Read Ebaibuli 1961 Yoel 1 Bible Online

Yoel 1 - Ebaibuli 1961 bible

Yoel 1

¹ Akirot naka EJAKAIT naabu kobu mama ejai Yoel okoku loka Petuel.

² Kiirasi na, yes imakio, Kitoikis aki yes kere luiboiete kakwap. Abu kereka na kojaun kapaarasiakus, Arai bo kapaarasia nuka lukapapakus?

³ Kolimokisi yesi ikusidwe, Ikusidwe da kolimokis idwekec, Ka idwekec da atur ace.

⁴Luedeuni ogagul, anyam emaase; Luedeuni emaase anyam enyede; Luedeuni enyede anyam ekutelek.

⁵ Kokwenyutu, yes ikamerak, komonya; Kodelosi, yes kere ikamatak ajon, Kanuka ajon nuwinyiwiny; Naarai ademaritai kaitukekus.

⁶ Naarai ebunokinit ateker akwapuka, Naegogoŋ, namam imario; Esubito ikelake bala ikela luka eŋatuny, Ejaas itirikada luka aŋatuny.

⁷ Etoono ekamusabibu, abil etinika: Erega cut, acaka; Etwakaŋ atenunake.

⁸ Kokuudian kwape abekot naenapit epuko Kanuka okilenike loka atumunike.

⁹ Ademaritai ainakinet naka akiria ka ainakinet da namatat Kotogo loka EJAKAIT; Ibworos isasedotin, Ikejaanakinak luka EJAKAIT.

¹⁰ Eswap emanikor, ibworo akwap; Naarai eswapata akima, Aoko ajon nukitetiak, Eŋoŋar akinyet.

¹¹ Kileicikisi, okwe yes ikakoriok, Kodelosi, okwe yes ikacapak imusabibun, Kanuka akima ka esairi; Naarai aolio aidweny naka emanikor.

¹² Arinyo emusabibu, eŋoŋar etini; Arinyoto ekamamaga, ka eidukudukut, ka emucugwa, Ikito kere da lukomanikor: Naarai arinyo ailel kodwe luka ituŋa.

¹³ Konapata ipukoi, kokuudianata, yes isasedotin; Kodelosi, yes ikejaanakinak luka etem. Kopotu, koperoto opukoi akuare kia, Yes ikejaanakinak luka Ekadeke: Naarai imikitai ainakinet naka akiria ka ainakinet namatat, Kotogo loka Edekekus.

¹⁴ Kitalaut ailuŋ, konyaraut atukokin nakalaunan, Kotukonokinos imakio ka luiboiete kakwap kere Kotogo loka EJAKAIT Ekusideke, Komonyata mama ejai EJAKAIT.

¹⁵ Itukwi apaaran ŋin! Naarai aapu apaaran naka EJAKAIT, Ebuni kwape amudiar kaneejai Lokapedor kere.

¹⁶ Mam kereka ademaritai inyamat kakonyenewok, Eebo, ailel ka aiyalama kotogo loka Edekewok?

¹⁷Ebosete ikinyom kaloboi; Esilioros idulai, Ebilio itujai; Naarai arinyoto akima.

¹⁸ Idinyasi ca ma itiaŋ! Ejuruŋuŋito isipanin luka ibaren, Naarai emameete kes inya luedakas; Eebo, itisilio isipanin luka amerekekin.

¹⁹Wu EJAKAIT, amonyi eoŋ mama ijai: Naarai edopo akim ironyia luka amodiŋ, Ecweata aipelonoreta ikito kere luka ais.

²⁰ Eebo, iyeŋiyeŋas itiaŋ luka ais mama ijai: Naarai aokoto icileta luka akipi, Edopo akim ironyia luka amodiŋ.