Read Ebaibuli 1961 Kosea 12 Bible Online

Kosea 12 - Ebaibuli 1961 bible

Kosea 12

¹ Edak Epuraim ekwam, Etupit ekwam lokokide: Iyatanakini tiritir aiŋal ka aimod; Itutukete kAsuria, eyaŋaario akinyet Misiri.

²Ejai EJAKAIT aŋolopa ka Yuda, Iticani Yakob kwape ejaatar iponesioke; Itepeseni ŋes kwape ejaatar aswamisioke.

³ Kakoik abu kitiŋ onaceke katitibat; Ido kekuruŋan koutas ka Edeke:

⁴ Eebo, koutas kemalaika, kipiko: Komony akiyo, kiŋaiŋa ŋes: Kiriamunos ka Edeke koBet-el, Kaŋina da kinera Edeke kaŋes.

⁵Ŋes EJAKAIT, Edeke loka ajoresio; EJAKAIT ŋes ekekiror.

⁶Aso do kibelokin ijo mama ejai Ekonideke; Koricite aitim ka etube, Kidareununei tiritir Ekonideke.

⁷Ekagwelanaran, itiŋit ainiŋesio nuka aiŋal kakanike: Emina aimod.

⁸Abala Epuraim ebe, “Abeit abar eoŋ, adum abar”: Konye mam abarake kere edauni aronis naadiaka ŋesi.

⁹ Naarai arai eoŋ EJAKAIT Ekonideke Anyoun kakwap nako Misiri; Esiboikini bobo yes oweman, Kwape kapaarasia nuka epucit lokaiyamakina.

¹⁰Abu eoŋ kener da kinabin, Eoŋ ŋes eyatakini aitapoeta, Kainak awaragasia kama ka inabin.

¹¹ Arai ejaas numam adolit toma Gilead, Abeit eraunos aamameak; Arai einakinete imoŋin lutoba koGiligal, Eraunos itemwanakec atukon nuka amor Kaloboi nuka emanikor.

¹² Abu Yakob koker omanikor loka Aram, Kijaanak Isirael adumunia aberu, Kicokiei amerekekin adumunia aberu.

¹³ Kitolom EJAKAIT Isirael koMisiri kenabi, Kidarenenei enabi kes.

¹⁴ Etunyunyurik Epuraim noi noi: Kanuka ŋun kobeata ŋes akeokot, Inyakakini EJAKAIT ŋes akemorosit.