Read Ebaibuli 1961 Daniel 6 Bible Online

Daniel 6 - Ebaibuli 1961 bible

Daniel 6

¹ Kitojok Dario adakakin kajakanut lukibukui akwatat ka akaisaarei, luejaunos anatar ajakanut kere;

² Kopolokinito kes ikayaitok iuni, korai Daniel ediopet kakes; tetere imarete lukibukui ŋul ikeceboro mama ejaas, komam ekabaka etwaniari luke.

³ Kosodi kodakakinai Daniel ŋol aitelekarit ikayaitok ka lukibukui, naarai ejai emoyo loitelekarit kotomake: komuno ekabaka adakakin ŋes ayait ajakanut kere.

⁴ Kosodete ikayaitok ka lukibukui amoot akiro nukiwosaet Daniel kotoma ajakanut; konye mam apedorete adumun akiro karaida aibucaret; naarai kerai ŋesi lomunot, amamei apaar karaida aibucaret kotomakeŋ.

⁵Kosodete ituŋa ŋol atemar atiar, “Mam kianyuni akiro nuluikinet Daniel ŋol, dimikito kiiluiki ŋes kanuka ekisil loka Edekeke.”

⁶ Kosodete kotukonokinos ikayaitok ka lukibukui mama ejai ekabaka, kotemasi ŋes kwanata atiar, “Ekabaka Dario, kobusi ikar kere.

⁷Apotu ikayaitok kere luka ajakanut, iketeok ka lukibukui, ka ikenerunak, ka lukitemwan, kinerutu nepepe aisilakin ekisil loka ekabakane, ido aitogogoŋ aicorakinet ebe, ŋin yenilipi akirot mama ejai edeke kere arai ituŋanan kere adaun apaarasia akaisauni, dimikito ilipi mamakon, wu ekabaka, ecakakinio ŋin toma abua naka iŋatunyo.

⁸ Aso do, wu ekabaka, kitogogoŋ aicorakinet, kiwadika ekonikiror toma nuiwadikatai, tetere mam ilocokinio, kwape ejaatar ikisila luka Imedin ka Iperesian, lumam ijulakinos.”

⁹ Kibwaik teni ekabaka Dario ekekiror nuiwadikatai ka aicorakinet.

¹⁰ Kejenu Daniel ebe etogogoŋi nuiwadikatai, koloma togoke; konaanara do akedirisan kagolake, nuiteete Yerusalem; kokukonokin kakuninike irwanauni ŋinipaaran, kilip, kimala kakonyen nuka Ekedeke, kwape atapitor aswam.

¹¹Kosodete ituŋa ŋul atukonokin, kodumut Daniel ilipi iŋaiŋai kakonyen nuka Ekedeke.

¹² Kosodete kesi aikunyakin, kinerasi kakonyen nuka ekabaka nuka aicorakinet naka ekabaka ebe; “Mam kereka jo ibwaikinit ekonikiror aicorakinet ebe ŋinituŋanan yenilipi akirot mama ejai edeke kere arai ituŋanan adaun apaarasia akaisauni, dimikito ilipi mamakon, wu ekabaka, ecakakinio abua naka iŋatunyo?” Koboŋok ekabaka kotema atiar, “Erai nakabeit, kwape ejaatar ikisila luka Imedin ka Iperesian, lumam ijulakinos.”

¹³ Kosodete kesi aboŋokin kotemasi kakonyen nuka ekabaka atiar, “Daniel ŋol, loerai lokodwe luka aijoreunio naka Yuda, mam epodokino jo, wu ekabaka, karaida aicorakinet naibwaikinit ijo ekonikiror, konye ilipenenei irwan auni ŋinipaaran.”

¹⁴ Kosodi kepupu ekabaka akiro ŋun, kokadak noi, kibwaik eketau aitajar Daniel: kouta aitajar ŋes aitodol nealomaria akoloŋ.

¹⁵Kosodete ituŋa ŋul atukonokin mama ejai ekabaka, kotemasi ekabaka atiar, “Wu ekabaka, kojenu ebe erai ekisil loka Imedin ka Iperesian ebe mam epedori aicorakinet karaida ekisil loitogogoŋi ekabaka ailocokinio.”

¹⁶ Kicorak do ekabaka, koyaut Daniel, kocakakisi ŋes abua naka iŋatunyo. Kiner ekabaka, kotema Daniel atiar, “Kitajari jo Ekonideke loijaanakinenei tiritir.”

¹⁷ Aponi koyaunai amoru, kibwaikinai aituk naka abua; komacarik ekabaka kemacarike, ka emacar loka ijakake; tetere mam nuka Daniel ilocokinio.

¹⁸ Kosodi do kolot ekabaka togoke lokapolou, kikany eteŋei akuare kiya: kwabo mam aponi koyaunai lueruosi kakonyeneke: kikoleroto akekonyen.

¹⁹Kodilok ekabaka anyoun tupuruc sek, koruruk alosit abua naka iŋatunyo.

²⁰ Nakikunyakinia abua mama ejai Daniel, kodelo keporoto lokican: kiner ekabaka kotema Daniel atiar, “Wu Daniel, ekejaanakinan loka Edeke lokajaran, epedorit kereka Edekekon loijaanakinenei ijo tiritir aitajar jo kama ejaas iŋatunyo?”

²¹ Kosodi Daniel atemar ekabaka atiar, “Wu ekabaka, kobusi ikar kere.

²² Abu Ekadeke kijuk ekemalaika, kitubuta aituke nuka iŋatunyo, mam kesiriebito eoŋ: naarai amamei eoŋ aitoronio kakonyeneke; ido kakonyenekon da, wu ekabaka, mam abu keswama aronis.”

²³ Kiton ekabaka alakar noi jokan, kicorak alemun Daniel kabua. Kolemunai do Daniel kabua, mam abu koany adioronis, naarai abu komunokina Ekedeke.

²⁴ Kicorak ekabaka, koyaunai ituŋa ŋul luerupeete Daniel, kocakakinai abua naka iŋatunyo, kes, ka ikecedwe, ka aŋorokec da: apotu iŋatunyo kopedosi kes, kobilibilata akojokec kere, eriŋa kedolo kwap kabua.

²⁵ Kosodi ekabaka Dario aiwadikakini ituŋa kere, ka atekerin, ka aŋajepa, luiboienenete akwap kere ebe: “Kiyatanakin ainapakin mama ijaas.

²⁶ Esilak eoŋ ekisil, toma ayaeta kere nuka ajakanutuka komaranete ituŋa koyoŋito kakonyen nuka Edeke loka Daniel: Naarai erai ŋesi Edeke lokajaran, Icasit ikar kere, Akejakanut da mam emudiario, Ejaunun airumiteke kiton osaŋe:

²⁷ Eyuuni ŋesi, itajari da, Iswamai ŋesi aanyuneta ka nukaumokin Toma akuj, toma akwap da; Loabu koyu Daniel Kapedor naka iŋatunyo.”

²⁸ Kokerianar do Daniel ŋol kairumit naka Dario, kairumit da naka Kuro Eperesiat.