴Apupu eoŋ nukon, ebe ejai emoyo loka idekesio kotomakon, ido ejai aica ka aijen ka acoa da naitelekarit tomakon.

¹⁵Kwana do aponi kitolomunai lukacoa, ikasupok, akonyeneka tetere esiomete nuiwadikatai ŋun, ketejenikis da eoŋ apoloukec: konye mam apedorete aitodikin apoloukec.

¹⁶Konye apupu nukon ebe ipedori ijo aitejen apolou, ka ailac ilomorun; aso arai ipedori ijo asoman nuiwadikatai ŋun, ka aitejenikin eoŋ apoloukec, kitanapi lomuge, ka erikot loka esabu omurisiŋikon, iraun ekayaiton lokiwuniet loka ajakanut.”

¹⁷Kosodi Daniel aboŋokin ekabaka ebe, “Koraut ainakinetakon nukon, koinak da ece iropitokon; konye asomakini eoŋ ekabaka nuiwadikatai, etejenikini ŋes apoloukec da.

¹⁸ Wu jo ekabaka, abu Edeke loejai kuju kakuj koinak Nebukadenesar papakon ajakanut, ka apolou, ka aibuses, ka apedor:

¹⁹ ido kanuka apolou naabu koinak ŋes, komaranata koyoŋito ituŋa kere, ka atekerin ka aŋajepa kakonyeneke: yenakoto ŋesi aiar, abu koar, yenakoto aidar ejari, abu kidar; yenakoto adakakin, abu kodakak, ka yenakoto da aitisil, abu kitisil.

²⁰ Konye naeomiaror eketau, koninikiar da ekemoyo tape iswamai nukeitur, aponi kolemarai koicoloŋoke loka ekabakane, kodemarai da akeibuses:

²¹ kireŋearai kodwe luka ituŋa; korau eketau kwape kitiaŋ, kiboienenei kitukoi; kitanyamai anya kwape imoŋin, kopalal akekuan kakopyo nuka akuj: aitodol naajenunia ebe irumit Edeke loejai kuju kakuj ajakanut naka ituŋa, ido edakakini ŋin yenekoto ŋesi.

²² Ijo da, okokuke, wu Belesasar, mam itasonikino kotaukon, karaida ibu kojen ŋun kere;

²³ konye iomiara aluikin EJAKAIT loka akuj; apotu koyaut iboro lukotogoke akonyenekon, ipotu komasiata ebino, ijo ka ijakakon, ka aŋorokon, ka abusianakon da; ibu kiturite idekesio luka epuesa, ka luka esabu, ka luka aisinin, ka luka asua, ka luka akito, ka luka amor da, lumam eanyunete, karaida akiirar, kwabo mam ejenete da: konye Edeke loejai eiyeŋanekon akanike, loerai elopet ikonirotin kere, mam ibu kitopoloo.

²⁴“Kosodi aponi kijukunai atutubet naka akan anyoun kakonyeneke, aponi kiwadikai nuiwadikatai nu.

²⁵Na ŋes aiwadika naewadikatai, MENE, MENE, TEKEL, UPARASIN. (Apolouke Kimario, kimario, kitemio, atiakatiakauneta.)

²⁶ Na ŋes apolou naka akirot; MBNE; abu Edeke kimar akonijakanut, kitanaŋ da.

²⁷ TEKEL; kitemitoi jo kaitemisioit, ido itakanu ikadit.

²⁸ PERES; etiakak akonijakanut, einakinio Imedin ka Iperesian.”

²⁹Kosodi Belesasar aicorakin, kitanapai Daniel lomuge, konapakis erikot loka esabu omurisiŋike, kolimoroi nuke ebe, korau ekayaiton lokiwuniet loka ajakanut.

³⁰ Kakuare kaŋin koarai Belesasar ekabaka Ekaludeat.

³¹ Kirum Dario Emedit ajakanut, korai loka ikar kwaka akaisakanykape ka luarei.