Read Ebaibuli 1961 Daniel 7 Bible Online

Daniel 7 - Ebaibuli 1961 bible

Daniel 7

¹ Kokaru losodit loka Belesasar ekabaka loko Babulon, koany Daniel airujasit ka aitapoeta nuka akouke, kaperitike: kosodi ŋesi aiwadik airujasit, kolimo aomisioit naka akiro kaŋun.

²Kiner Daniel atiar, “Abu kasesen kaitapoeteka kuare, ido koany, komotakinos ikwamin luoŋon luka akuj aŋolol nakapolon.

³ Kolomut itiaŋ iwoŋon lukos kaŋolol, luegelegela.

⁴ Koputos losodit bala eŋatuny, kojaas kabebenoka nuka emorukaalet: abu kaany aitodol naedimere ajul nuka abebenokake, kitonyounoi kakwap kitobwoai kakejen aarei kwape etuŋanan, aponi koinakinai ŋes etau loka etuŋanan.

⁵ Ido koany, ecetiaŋ, lokiareit, kwape kedubu, kikiara osiep ediopet, ajaas amarana auni aitukuke ekonyitos ikelake: kotemarai kwanata ebe, ‘Konyou, konyam akiriŋ naepol.’

⁶ Akaulo kaŋun abu kasesen, ido koany, ece kwape eris, kojaas opurake abebenoka aoŋon nuka akweny; ajaas etiaŋ kakwes aoŋon; aponi koinakinai ŋes ayait.

⁷ Akaulo kaŋun abu kasesen kaitapoeta nuka akuare, ido koany, etiaŋ lokiwoŋonet, loketasuro losogim, ido lokagogoŋ naepol noi; kojaas kikel lukos lukasua: konyam, kobilibil, kipudapud da luedeunos kakejeke: kogelara kitiaŋ ice kere luageikinete ŋes; kojaas kamumwara atomon.

⁸ Abu kerere amumwara, ido koany, kolom kotomakec amumwarat ace, naedit, aponi korutoroi amumwara auni kaŋun nusodit kakonyeneke; ido koany, kojaas akonye toma amumwarat ŋin kwape kakonye nuka etuŋanan, ka aituk da naenera nukos.

⁹ Abu kasesen aitodol neebwaikinere iicoloŋo, kiboikin emojoŋ loŋorot: ekwaŋ akenapito kwape kakako, itima da luka akouke kwape kajulo nuliogot nuka amerekek; eicoloŋoke kosubite bala aipelonoreta nuka akim, akekokoron da bala akim naesarani.

¹⁰ Kolom ecor loka akim kolelei akonyeneke: kijaanakinete ŋes ilukumin elukumit, kobwoete ilukumin itomon irwan ilukumin itomon kakonyeneke: kojau etube, kopukoroi iitabon.

¹¹ Abu kasesen kapak kaŋin kanuka eporoto loka akiro nukos nuenera amumwarat; abu kasesen aitodol neaarere etiaŋ, komudiarai akekuan, koinakinai aicweio kakim.

¹²Luesalito da luka itiaŋ aponi kolemarai ayaitekec, konye aponi kiyatakinai aijarakec ekaru ka apak.

¹³ Abu kasesen kaitapoeta nuka akuare, ido koany, kobu etuŋanan kodouon luka akuj loesubit bala okoku loka etuŋanan, kobu ŋesi mama ejai emojoŋ loŋorot, kisukunyikinai kakonyeneke.

¹⁴ Aponi koinakinai ŋes ayait, ka aibuses, ka ajakanut, tetere ijaanakinete ŋes ituŋa kere, ka atekerin, ka aŋajepa. Ayaitike erai ayait namam enaŋi, namam etubor, akejakanut da namam emudiario.

¹⁵“Ido eoŋ, Daniel, kokadak emoyoka kotoma akuanaka, kesiyaloŋoŋoto aitapoeta nuka akouka.

¹⁶Abu kekunyak ediopet kaŋul luabwoete kanen keŋit ŋes abeit naka ŋun kere. Aso kalimok ŋesi eoŋ ketejen apolou naka akiro, ebe,

¹⁷‘Itiaŋ ŋul lukos, luimwaasi iwoŋon, kes ikabakan iwoŋon luelomunete kakwap.

¹⁸ Konye einakinio lukalaunak luka ŋol loejai kuju kakuj ajakanut, ido irumete ajakanut ikar kere, kes ikar ka ikar.’

¹⁹“Kasodi kepuda ajenun abeit naka etiaŋ lokiwoŋonet, loegelara kakesi kere, loketasuro loepol noi, lokejaas kikel lukasua, ka abelekekake nukaisinin; loabu konyam, kobilibil, ka aipudapud da luedeunos kakejeke.

²⁰Ido nuka amumwara atomon nuajaas akouke, ka amumwarat ace naabu kolom, kibirokinos auni akonyeneke; amumwarat ŋin naajaas akonye, ka aituk naenera nukos, naatakani ebur aitelekarit nuceke.

²¹ Abu kasesen, ido kojiikinos amumwarat ŋin kalukalaunak, kipiko kes;

²² aitodol naebunio Emojoŋ loŋorot, kotubokinai akiro mama ejaas lukalaunak luka ŋol loejai kuju kakuj; kodol apak naerumiata lukalaunak ajakanut.

²³“Kotema kwanata ebe, ‘Eraun etiaŋ lokiwoŋonet ajakanut nakiwoŋonet kakwap, naegelara kajakanuto kere, enyamari akwap kere, ipudapudai, ebilibilei da.

²⁴ Ido amumwara ŋun atomon, enyounete ikabakan itomon kotoma ajakanut ŋin: enyouni da ece atupakin kes; kogelara ŋesi kaŋul lusodit, elemari da ikabakan iuni.

²⁵ Ido inera ŋesi akiro aluikin ŋol loejai kuju kakuj, kitaari lukalaunak luka ŋol loejai kuju kakuj; eomit ailoc apakio ka ikisila; einakinio akanike adaun apak, ka apakio ka atutubet naka apak.

²⁶Konye ejauni etube, elemarete akeyaetait, apiar ka amudiar da kiton awasia.

²⁷ Ido ajakanut ka ayaetait, ka apolou da naka ajakanuto nuejaas kwap kakuj kere, einakinio ituŋa luka lukalaunak luka ŋol loejai kuju kakuj: akejakanut ŋes ajakanut namam enaŋi, ijaanakinete ŋes ayaeta kere, erimarete da.’

²⁸ “Esaŋi ne akirot. Ido eoŋ, Daniel, apotu akaomisio kesiyaloŋoŋoto noi, kijulakinos akakonye: konye abu karic akirot ŋin kotauka.”