Read Ebaibuli 1961 Kosea 1 Bible Online

Kosea 1 - Ebaibuli 1961 bible

Kosea 1

¹ Akirot naka EJAKAIT naabu kobu mama ejai Kosea okoku loka Beeri, kapaarasia nuka Usia, ka Yotam, ka Akas, ka Kesekia da, ikabakan luka Yuda, kapaarasia da nuka Yeroboam okoku loka Yoas, ekabaka loka Isirael.

² Nakegeunia EJAKAIT einer ka Kosea, kobala EJAKAIT Kosea ebe, “Kolot, komany aberu nakadoteu, ka idwe luka adoteu: naarai adotear noi akwap, anyoun kama ejai EJAKAIT.”

³Aso abu ŋesi kolot komany Gomer akoku naka Dibilaim; kopotuu ŋesi, kourik ŋes isapat.

⁴ Kotema EJAKAIT ŋes atiar, “Komaik ekekiror Yesereel; naarai eriŋa ber apak naedit kasodi ainyaŋ kokek loka Yeku aokot nuka Yesereel, etanaŋi da ajakanut naka ekek loka Isirael.

⁵Kosodi kanen kapaaran kaŋin, abili eoŋ akabwa naka Isirael toma aditot naka Yesereel.”

⁶Kopotuu bobo kouru ipese, Kotema EJAKAIT ŋes atiar, “Komaik ekekiror Lo-rukama.[1] Naarai mam bobo etimi ekek loka Isirael, tetere esioniei kes.

⁷Konye etimi ekek loka Yuda, etajari kes kanuka EJAKAIT Ekecedeke, mam etajari kes kanuka akabwa, karaida ekileŋ, karaida ejie, karaida ibalasin, karaida ikebwanenok.”.

⁸Kosodi kedau aitajakaar Lo-rukama, kopotuu, kouru isapat.

⁹Kotema EJAKAIT atiar, “Komaik ekekiror Lo-ami; [2] naarai mam eraas ikatuŋa, eoŋ da mam araun Ekusideke.”

¹⁰ Konye do eraun etiai loka idwe luka Isirael kwape asiŋe naka aŋolol namam epedori aitemio karaida aimario; kosodi kanen, kaibois naaponi kotemarere kes ebe, “Mam iraas ikatuŋa,” etemario do kes ebe, “Yes odwe luka Edeke lokajaran.”

¹¹Etukonokinos idwe luka Yuda ka idwe luka Isirael, eseunete lokapolon ediopet, enyounete kakwap: naarai epol apaaran naka Yesereel.