Read Ebaibuli 1961 Daniel 8 Bible Online

Daniel 8 - Ebaibuli 1961 bible

Daniel 8

¹Okaru lokiwuniet loka airumit naka ekabaka Belesasar ketaanyikin eoŋ Daniel aitapoet, atupakin ŋin naesiauni aitaanyikin eoŋ.

² Abu kaany kaitapoet; kikoni neta, naanyunia kajai Susan, etogo lokapolou loejai obuku Elam; ido abu kaany kaitapoet, bala ajai ariri kecor Ulai.

³Kasodi aiteluor akakonye, kasesen, ido koany, kobwo emerekek kariri naka ecor, loejaas amumwara aarei: koojak da amumwara ŋun aarei; konye kodeparite adiopet nace, ido kobwaŋu naedeparit kokau.

⁴ Abu kaany emerekek eremonori ari nakoto, ka agolitomei, ka eŋalakimak da; emameete itiaŋ luepedorete aibwo kakonyeneke, emamei da yenepedori ayuun kakanike; konye kiswama kwape akotor, kitopolooro bon.

⁵Napaomoomoi eoŋ, koany, kobu ekoroi ebuni koto, koŋata akwap kere, komam etirorit akwap: kojai ekoroi amumwarat naedelelei kidiŋ akonyeke.

⁶Kobu ŋesi mama ejai emerekek loajaas amumwara aarei, loabu kaany ebwoi kariri kecor, komotakin ŋes kadedeŋ naka apedorike.

⁷Kaany ŋes ikunyakinit emerekek, konyunyurik ŋes noi, konaŋ emerekek, kopaka amumwarake aarei; amamei da emerekek apedor aibwo kakonyeneke: konye kibirok kwap, kipudapud; amamei da yenepedori ayuun emerekek kakanike.

⁸ Kitopoloor ekoroi bon noi noi: kosodi kegogoŋor, kopakar amumwarat nakapolon; kolomut amumwara aoŋon nuedeleleete aiboisike kotereikina ikwamin luoŋon luka akuj.

⁹ Kolom amumwarat naedit kotoma adiopet kakesi, naabu kopoloor noi kari naka eŋalakimak, ka nakokide, ka ari da naka akwap nakaibuses.

¹⁰ Kopoloor, kiton ajore naka akuj; kocakak ace kajore naka aacer kwap, kipudapud.

¹¹ Eebo, kitopolooro bon, kiton neejai ekapolon loka ajore; kolemakama ejai ŋesi ainakinet naicweio natir, kotiyaikinai aiboisike nakalaunan.

¹²Kijaikinai da ŋes ajore nepepe kainakinet naicweio natir kanuka aibucaret; kocakak abeit kwap, kiswamai nuipuda kokerianar.

¹³ Kasodi eoŋ aipup ekalaunan inera; kotema ekalaunan ece ŋol loenera ebe, “Itodoli bo ai ejauni aitapoet naka ainakinet naicweio natir, aibucaret da naitisili, aijaikin aibois nakalaunan ka ajore da aipudapudao kakeje?”

¹⁴Katema ŋesi eoŋ atiar, “Kiton atiboŋa ka atupuruco alukumin aarei ka akwat auni; ŋes konyet itesegaarere aibois nakalaunan.”

¹⁵Kosodi kanen, kadau eoŋ, ŋes eoŋ Daniel, aanyun aitapoet, abu kakoto ajenun ŋes; ido koany, kobwo kakonyeneka yenesubit bala etuŋanan.

¹⁶ Abu kapup eporoto loka etuŋanan kokidiŋ Ulai, loeworoi, kobala ebe, “Gaburiel, kitejenik etuŋanan lo aitapoet.”

¹⁷ Kikuny ŋesi die mama abwoia eoŋ; kebu ŋesi, abu kakurianar, kebiror ebuburia: konye katema ŋesi eoŋ atiar, “Kojenu, ijo okoku loka etuŋanan; naarai erai aitapoet naka apak nakosaŋe.”

¹⁸Kosodi naenerar ŋesi keoŋ, abu kajotoor ajo nuipu ebuburia: konye katiro, ketobwo.

¹⁹Kotema atiar, “Koany, ketejenikini jo nuejaunete kapak nakokau naka anyunyura: naarai erai naka apak naeseunitai nakosaŋe.

²⁰Emerekek loibu koany loajaas kamumwara aarei kes ikabakan luka Media ka Peresia.

²¹Ekoroi da losanyir ŋes ekabaka loka Yonan: amumwarat da nakapolon naejai kidiŋ kakonyeneke ŋes ekabaka losodit.

²²Ŋin da naabila, kobwaata aoŋon kaiboisike, enyounete ajakanuto aoŋon kotoma ateker, konye mam ejaunos kapedorike.

²³ Ido kapak nakokau naka ajakanutukec, naitodolioto ikebucarak aronisikec, enyouni ekabaka loededeŋ akekonyen, loejenuni asogolin.

²⁴ Epol noi akepedor, konye mere toma apedorike elopet; emudiari ŋesi ketasuro, ekerianari kiswamai nuipuda; emudiari ŋesi ikadedeŋak ka ituŋa luka lukalaunak.

²⁵ Ido kanuka apirianutuke itekeriani aimod kakanike; itopolooro bon kotauke, eturiaikin amudiar luipu: ebwoikini da asurokin ekapolon loka ikapolok; konye ebilio komam akan.

²⁶ Ido aitapoet naka atiboŋa ka atupuruco naalimokinio erai nakabeit: konye kimunon ijo aitapoet; naarai erai naka apaarasia nuipu nuepote.”

²⁷ Abu eoŋ, Daniel keilor, kadekakin acepaarasia; kasodi konyet anyoun, keswama aswamisio nuka ekabaka: kaumok aitapoet komam abu kajenu ŋes.